SASUWANG 39

Munggepe pakeang u imam

(Sasu. 28:1-14)

1I Bezaleel dang i Aholiab nunggepe pakeang u nggaweti bou wol ko biru, ungu dang mahamu guna ngu manga imam su tempo ngi sire muhal᷊i su kamari susi. Pakeang u imam guna ngi Harun nikoa kere ko niparentang u Mawu si Musa.

2Efod nikoa bou heka leneng ko al᷊usi, wol ko biru, ungu dang mahamu, dang banang wul᷊aeng. 3I sire nududu manga kompeng u wul᷊aeng ko wuhue nipapoto nakoa banang manipi, bou e'e nikoa heka dingang u leneng ko al᷊usi dang wol ko biru, ungu dang mahamu. 4Bou e'e nukoa tal᷊i ngu wumbang darua l᷊aiki u efod ko nighepe su sindihange. 5L᷊aiki u kal᷊uwaeng nighepe al᷊usi nikoa bou kakoae ko musul᷊ung dang nighepe su efod hakiu nakoa simbau kere ko niparentang u Mawu si Musa. 6I sire nangeghohi watu delima bou e'e nitahoe su l᷊al᷊ung u bingke wul᷊aeng. Dingang napene u kapapande i sire namohe manga areng u mapul᷊odua ana i Yakub su manga watu e'e. 7Tuhue manga watu e'e nitaing su tal᷊i wumbang u efod kere tatia putatinaungang su mapul᷊odua suku ngu Israel, musul᷊ung ko niparenta ngu Mawu si Musa.

Mukoa tataka roko

(Sasu. 28:15-30)

8I Bezaleel dang i Aholiab nukoa tataka roko bou kakoae musul᷊ung dingang u efod, dang sujie l᷊ai musul᷊ung. 9L᷊uhurie nuwuku ko nil᷊ukuhi darua, wunahi l᷊au nandue taha duampul᷊odua su sentinge. 10Su tataka u roko e'e nitaingang i sire watu permata pa reinge. Su reinge kahimotongange watu delima, topas dang baiduri sepa. 11Su rei karuange zamrud, watu nilam dang intang. 12Su rei katilunge watu lazuardi, akik dang watu kacubung. 13Su rei kapae watu pirus, yakut, dang ratna sampakang. Kapul᷊oduange permata e'e niiki dingang u wul᷊aeng. 14Su apang permata niwohe areng u singkatau bou mapul᷊odua ana i Yakub kere tatia putinaungang su manga suku ngu Israel. 15Bou e'e nikoateng darua hante bou wul᷊aeng tuleng ko nitawiri musul᷊ung u tal᷊i. 16Nikoa l᷊ai wukal᷊a wul᷊aeng darua ko nitaing su pondol᷊i darua su wawo u tataka roko e'e. 17Bou e'e hante wul᷊aeng darua e'e nitaho su l᷊al᷊ung u manga wukal᷊a e'e, 18dang pondol᷊i darua ko wal᷊inge niiki su bingke darua, hakiu tataka roko e'e botonge isumpu dingang u bahageang tingo ngu tal᷊i wumbang u efod. 19Bou e'e nikoateng l᷊ai wukal᷊a wul᷊aeng darua ko nitaing su tataka roko e'e, su pondol᷊i ko wawa su bageang l᷊al᷊unge ko nikahino ngu efod. 20Bou e'e nikoae wukal᷊a wul᷊aeng darua ko itaing su tingo ngu tal᷊i wumbang u efod, masandighi u sumpu u ghaghepe'e dio tanae, su wawo u l᷊aiki u kal᷊uwaeng bou ghaghepe ko al᷊usi. 21Kere ko parenta ngu Mawu si Musa, wukal᷊a tataka u roko isumpu dingang u tal᷊i ko biru su wukal᷊a u efod, hakiu tataka roko e'e tatapi ene su wawo u l᷊aiki kal᷊uwaeng dang ta mapilo.

Mukoa pakeang ko wal᷊inge guna ngu manga imam

(Sasu. 28:31-43)

22Juba ko ipake su wawo u efod, kaul᷊ie nikoa bou wol ko biru. 23L᷊ohang u l᷊ehie nipakatoghasi dingang u pita ghaghepe tadeau ta maehong maghehe. 24-26Su wiwihi wawa nil᷊ikutang ngu l᷊al᷊ighahie wua ngu delima bou heka leneng ko al᷊usi dang wol ko biru, ungu, dang mahamu, niwulakeng dingang u manga l᷊al᷊ighahie bou wul᷊aeng ko l᷊umuntingihi, kere parenta ngu Mawu si Musa. 27I sire nukoa kameja guna ngi Harun dang manga anae, 28l᷊au paporong, daster dang sal᷊ana ko pol᷊o bou leneng, 29dang l᷊aiki kal᷊uwaeng bou heka leneng ko al᷊usi, wol ko biru, ungu dang mahamu, nilighaheng u sujie, kere niparenta u Mawu si Musa. 30L᷊ai nikoa l᷊al᷊ighahie bou wul᷊aeng tuleng tatia himoneu i sire seng nitani guna ngu Mawu. Su l᷊al᷊ighahie e'e niwohe manga didato “Nitani guna ngu Mawu”. 31L᷊al᷊ighahi e'e nitaing su paporong bageang tingonge, sintuhu dingang u parenta ngu Mawu si Musa.

Hal᷊i e'e nipakasue

(Sasu. 35:10-19)

32Kasamuriange nasuete kaul᷊i u hal᷊i mukoa Kema ngu Mawu. Taumata ngu Israel seng nukoa kaul᷊ie musul᷊ung ko niparenta ngu Mawu si Musa. 33I sire numbawa sarang koa i Musa Kema dingang u kaul᷊i u sal᷊iumpuhi, manga kakaie, manga kau wawal᷊andange manga rihi dang l᷊ampahie, 34tataka bou pisi ngu kambing ko ese nilaburang u mahamu, tataka bou pisi ko al᷊usi heka tatimbukung. 35Wantal᷊i u Pudadiandi ko tahoe watu darua dingang u kau ghaghual᷊eng dang tatakae, 36meda dingang u kaul᷊i u sal᷊iumpuhi dang boroti l᷊ahaghesi, 37rihi ngu sol᷊o bou wul᷊aeng tuleng, manga sol᷊oe dingang u kaul᷊i u sal᷊iumpuhi, l᷊ana guna ngu sol᷊o, 38mesba bou wul᷊aeng, l᷊ana guna ngu upacara, dupa mawungi, pampele tukari u Kema, 39mesba witu dingang u kawa nianang bou witu, kau ghaghual᷊eng dang kaul᷊i u sal᷊iumpuhi, baki tampa panguhaseng dingang u l᷊ampahie, 40manga pampele guna ngu salasari dang manga papasie l᷊au u l᷊ampahie, pampele tukari u salasari, l᷊au u manga tal᷊inge, manga papasi u Kema; kaul᷊i u sal᷊iumpuhi ko ipake su l᷊al᷊ung u Kema, 41dang pakeang u nggaweti guna ngu manga imam su tempo ngi sire muhal᷊i su kamari ko susi dang pakeang nitani guna ngi Harun dang manga anae. 42Taumata ngu Israel seng nukoa kaul᷊i u hal᷊i e'e musul᷊ung ko niparenta ngu Mawu si Musa. 43I Musa namariksa kaul᷊ie dang nakawua himoneu i sire seng nukoa nuhino musul᷊ung ko niparenta ngu Mawu. Bou e'e i Musa nangal᷊amati si sire.

Currently Selected:

SASUWANG 39: PLT

Highlight

Copy

Compare