SASUWANG 22

Atorang u ghaghanti karugiang

1“I sai ko manako sapi arako domba simbau bou e'e nihatae arako niwal᷊ue, mambeng mungganti sapi simbau dingang u sapi l᷊ima dang domba simbau dingang u domba pa. 2-4I sie mambeng mungganti barang ko nitakoe. Kamangkeng i sie takoae apa-apa, i sie sisanenge sarung iwal᷊u kere l᷊ang tadeau pungganti barang ko seng nitakoe. Kamangkeng ko nitakoe e'e ko sapi, keledai arako domba dang nikarea su taumata e'e mborong wiahi, i sie mambeng mungganti binatang simbau dingang u binatang darua.

Kamangkeng su tempo huwi singkatau mananako nikasame kapanakonge su l᷊al᷊ung u wal᷊e, bou e'e i sie nipate, taumata ko namate e'e ta nunsal᷊a. Kateho kamangkeng hal᷊i e'e nariadi su tempo l᷊ou, taumata ko namate nitantu nunsal᷊a.

5I sai ko mamala ngu binatange kumang duku su anseri arako su awuhi anggorie, bou e'e binatang e'e mutaung dang kumang tataho u anseri taumata ko wal᷊inge,#22:5: I sai … ko wal᷊inge arako boko singkatau nanutung simbau anseri arako kobong u anggori, l᷊au mamala putung e'e hakiu natutung hasili u anseri … inau tataghuang u binatang e'e mambeng mamaehi ghaghanti ngu karugiang dingang u hasili bou anseri arako awuhi anggori sisane.

6I sai ko mundiko u putung su anseri sisane bou putung e'e nurumaki su anseri u taumata ko wal᷊inge dang nakatutung kaul᷊i u gandung ko buhue katuwonge arako manga wukisi ngu gandung ko wuhue nihoto, kuteu taumata ko nupahena ngu putung e'e mambeng mamaehi ghaghanti ngu karugiang.

7Umpamange pia taumata ko kimire makireso doi arako sal᷊iumpuhi mal᷊al᷊ighari. Kateho bou e'e barang ko nireso e'e nitako bou wal᷊enge. Kamangkeng mananakonge nikarea, i sie mambeng mamaehi pakarua. 8Kateho boko mananakonge ta nikarea, taumata ko nipundesonang e'e mambeng iwawa sarang tampa u pukakal᷊iomanengang, dang su se'e i sie mambeng mutewa himoneu i sie ta nanako barang ko nipakireso si sie.

9Su l᷊al᷊ung apang purarendehi hal᷊i u rarotong, maneng sapi, keledai, domba, pakeang arako manga apa l᷊ai ko nailang bou e'e sau nikarea, manga taumata ko mangaku kere tataghuange mambeng iwawa sarang tampa u pukakal᷊iomanengang. Taumata nil᷊ahe u Mawu Ruata kere taumata ko nunsal᷊a, mambeng mamaehi pakarua su tataghuange.

10Umpamange singkatau mupal᷊ihara keledai, sapi, domba arako binatang ko wal᷊inge ko koa u sinsul᷊unge. Bou e'e binatang e'e nate, nal᷊esi arako niaho ngu roka, kateho takoae saksie. 11Su l᷊al᷊ung u hal᷊i e'e ia mambeng matamai sarang tampa u pukakal᷊iomanengang dang putewa dingang u areng u Mawu himoneu i sie ta nanako binatang papal᷊iharang ko seng nisarakang si sie. Boko i sie ta nanako, tataghuange mambeng mananggong karugiang e'e, dang taumata ko namal᷊ihara tahawal᷊uasi mamaehi kere ghaghanti ngu karugiange. 12Kamangkeng binatang e'e nitako ngu taumata ko wal᷊inge, kuteu taumata ko namal᷊ihara e'e mambeng mamaehi ghaghanti ngu karugiang su tataghuange. 13Kamangkeng binatang e'e nitimbo u binatang ko wahani, taumata ko mamal᷊iharange mambeng mangandaghi manga l᷊umbei ngu duhinge kere tatia su tataghuange, tahawal᷊uasi i sie mamaehi ghaghanti ngu karugiang binatang e'e.

14Kamangkeng singkatau mangirang binatang papal᷊iharang simbau bou e'e binatang e'e nal᷊esi arako nate su tempo tataghuange tarie'e su tampa nikapateng e'e, ko nangirang mambeng mamaehi ghaghanti ngu karugiang. 15Kateho boko e'e nariadi su tempo tataghuange ene su se'e, ko nangirang tahawal᷊uasi mamaehi ghaghanti ngu karugiang. Kamangkeng binatang e'e binatang ko nisewa, karugiange mawaehi kere ongkosi u sewange.”

Atorang hal᷊i u muwiahi dang punggaweting

16 # Sau. 22:28-29 “I sai ko mul᷊oke singkatau ana ko l᷊uhisi ko borong ta nutunangang hawukang matiki dingange, mambeng mamaehi paiki kawinge, dang mukawing dingange. 17Kateho kamangkeng i papange ta mupakawala ko ese e'e mukawing dingang anae, ko ese e'e mambeng mamaehi si papange doi ikoa kere paiki kawing guna ngu singkatau ana l᷊uhisi.

18 # Sau. 18:10-11 Apang kowawine ko mukoa pul᷊iku mata mambeng pateng.

19 # Im. 18:23, 20:15-16; Sau. 27:21 Taumata ko mutatamba badang dingang u binatang mambeng pateng.

20 # Sau. 17:2-7 I sai ko mangonggo korbang su manga mahang mawu su l᷊ikuru Ia, Mawu, mambeng ihukung pateng.

21 # Sasu. 23:9; Im. 19:33-34; Sau. 24:17-18, 27:19 Kumbahang mangumpisi arako mukoa takoae adili su taumata raghi; tinaungeko himoneu l᷊inau horo i kumu l᷊ai taumata raghi su Mesir. 22Kumbahang bala kao marea u kowawine wal᷊u ringang u ana kasisi tumaniu mapal᷊iu. 23Kamangkeng i kumu mundal᷊ai si sire, Ia, Mawu sarung mundaringihi si sire boko i sire mukahioro mundo tul᷊ung si Sia. 24Ia sarung muwawal᷊uang dang ta mamala puwiahi si kumu su l᷊al᷊ung u muparang, hakiu manga kawing i kumu makoa ko mawal᷊u dang manga ana i kumu makoa ko kasisi.

25 # Im. 25:35-38; Sau. 15:7-11, 23:19-20 Kamangkeng i kumu mupangirang u doi su taumata ko susa bou tal᷊oara u bangsa-Ku, kumbahangwe makoa musul᷊ung u mumbatu utang ko pia rentenge. 26#Sau. 24:10-13 Kamangkeng i kumu mangal᷊a juba ngu taumata ko wal᷊inge kere l᷊aiki utange, juba e'e mambeng isul᷊e i kumu suhoro u matangutiti sumira, 27watu ko kitang juba e'e koae guna ngu mupakatiti u badange. Kamangkeng ta nisul᷊e si sie, apa l᷊ai ko mambeng ipake'e guna ngu puwawal᷊i su tempo matiki? Boko i sie mukahioro mundo tul᷊ung si Sia, kuteu Ia sarung mundaringihi si sie watu'u Ia napene u kakindaghi.

28 # Wuk. 23:5 Kumbahang mangane Mawu Ruata dang kumbahang mangutoki pangaha u bangsa ngi kumu.

29Su tempo ko nitantu, onggoko si Sia simbageang bou l᷊uang u gandung, ake u anggori kumu dang l᷊ana zaitung i kumu.

Onggoko si Sia apang ana i kumu ko ese ko iyakang, 30l᷊ai sapi l᷊au u domba ko ese ko kahimotongange nihana. Walako manga binatang e'e dingang i mae su tempo pitu l᷊ou, bou e'e onggo si Sia su l᷊ou kawal᷊unge.

31 # Im. 17:15 I kumu umati-Ku, watu e'e manga binatang apa l᷊ai ko nitimbo u binatang wahani, ta botonge i kumu kumina ghisi nge, onggo ko e'e su manga kapuna.”

Currently Selected:

SASUWANG 22: PLT

Highlight

Copy

Compare