SASUWANG 21
21
Kirapa marea u l᷊ang
(Sau. 15:12-18)
1Bou e'e Mawu nuhengetang si Musa, “Onggoko su taumata ngu Israel manga atorang i'i: 2#Im. 25:39-46Boko i kumu mul᷊uang singkatau l᷊ang bangsa ngi kumu sisane, i sie mambeng muhal᷊i guna ngi kumu yul᷊enge nungu taung. Su l᷊al᷊ung u taung kapitunge i sie mambeng ipakal᷊iu dang tawahal᷊uasi pamaehi manga apa. 3Boko i sie mborong umbaseng su tempo nakoa l᷊ang i kumu, kuteu kawinge ta botonge tumuhu su tempo ngi sie sumuwang. Kateho boko i sie seng nukawing su tempo nakoa l᷊ang i kumu, kawinge botonge tumuhu dingange. 4Kamangkeng i tuange mupukawing i sie dingang u singkatau kowawine, bou e'e i sie nakahombang ana, kuteu kawinge dang anae e'e mariadi koa i tuange, dang ta botonge tumuhu dingang u l᷊ang e'e su tempo ngi sie nipakal᷊iu. 5Kateho boko l᷊ang e'e mangul᷊i himoneu i sie kumindaghi u kawinge, manga anae, dang i tuange, tawe mo ipakal᷊iwiri, 6kuteu tuange mambeng mumbawa si sie sarang tampa pukakal᷊iomanengang. Pai se'e l᷊ang e'e iroi pararisi putingkasade su tukari arako su rihi su tukari u tampa pukakal᷊iomanengang, dang tuange mambeng mul᷊ohang tul᷊i ngu l᷊ang e'e. Kuteu i sie sarung mariadi l᷊ange su kanandu u puwawiahi.
7Boko singkatau kowawine ngu Ibrani niwal᷊u i papange kere l᷊ang, kowawine e'e ta ipakal᷊iu su horo u nungu taung, inau mutatintang dingang u l᷊ang ko ese. 8Boko i sie ta makal᷊uasi naung i tuange ko pia kaoe mukawing si sie, kuteu i sie mambeng iwal᷊u sau su ghaghurange. Ko wawine ta botonge iwal᷊u su taumata ngu raghi, watu'u i sie seng buae niputaghunang i tuange ko ta nungganapi diandinge. 9Kamangkeng pia singkatau mul᷊uang l᷊ang kowawine guna ngu i koa kawingu anae, l᷊ang kowawine e'e mambeng koateng kere ana tutunge. 10Kamangkeng manga ana ko ese e'e sau mukawing, i sie tatapi mananggong guna ngu mangonggo kang l᷊au u pakeange dingang kaul᷊i u hakie kere narange su kawinge ko kahimotongange. 11Kamangkeng i sie ta mamene tanggongange e'e, i sie mambeng mupakal᷊iwiri kawinge e'e ta manarima doi wawaehi.”
Atorang u hal᷊i kakanoa ko mahasa
12 #
Im. 24:17
“I sai ko mundariha taumata ko wal᷊inge sarang mate, mambeng ihukung pateng. 13#Rek. 35:10-34; Sau. 19:1-13; Yos. 20:1-9Kateho kamangkeng i sie mundariha dingang ta niputaturi dang takoae ol᷊ange mamate, i sie botonge tumal᷊ang u watangenge sarang tampa simbau ko sarung Daku itibo si kau, dang pai se'e i sie makarea pusasirungang. 14Kateho kamangkeng pia singkatau nuwawal᷊uang dang nutaturi namate taumata ko wal᷊inge, bou e'e nutumal᷊ang sarang mesba-Ku tadeau makarea pusasirungang, taumata e'e mambeng al᷊akeng bou mesba dang ihukung pateng.
15I sai ko mundariha si papange arako si mamange mambeng ihukung pateng.
16 #
Sau. 24:7
I sai ko mul᷊ikosi singkatau, mambeng ihukung pateng, apa minsang taumata e'e seng niwal᷊ue arako borong ene su wal᷊enge.
17 #
Im. 20:9; Mat. 15:4; Mrk. 7:10 I sai ko mangutoki si papange arako si mamange mambeng ihukung pateng.
18Boko su l᷊al᷊ung u pukakokang singkatau namukul᷊i taumata ko wal᷊inge dingang u watu arako dingang u kungkunge, kateho ta nakapate, i sie ta sarung ihukung, boko taumata ko nipukul᷊i e'e sarang mambeng nurating sarang naral᷊oka watu'u pamamukul᷊i e'e, 19kateho kasamuriange, botonge nuwangung dang nul᷊umal᷊eng dingang u tiking, taumata ko namukul᷊i e'e mambeng mutal᷊ung sarang maul᷊e dang mangonggo u ghaghanti ngu karugiang su kal᷊iwuengu i sie masaki.
20I sai ko mamukul᷊i l᷊ange ko ese arako kowawine hakiu l᷊ang e'e turusi nate, mambeng ihukung. 21Kateho kamangkeng l᷊ang e'e tawe nate su l᷊al᷊ung u silou arako dua l᷊ou, i tuange e'e ta ihukung. Karugiang ko nikapundangenge watu nikailangeng u l᷊ang e'e makoa kere hukumang si sie.
22Kamangkeng pirangkatau kol᷊aese ko kapukakokange dang singkatau bou tal᷊oara i sire nakasilaka singkatau kowawine ko pia kal᷊uwaenge hakiu i sie nikanawong, kateho ta nakakoa saki su bageang badang ko wal᷊inge, inau taumata e'e mambeng mamaehi denda su kaul᷊i u ko kere nitantu u kawinge dang niaku manga mamamonesi e'e. 23Kateho kamangkeng kowawine e'e nikahinomang u silaka tumaniu mabuha, inau hukumang silaka e'e ko sasinda ghanti ngu sasinda, 24#Im. 24:19-20; Sau. 19:21; Mat. 5:38 mata ghanti ngu mata, isi ghanti ngu isi, l᷊ima ghanti ngu l᷊ima, l᷊aeri ghanti ngu l᷊aeri, 25l᷊esi ghanti ngu l᷊esi, l᷊oso ghanti ngu l᷊oso, sahunu ghanti ngu sahunu.
26I sai ko mamukul᷊i mata ngu l᷊ange sarang mawuta, mambeng mupakal᷊iu ngu l᷊ang e'e kere tatubusi guna ngu matange. 27Kamangkeng singkatau mamukul᷊i l᷊ange sarang mabare isie, l᷊ang e'e mambeng ipakal᷊iunge kere wawaehiu isie e'e.”
Tanggong jawapi manga mananaghuang
28“Kamangkeng simbau sapi ko ese manunge singkatau sarang mate, sapi e'e mambeng pateng dingang pal᷊okang u watu, dang ghisinge ta botonge kinaseng, kateho tataghuange ta sarung ihukung. 29Kamangkeng sapi ko ese pia lulunge manunge dang tataghuange seng mbuae nionggol᷊ang u ingati, kateho ta mundiaga binatang e'e, bou e'e suapang u sapi ko ese e'e manunge su singkatau sarang mate, inau binatang e'e mambeng pateng dingang pal᷊okang u watu dang tataghuange l᷊ai mambeng ihukung pateng. 30Kateho bou tataghuang u sapi e'e ipakawala mamaehi tatubusi, i sie mambeng mamaehi kere kaul᷊i u ko nitantu guna ngu manubusi jiwange. 31Kamangkeng ko nipate singkatau ana ko ese arako kowawine mang kahinomang u atorang e'e l᷊ai. 32Boko ko nipate e'e singkatau l᷊ang ko ese arako kowawine, tataghuang u sapi e'e mambeng mamaehi tilumpul᷊o doi sal᷊aka su tataghuang u l᷊ang e'e, dang sapi ko ese e'e mambeng pal᷊okang u watu sarang mate.
33I sai ko mangal᷊a tataka bou simbau pahighi arako mukal᷊i pahighi l᷊au u ta manaka, bou e'e simbau sapi ko ese arako keledai nanawo su l᷊al᷊unge, 34tataghuang u pahighi e'e mambeng mamaehi ghaghanti ngu karugiang su tataghuang u binatang e'e, kateho i sie botonge mangal᷊a binatang ko seng nate e'e guna ngu watangenge. 35Boko sapi ko ese u singkatau mamate sapi ko ese ko wal᷊inge, i sire rua tataghuange mambeng muwal᷊u binatang ko borong wiahi e'e dang mupahia doinge. I sire l᷊ai mambeng mupahia ghisi ngu binatang ko nate e'e 36Kateho kamangkeng seng nikatitonang himoneu sapi ko ese e'e pia lulunge manunge, dang tataghuange ta mundiaga, i sie mambeng mungganti ngu sapi ko ese ko borong wiahi, dang botonge mangal᷊a binatang ko seng nate e'e guna ngu watangenge.”
Currently Selected:
SASUWANG 21: PLT
Highlight
Copy
Compare
Share
Want to have your highlights saved across all your devices? Sign up or sign in