SASUWANG 14
14
L᷊umiu l᷊auri Gelagah
1Bou e'e Mawu nangul᷊i si Musa, 2“Roiko taumata ngu Israel pusul᷊e pukema su tingo ngu soa Pi-Hahirot, su tal᷊oara u soa ngu Migdol dang l᷊auri Gelagah, masandighi soa ngu Baal-Zefon. 3Ratu ngu Mesir sarung manika himoneu taumata ngu Israel mangkate kal᷊al᷊enge su wanua i'i dang napal᷊iri su tana l᷊inggi. 4Ia sarung mupakakitihi si sie hakiu i sie mumbatu si kumu. Kateho Ia sarung mangandaghi kawasa-Ku su ratu ngu Mesir dang sordadonge, dang i sire sarung matitong himoneu ko Ia Mawu.” Bou e'e taumata ngu Israel nukoa kere ko niparenta ngu Mawu si sire.
5Suapang ratu Mesir nakaringihi himoneu bangsa Israel seng nutumal᷊ang i sie dang manga mapapangkati nusisili dang nangul᷊i, “Apa koateng i kite? Nakurawe nipakawala ngi kite manga taumata ngu Israel e'e patamai hakiu i kite nikailangeng u manga l᷊ang?” 6Bou e'e ratu nanadia kereta parang dang sordadonge. 7I sie nuwua dingang u apang keretae, narekeng nunguhasu kereta ko takoae sul᷊unge, ko nisakenang u manga tumbonange. 8Tingari Mawu nukoa ratu nukul᷊iwatu, hakiu i sie numbawatu taumata ngu Israel ko tintal᷊a kal᷊al᷊enge manintang u soa e'e su l᷊al᷊ung u tintanuri Mawu.#14:8: su l᷊al᷊ung u tintanuru Mawu arako dingangu katatoghasi 9Sordado ngu Mesir dingang u kaul᷊i u kawal᷊o kereta dang sumasakenge numbawatu taumata ngu Israel, dang nakawatu si sire su pukakemang i sire su apeng masandighi u Pi-Hahirot.
10Suapang taumata ngu Israel nakawua ratu ngu Mesir dang sordadonge nasongo, i sire nataku kahingang dang nukui su Mawu mundo tul᷊ung. 11Angkung i sire si Musa, “Apa su Mesir takoae kubul᷊i, hakiu i kau numbawa si kami tadeau mate su tampa i'i? Tuhungeko suke ngu kakanoau e'e! 12Horo su Mesir i kami seng nangul᷊i, watu'u hal᷊i i'i sarung nariadi! I kami seng nanihasa tadeau i kau kumbahang managhal᷊i si kami, kateho mupakawala ngi kami tatapi makoa l᷊ang su Mesir. Mapiang makoa l᷊ang pai se'e musul᷊ung u mate su tana l᷊inggi i'i!”
13I Musa nusumimbahi, “Kumbahang mataku! Putatahangko! I kumu sarung makawua apa ko koateng u Mawu guna ngu mupakasal᷊amati kumu. Taumata ngu Mesir ko tuhungang i kumu su orasi i'i, ta sarung ikawua ngi kumu l᷊ai. 14Mawu sarung mutawakal᷊i guna ngi kumu, dang i kumu ta botonge mukoa manga apa.”
15Angkung u Mawu si Musa, “Nakurawe i kau nukui mundo tul᷊ung? Roite taumata ngu Israel pal᷊al᷊eng turusi! 16Hengke tikingu dang tirei su wawo u l᷊auri. Kuteu ake sarung mapahia dang taumata ngu Israel botonge makal᷊iu l᷊auri dingang l᷊umal᷊eng su wawoe ko mamara. 17Taumata ngu Mesir sarung Daku ipakakitihi hakiu i sire turusi numbawatu taumata ngu Israel, dang Ia sarung mangandaghi kawasa-Ku su ratu ngu Mesir, ghapange, manga keretae dang manga sumasakenge. 18Inau taumata ngu Mesir sarung matitong himoneu ko Ia Mawu.”
19Bou e'e malaikati u Mawu Ruata, ko ene su tingo ngu pasukang u Israel, nangal᷊ing sarang l᷊ikuri. Dang nangal᷊ingte l᷊ai rihi winawa sarang ene 20su tal᷊oara u ghapang u pasukang u Mesir l᷊au u ghapang u pasukang u Israel. Winawa e'e nakakoa kararundung,#14:20: Winawa … marundung: Botonge mariadi. hakiu su kanandu u huwi pasukang darua e'e ta makapusasandighi.
21Bou e'e i Musa nanirei ngu l᷊imange sarang wawo u l᷊auri, dang Mawu nupatiu anging raki mauha hakiu sasi naoho su kanandu u huwi anging e'e nutumiu, dang namal᷊u l᷊auri nakoa tana mamara. 22#1Kor. 10:1-2; Ibr. 11:29Ake napahia darua, dang su tempo ngu taumata ngu Israel nul᷊umiu l᷊auri, i sire nul᷊umal᷊eng su marange dang ake su kuaneng kuihie musul᷊ung u meseli. 23Taumata ngu Mesir dingang u kaul᷊i u kawal᷊o, kereta dang sumasakenge numbawatu turusi dang nutumuhu taumata ngu Israel sarang tal᷊oara u l᷊auri. 24Masandighi mal᷊ou Mawu nutuhung bou rihi putung l᷊au u winawa su sordado ngu Mesir dang mupukaesi i sire. 25I sie nukoa manga roda ngu kereta ngi sire narusa, hakiu dingang u haghi ngu susa i sire tumondo. Angkung u taumata ngu Mesir, Mawu nutawakal᷊i guna ngu taumata ngu Israel nundoka si kite. Maite i kite tumal᷊ang bou tampa i'i.
26Angkung u Mawu si Musa, “Tireiko l᷊ima ngu sintarai su wawo u l᷊auri, kuteu ake sarung musul᷊e, dang mamontol᷊i taumata ngu Mesir manga kereta l᷊au u manga sumasakenge.” 27Bou e'e i Musa nanirei l᷊imange sarang wawo u l᷊auri dang su tempo mata ngu titi naburesi ake nusul᷊e su kakakoae kere horo. Taumata ngu Mesir nutawakal᷊i mupakasal᷊amati u watangeng i sire, kateho Mawu nupakawontol᷊i sire sarang l᷊al᷊ung u l᷊auri. 28Sasi nusul᷊e dang nanaka manga kereta, manga sumasake, dang kaul᷊i u sordado Mesir ko numbawatu taumata ngu Israel sarang tal᷊oara u l᷊auri, hakiu i sire kaul᷊ie nate. 29Kateho su tempo taumata ngu Israel nul᷊umiu l᷊auri. I sire nul᷊umal᷊eng su tampa ko mamara dang sasi nakoa kere meseli su kuaneng kuihie.
30Su silou e'e Mawu nupakasal᷊amati bangsa Israel bou sarangang u taumata ngu Mesir, dang i sire nakawua manga bangke taumata ngu Mesir nipahundue su apeng. 31Su tempo taumata ngu Israel nakawua kirapa Mawu ko dingang u kawasang-E ko l᷊abo nupakawata taumata ngu Mesir, i sire naherang kahingang hakiu nangimang si Sie dang si Musa l᷊ang-E e'e.
Currently Selected:
SASUWANG 14: PLT
Highlight
Copy
Compare
Share
Want to have your highlights saved across all your devices? Sign up or sign in
