SASUWANG 13
13
Sasumba ana ko iyakang
1 Mawu nuhengetang si Musa, 2#Rek. 3:12-13; Luk. 2:23“Onggo kere sasumba kaul᷊i u ana ko ese ko iyakang si Sia. Apang ana ko ese ko iyakang u Israel, dang apang binatang papal᷊iharang ko ese ko kahimotongange nipahana, e'e ko koa-Ku.”
Putatinaungang u boroti takoae kaboe
3I Musa nangul᷊i su bangsa Israel, “Su silou i'i Mawu nul᷊iu ngi kumu dingang u kawasang-E ko l᷊abo, hakiu i kumu botonge nusumuwang bou Mesir, tampa i kumu niputahul᷊ang. Ual᷊ingu e'e, tinaunge l᷊ou i'i l᷊ai, kumbahang kumang boroti ko pia kaboe. 4Su silou i'i, tanggali kahimotongange wul᷊ang abib arako wul᷊ang kahimotongange, i kumu nanintang soa ngu Mesir. 5Dingang u nutewa Mawu nudiandi si upung i kumu guna ngu manarakang si kumu Soa ngu bangsa Kanaan, Het, Amori, Hewi dang Yebus. Suapang Mawu numbawa si kumu sarang soa ko kala dang matawa e'e, sintinia taung su wul᷊ang Abib, i kumu mambeng mukoa upacara i'i. 6Pitu l᷊ou l᷊iwuenge i kumu botonge kumang boroti ko takoae kaboe, dang su l᷊ou kapitunge mambeng pukoa putatinaungang guna ngu mamantughi Mawu. 7Pitu l᷊ou l᷊iwuenge i kumu ta botonge kumang boroti ko pia kaboe, dang kaul᷊i u soa ngi kumu ta botonge pia kabo arako kang ko pia kaboe.
8Su tita u parayaang e'e i kumu mambeng muwuke su ana u kol᷊aese himoneu kaul᷊i u e'e ko seng nikoa u Mawu si kumu su tempo ngi kumu nanintang u wanua ngu Mesir. 9Putatinaungang u i'i makoa l᷊aingati si kumu kere tatia niiki su l᷊ima arako su ruhu u. Putatinaungang i'i makoa putatinaungang si kumu tadeau turusi musigho dang mangundung manga parenta ngu Mawu, watu'u Mawu nupasuwang i kumu bou Mesir dingang u kawasang-E ko l᷊abo. 10Wantughiko sal᷊iwang e'e su sintinia taung su tempo ko nitantu.”
Ana ko iyakang
11I Musa nangul᷊i su bangsa Israel, Mawu sarung mangunturi si kumu sarang wanua ngu Kanaan ko nidiandi-Nge dingang tewa si kumu dang si upung i kumu. Suapang tana e'e mariadi koa i kumu. 12#Luk. 2:23I kumu mambeng mangonggo sasumba apang ana ko ese ko iyakang dang apang binatang papal᷊iharang ko ese ko kahimotongange nipahana. Kaul᷊i u e'e ko koa u Mawu, 13kateho apang keledai ko ese ko kahimotongange nipahana mambeng tubusang bou Mawu dingang mangonggo sasumba ana u domba simbau kere ghaghantinge. Kamangkeng i kumu mandiri manubusi keledai e'e, l᷊ehie mambeng ibare. Apang ana i kumu ko iyakang ko ese mambeng tubusang. 14Kamangkeng su l᷊ou samuringe ana u mukina apa mangal᷊enge kaul᷊i u e'e i kumu mambeng simbahi kiri'i, “Dingang u kawasa ngu Mawu ko l᷊abo numbawa si kite nusumuwang bou wanua ngu Mesir, tampa i kite niputahul᷊ang. 15Su tempo ngu ratu Mesir nukitihi dang ta nupakawala ngi kite l᷊umal᷊eng, Mawu ta namala puwiahi apang ana ko iyakang ko ese su Mesir, maning ana u taumata kere'e l᷊ai ana u binatang. E'e sabapie i kite manumba su Mawu apang binatang ko ese ko kahimotongange nipahana, kateho i kite manubusi manga ana i kite ko iyakang. 16Narang e'e, makoa putatinaungang si kite musul᷊ung tatia ko kal᷊aiki su l᷊ima arako su ruhu i kite. Dingang kere'e i kite sarung tatapi nitanatang himoneu Mawu seng nupasuwang i kite bou Mesir dingang u kawasa ko l᷊abo.”
Rihi winawa l᷊au u rihi putung
17Suapang ratu ngu Mesir namilo u bangsa Israel nusumuwang, Mawu Ruata ta numbawa si sire nul᷊umiu l᷊al᷊eng ko sumahe wanua ngu Filistin, maning l᷊al᷊eng e'e ko masandighi. Mawu Ruata nusipiri, “Kumbahang manga taumata e'e musisili boko makawua himoneu i sire mambeng muparang, bou e'e i sire sau musul᷊e sarang Mesir.” 18Ual᷊ingu e'e Mawu Ruata numbawa si sire bou l᷊al᷊eng mul᷊iku l᷊umiu tana l᷊inggi matupasi u l᷊auri u Gelagah. #13:18: l᷊auri u Gelagah: Tuhunge 10:19. Su tempo nanintang u Mesir, manga taumata ngu Israel e'e pia aghiri musul᷊ung u muparang.
19 #
Kar. 50:25; Yos. 24:32 I Musa numbawa manga duhi ngi Yusuf, watu'u su tempo i Yusuf wiahi nundoi taumata ngu Israel putewa tadeau pukoa kere'e. Kiri'i tatanata ngi Yusuf, “Su tempo ngu Mawu Ruata mupakal᷊iu ngi kumu, bangkeku mambeng wawa i kumu bou tampa i'i.”
20Taumata ngu Israel nanintang u Sukot dang nuraseng su soa ngu Etam su wiwihi u tana l᷊inggi. 21Su tempo l᷊ou Mawu nul᷊umal᷊eng su tingo ngi sire su l᷊al᷊ung u rihi winawa dang su tempo huwi I Sie muhoro si sire su l᷊al᷊ung u rihi putung guna ngu manibo l᷊al᷊eng. Dingang kere'e i sire botonge l᷊umal᷊eng l᷊ou dang huwi. 22Su kanandu u l᷊ou rihi winawa ene su tingo ngu bangsa e'e dang su kanandu huwi u rihi putung mahundingang i sire.
Currently Selected:
SASUWANG 13: PLT
Highlight
Copy
Compare
Share
Want to have your highlights saved across all your devices? Sign up or sign in
