SASUWANG 12
12
Putatinaungang l᷊ou ngu Paska
1 #
Im. 23:5; Rek. 9:1-5, 28:16; Sau. 16:1-2 Mawu nuhengetang si Musa l᷊au i Harun su tana Mesir. Angkunge, 2“Wul᷊ang i'i makoa wul᷊ang kahimotongange bou rekenang u taung i kumu. 3Habariko parenta i'i su kaul᷊i u umati Israel: su tanggali mapul᷊o wul᷊ang i'i apang kol᷊aese muhata ana u domba simbau guna ngu kinaseng singkahindo u walaghenge. 4Kamangkeng tataho u walagheng e'e tumaniu singkodo manginsue ana u domba simbau, inau walagheng e'e l᷊au l᷊ampunge ko masasandighi botonge singkahindo kumina ana u domba e'e. Ana u domba e'e mambeng ipahia tumuhu ul᷊i u taumata ko kumang. 5I kumu botonge mamile domba arako kambing, kateho mambeng ko ese, umurie sintaung, dang takoae kurange. 6I kumu mambeng mundeso sarang tanggali mapul᷊opa. Su l᷊ou e'e, su wawul᷊aenge, kaul᷊i u umati Israel mambeng muhata ana u domba e'e. 7Singkodo dahange mambeng iwuha su rihi darua su tukari dang su konseng u tukari u wal᷊e tampa i sire kumang. 8Huwi e'e l᷊ai ghisinge mambeng ipanggang dang kinaseng dingang u duku mapai l᷊au u boroti ko takoae kaboe. 9Ana u domba e'e mambeng ipanggang tiwatu, dingang u timboe, l᷊aeri l᷊au u tataho u tiange. Kina ko ghisinge ko mbuae nitongka e'e kumbahang pia ko kinaseng tamata arako nitung. 10Kumbahang mal᷊umbei ghisinge e'e sarang singkodo murating mal᷊ukari, kamangkeng pia l᷊umbeinge, mambeng itongka sarang pakasue. 11Su tempo ngu kumang i kumu mambeng seng mbuae nangahusi nasuku guna ngu l᷊umal᷊eng, dingang u l᷊aumping u l᷊aeri l᷊au u tiking su l᷊ima. I kumu mambeng kumang pakasahawu-hawu, ko e'e putatinaungang u Paska guna ngu mangadati si Sia Mawu.
12Su huwi e'e Ia sarung mul᷊iku kaul᷊i u tana ngu Mesir, dang ta mamala nipuwiahi kaul᷊i u ana ko ese ko iyakang, maneng taumata, arako l᷊ai binatang. Ia sarung muhukung kaul᷊i u mahang mawu su Mesir, ual᷊ingu Ia ko Mawu. 13Daha ko ene su tukari u wal᷊e ngi kumu sarung mariadi tatia ngu manga wal᷊e katanakeng i kumu. Kamangkeng Ia makawua daha e'e, i kumu Daku il᷊iu dang ta Daku silakateng su tempo ngu Ia muhukung u Mesir. 14#Sasu. 23:15, 34:18; Im. 23:6-8; Rek. 28:17-25; Sau. 16:3-8L᷊ou e'e mambeng tinaungang i kumu turusi sintinia taung.”
Putatinaungang l᷊ou ngu Boroti ko takoae kaboe
15 Mawu nuhengetang, “Pitu l᷊ou kal᷊iwuenge i kumu ta botonge kumang boroti pia kaboe. Su l᷊ou kahimotongange kaul᷊i u ragi mambeng pasuwang bou wal᷊e ngi kumu, watu'u kamangkeng su l᷊al᷊ung u pitu l᷊ou e'e singkatau kumang boroti pia kaboe; i sie ta botonge l᷊ai tuhungang kere tataho u umati-Ku. 16Su l᷊ou kahimotongange, dang l᷊ai su l᷊ou kapitunge, i kumu mambeng mukomol᷊i munggaweti. Su l᷊ou e'e i kumu ta botonge muhal᷊i manga apa l᷊ai, su l᷊ikuri ko ipake kere manadia kang. 17Su l᷊ou e'e kaul᷊i u kawanuangu Daku wawaneng sumuwang bou Mesir. Ual᷊ingu e'e turusi, sintinia taung, l᷊ou e'e mambeng tinaungang i kumu kere l᷊ou ko l᷊abo. 18-20Su wul᷊ang kahimotongange, manita su tanggali mapul᷊opa huwi, sarang tanggali duampul᷊onsau huwi, i kumu ta botonge kumang boroti ko pia kaboe. Su kal᷊iwuengu pitu l᷊ou e'e kaul᷊i u ragi mambeng pasuwang bou wal᷊e ngi kumu. Taumata ngu Israel arako taumata ngu raghi ko kumang boroti pia kaboe su kal᷊iwuengu putatinaung e'e, ta irekeng kere tataho u umati-Ku.”
Paska ko kahimotongange
21I Musa nukui kaul᷊i u pangaha u Israel dang nangul᷊i si sire, “Tamaiko dang pangal᷊ako guna ngu walagheng u ana u domba simbau guna ngu putatinaungang u Paska. 22Pangal᷊ako hisop simbukisi, l᷊awuko su l᷊al᷊ung u basi ko pia tahoe#12:22: unoko su l᷊al᷊ung u baskom ko pia tahoe arako piloko e'e su wawo u konseng u tukari, itaka dingang u … daha ngu domba e'e, bou e'e laburiko su rihi darua su tukari dang su konseng tukari u wal᷊e ngi kumu, sarang mal᷊ukari kumbahang maning singkatau bou tal᷊oara i kumu manintang u wal᷊e. 23#Ibr. 11:28Su tempo ngu Mawu mul᷊iku soa i'i guna ngu ta mamala wiahi manga taumata ngu Mesir, Mawu sarung mutuhung daha su rihi darua dang su konseng su wawo u tukari u wal᷊e ngi kumu, kuteu I Sie sarung kitang sumahe dang ta mupakawala ngu Malaikati u papate sumu su wal᷊e ngi kumu tadeau mamate si kumu. 24I kumu dang manga ana i kumu mambeng tumuhu parenta e'e sarang kal᷊iwuenge. 25Kamangkeng i kumu seng sumu su wanua ko nidiandi ngu Mawu si kumu, i kumu mambeng mukoa upacara i'i. 26Kamangkeng manga ana u mukina, ‘Apa mangal᷊enge upacara e'e?’ 27I kumu mambeng simbahi, ‘I'i sasumba ngu Paska guna ngu mangadati Mawu, watu'u wal᷊e ngu manga taumata ngu Israel su Mesir nil᷊iu-E, su tempo I Sie ta namala nipuwiahi manga ana ko ese ko iyakang tau Mesir, dang i kite niwala-E wiahi!’ ”
Kuteu manga taumata ngu Israel nusuba dang nanumba. 28Bou e'e i sire natamai dang nukoa apang ko niparenta ngu Mawu si Musa l᷊au si Harun.
Manga ana ko iyakang ta niwala nipuwiahi
29 #
Sasu. 4:22-31
Su huwi l᷊al᷊ung e'e Mawu ta namala nipuwiahi kaul᷊i u ana ko ese ko iyakang u bangsa Mesir, manita bou ana u ratu, sarang nurating u manga ana u taumata hukumang su tutupang. Kaul᷊i u binatang papal᷊iharang ko wuhue kahimotongange nipahana mang l᷊ai nipate. 30Su huwi e'e ratu, manga mapapangkati dang kaul᷊i u taumata ngu Mesir nuwangung. Su kal᷊abo u soa ngu Mesir nikaringihi tingihi u kahuang ko mauha, watu'u takoae sarang simbau wal᷊e ko ta nikapate ngu singkatau ana ko ese. 31Sihuwi e'e l᷊ai, ratu nukui si Musa l᷊au si Harun dang nangul᷊i, “Tamaite bou i'i, i kumu kaul᷊ie! Tintangte soaku, dakoe panumba Mawu Ruata ngu kere ko nipundokang i kumu. 32Wawaete kaul᷊i u sapi, domba, dang kambing i kumu, dang tamaite! Pundoko l᷊ai al᷊amati guna ngu ia!”
33Taumata ngu Mesir nanahoso taumata ngu Israel tadeau pakasahawu manintang u soa e'e. Angkung i sire, “I kami kaul᷊ie sarung mate kamangkeng i kumu ta matamai!” 34Bou e'e apang taumata ngu Israel nangal᷊a manga pantisi sire ko tahoe boroti seng bou nil᷊au ko takoae kaboe nipikung dingang u heka, dang nipasange. 35#Sasu. 3:21-22I sire l᷊ai seng nukoa kere ko niul᷊i i Musa, ko mundo l᷊al᷊ighahi wul᷊aeng dang sal᷊aka dingang u pakeang bou taumata ngu Mesir. 36Mawu nukoa taumata ngu Mesir mal᷊ondo naunge su taumata ngu Israel. Hakiu i sire nangonggo patiku ko ipundokang u taumata ngu Israel. Dingang l᷊al᷊eng e'e taumata ngu Israel numbawa kakakala u taumata ngu Mesir nusumuwang bou soa e'e.
Taumata ngu Israel nanintang u tana Mesir
37Taumata ngu Israel nuwua l᷊au nul᷊umal᷊eng bou soa ngu Raamses sarang soa ngu Sukot. Ul᷊i i sire nunguhasu su hiwunge su kataunge, ta narekeng kowawine l᷊au u manga ana. 38I sire numbawa manga sapi maul᷊i, domba l᷊au kambing. Maul᷊i l᷊ai taumata ngu raghi nutumuhu. 39I sire nutongka boroti ko takoae kaboe ko niwawa seng bou nil᷊au i sire bou Mesir. I sire niuseri bou pai e'e singkahuwi u kere'e kaehonge, hakiu ta nakarea tempo nanadia sinasa.
40 #
Kar. 15:13; Gal. 3:17 Bangsa Israel seng natana su Mesir pauhasutilumpul᷊o su taunge kal᷊iwuenge. 41Su l᷊ou panginsuenge su taung kapauhasu tilumpul᷊o su taunge e'e, kaul᷊i u ghapang u umati Mawu nanintang u tana Mesir. 42Huwi e'e Mawu turusi kapundiagae guna ngu mangunturi si sire sumuwang bou Mesir. Dang e'e l᷊ai huwi ko turusi isumba su Mawu kere huwi putatinaungang. Su sihuwi e'e umati Israel mambeng mundiaga.
Atorang u putatinaungang u Paska
43 Mawu nuhengetang si Musa l᷊au si Harun, “I'i atorang u putatinaungang u Paska. Taumata ngu raghi ta botonge kumina ghisi ngu domba ko isumba su l᷊ou ngu Paska. 44Kateho l᷊ang ko nil᷊uangeng i kumu botonge l᷊ai tumuhu kumina, kamangkeng i sie mbuae nisunati. 45Taumata ngu raghi arako taumata ngu mantrosi ta botonge kumang. 46#Rek. 9:12; Yoh. 19:36Kaul᷊i u ghisi ngu domba e'e mambeng kinaseng su l᷊al᷊ung u wal᷊e, dang ta botonge wawaneng sarang l᷊ikuri, kumbahang mamare sarang simbau duhinge. 47Kaul᷊i u umati Israel mambeng mupakarame ngu sal᷊iwang e'e. 48Taumata ko ta nisunati ta botonge kumang kang u sal᷊iwang e'e. Kamangkeng singkatau raghi seng natana tatapi dingang i kumu mo mupakarame ngu Paska guna ngu mamantughi si Sia, Mawu, kaul᷊i u taumata manga ko ese su l᷊al᷊ung u walaghenge mambeng lebe horo isunati. Bou e'e i sire irekeng kere taumata ngu Israel tutunge, dang botonge tumuhu putatinaungang u paska. 49Atorang ko musul᷊ung mariadi guna ngu taumata Israel tutunge l᷊au u taumata raghi ko natana tatapi su tal᷊oara i kumu.” 50Kaul᷊i u taumata ngu Israel mararingihi l᷊au u mukoa kaul᷊i u apang ko niparenta ngu Mawu si Musa l᷊au si Harun. 51Su silou e'e Mawu numbawa kaul᷊i u umati Israel nusumuwang bou Mesir.
Currently Selected:
SASUWANG 12: PLT
Highlight
Copy
Compare
Share
Want to have your highlights saved across all your devices? Sign up or sign in
