SASUWANG 11

I Musa namatehi papateng ana ko iyakang

1 Mawu nangul᷊i si Musa, “Ia sarung mupakanawo u simbau silaka l᷊ai su ratu ngu Mesir dingang kawanuange. Bou e'e, i sie sarung mamilo i kumu matamai. Nangilembo i kumu kaul᷊ie sarung itokol᷊i bou i'i. 2Ual᷊ingu e'e pudidatoko dingang u bangsa Israel; roiko i sire pundo l᷊al᷊ighahi wul᷊aeng l᷊au sal᷊aka bou l᷊ampung i sire.” 3Mawu nupakal᷊ondo naung u taumata ngu Mesir su taumata ngu Israel. Dang i Musa nakoa taumata ko l᷊uadateng u manga mapapangkati l᷊au u kaul᷊i u kawanua ngu Mesir.

4I Musa nangul᷊i su ratu, “Kiri'i angkung u Mawu, ‘Patehang manga kal᷊oarange Ia sarung l᷊umal᷊eng su tana Mesir. 5Apang manga ana ko ese ko iyakang su Mesir sarung mate, manita bou ana u ratu ngu Mesir sarang murating ana u l᷊ang kowawine ko munggiling gandung. Ana u binatang papal᷊iharang ko kahimotongange nihana bou kaul᷊i u binatang sarung mate l᷊ai. 6Su kaul᷊i u Mesir sarung ikaringihi tingihi u sangi ko mauha, kere ko mborong ta nariadi dang ta sarung mariadi l᷊ai. 7Kateho su komol᷊ang u tau Israel, maneng taumata arako binatang papal᷊iharang ta sarung sal᷊ukateng. Inau i kumu sarung matitong himoneu Ia, Mawu, mukoa putatintangeng su tal᷊oara u taumata ngu Mesir l᷊au u taumata ngu Israel.’ ” 8Panginsuenge i Musa nangul᷊i, “Kaul᷊i u mapapangkati i Tuangku sarung sumongo dang musuba su tingoku dang mundo tadeau ia dingang u bangsaku manintang u soa i'i. Bou e'e ia sarung matamai.” Bou e'e i Musa nuwawal᷊uang kahingang dang nanintang u ratu.

9 Mawu nuhengetang si Musa, “Ratu e'e ta sarung mundaringihi didatongu, tadeau Ia botonge mukoa tatia ko makal᷊aherang nangilembo maul᷊i su kaul᷊i u Mesir.” 10I Musa l᷊au i Harun nukoa kaul᷊i u tatia ko makal᷊aherang e'e su tingo ngu ratu, kateho Mawu nupakitihi naunge, hakiu i sie ta mupakawala ngu taumata ngu Israel manintang u soae.

Currently Selected:

SASUWANG 11: PLT

Highlight

Copy

Compare