Kolasiis 3

Beeɗit Sinɔ Tɔɔnuk Keresee

1Agut sinɔkan ŋaararkiɗɔ ret walasa a Keresee agut omoŋɔŋk, nɛ in ɗɛyɛɛ a ɓaŋkawuŋ ola sigɛ atu dari rakaayk sinaanɛ beeɗiiɗ Kerese ɗiɗikakɛ Waakoyotoŋkuk. 2Nɛ in koɓiikɛɛ agut ola sigɛ atu darik, ma kat koɓiikɛɛ agut ola sigɛ atu ɗookuk. 3Agut sinɔ rɛrariɓa nɛɓa dugiɗi wɛɛŋa goŋk a Keresee agut omoŋ sooy lak Waakoyok. 4Saakoy yaaŋɛɗ ɛɛk Kerese sinɛ wɛɛŋa goŋkuk, nɛkoy ɓɔrɛ kɔnu yaaŋɛɛ a sɛɛn agut omoŋ eemɛyɔɔn.

Beeɗit Sinɔ Tɔɔnuk A Sinɛɓa Bɔɔlɔŋk

5In ɔɔyɛɛ tikiyɛ sigɛ laŋɛɛ beeɗit noŋk baŋɛ, sɛɛg sigi ruunyikeen, a somikeen, a molkotɔn, a ɗɛyan sinɔ ŋɛɛwɛnŋɔŋk, golɛ sinɔ ugumeeɗɛ raŋaawotakaak. 6Mɛlkikoy goopan Waakoyotoŋk agut joop sigɛ ijaagir ola sigik. 7Beebeɗariɓa ɓɔrɔ jeemɛ aɓa ijajagari ola sigi saaɓa atukuɗɔ joope sigɔɔgɛ kir tiiɗitik kɔɔrk.

8Mayakana sisɔ in ɔɔyɛɛ ŋadi, a buudɛ, a ɗɛgɛ, a laganyɔn, nɛ kat tonɛɛ any sinɔ lagiɗɛɛ keenyk. 9Kat totonɛɛ nyon ɛkanɛɛkɛ goŋk, agut sinɔ karkartariɓa ɓɛɛl ɛɛk sinɛɓa bɔɔlɔŋk a ijaag nɛɛk agut omoŋ, 10kadiirkɔ ɓɛɛl ɛɛk sinɔ tɔɔnuk sinɛ arɛɛ a tɔɔn ɓɛɛnyɔwɛ gɛɛŋk baŋɛ ɗegerɔɔnuk a gayi a Waakoyok sinɛɓa riiɓiik. 11Ant sineene kɛɛ pakakat joope sigɔɔgɛ moko Ayuuduk a joope Ayuuduk, a joope sigɔɔgɛɓa yayawɛɛŋɔŋk a sigɔɔgɛɓa kɛ yayawɛɛk, a joope sigɔɔgɛɓa kir gayɛ a sigɔɔgɛɓa gayɛrŋɔŋk, a joope sigɔɔgɛ laaŋoyeerk a sigɔɔgɛ atu yaakaatik kɔɔr. Keresee baŋɛ, beeɗ joope baŋɛ.

12Iinak joop Waakoyotoŋk sigɔ geetitaanakik sigɛɓa kɔnu poru nɔɓa kɔnu daam ɛɛka nɛɛkaakik, agut sini in kadɛɛ sinɔ kɔna sanɗiiɗ joopk, a mentanka, a rikiteet ɛɛkoŋk, leemikeen, a ɓaŋkaawurɔɔn oolaanik. 13In ɓaŋkaawurɛɛ oolaan ɛkanɛɛkɛ goŋk, ɔkɔnkɔ iinakɛ iɗit omaay tike mɛɛnoŋ, nɛ in ŋɔŋɔɗiirɛ ɛkanɛɛkɛ goŋk. In ɓɔrɔ ŋɔɗiirɛ oko sinɛɓa kɔne ŋɔɗiitarkiɗ Kereseek. 14Sigeege baŋɛ, in kadɛɛ mɛyin sinɔ tuse ola baŋɛ sinɔ laŋiiɗɛɛ omaayikeenik. 15Nɛ in obulur bɔdɛɛɗ ɓayɛtunɛɛkɛ goŋk. Riyɛɛɓa kɔnu a iinak nyonitaak ɛɛk sinɔ omoŋɔŋk agut bɔdɛ sini. In pɔɔsɛɛ Waakoyo. 16Nɛ in lakɛ Pɛɛni Waakoyotoŋk a enyaaŋ beeɗit noŋk baŋɛ, iinakɛ in iɗit omaay rɔɔriy mɛɛno ɗegerɔɔn baŋɛ ɛ koykoyɛɗ. In iiliyakɛ a pɔɔsɛɛ Waakoyo ɓayaay iiliyaakɛ, a tukuun, a iiliyaakɛ dooyanoŋk. 17In ijaagɛɛ tiriyaakɛ Suumi Yeeseek any sinɛ ijaagiirik baŋɛ, a pɔɔsɛɛr Waakoyo Ɛpɛn eteŋka goy nɛɛkɛk, kɛygun pɛɛnii kɛygun ijaag.

Joop Wɛy Dooytaanakoŋk

18Iinak jartiyatɔk, in tiiɗikɛɛ babuyka goŋk agut sinɔ tiyaan any sinɔ liki Suumiyaak. 19Iinak babuyk, in porɛɛ jartiyatɔ goŋk, kat laaŋoyɛɛ sɛɛg. 20Iinak tɔɔmɔk, in tiiɗikɛɛ bɔɔlɔŋeera goŋk ant baŋɛ agut sinɔ ege sini any sinɔ yaa Suumiyaak.

21Iinak bɔɔlɔŋeer, kat lowɛɛ tɔɔmɔk goŋk a goopari sɛɛgiŋ kɛnɔ kat badɛr sɛɛge ŋaadiyɛ gɛŋk. 22Iinak laaŋoyeer, in tiiɗikɛɛ suumiyɛɛka goŋk ɗookoŋk ant baŋɛ, moko tiiɗikari kɛnɔ dɛnɛr joop nɔ yaa sɛɛga, ma tiiɗikari a ɓureer Suumi Yeesee ɓayaay sinɔɔnɛ ɓɛɛl kɛ ɗɔmk. 23In ijaagɛɛ any sinɛ ijaagiirik baŋɛ ɓayaay a yaakaat a ito ijaagɗigiɗɔ Suumi Yeesee, ma moko ijaagɗigiɗɔ iɗit. 24In ɗegerɛ kɛ gaɓɛkoy Suumii any sinɛɓa ŋɔɗɛɛk ruukeetoŋk. Agut sinɔ ijaagɗiɗɔ Suumi Kereseek. 25Iɗit sinɔ ijaag any sinɔ ŋɛɛwɛnŋɔŋk goopɛɛkoy agut ijaag nɛɛk any sinɔ ŋɛɛwɛnŋɔŋk, agut sinɔ kɛɛ pakaatan sooy lak Waakoyok.

Currently Selected:

Kolasiis 3: KSTM

Highlight

Copy