Kolasiis 2

1Ɗɛya kɛnɔ ɗegerari kɛ obi a ɛtɛ ɛk ɗɔŋkɔɔlɛ sinɛ lakaak agut iinak a joop sigɛ atu katamɛɛ Lodokiyaak a sigɛ kanti kir taanta nɔtu ɗegerark. 2Ara ɗɔŋkɔɔlɛ kɛnɔ ɓaŋkaawurar ɓayɛtun gɛŋk kɛnɔ sɛɛg omoŋ mɛyin ɛ kɛnɔ latu koɓi sinɔ daktank baŋɛ sinɔ ŋaaŋayikŋɔŋk, kɛnɔ degerar Keresee sinɛ dugtan Waakoyotoŋk. 3Dugiɗiɓa sooy lak sɛɛnik ɗegerɔn sinɔ kiiɗɛ sukuk a ɗegerɔn ɛɛkoŋk baŋɛ.

4Nɛkɔna tona sini kɛnɔ kat lakɛ iɗit sinɔ kɔnu taɓu pɛɛni raamiyɛɛkoŋk. 5Kɛygun aasi kɔne yowɛrkaaya taareeŋ, ma wɛɛŋakɛ eet a iinak agut omoŋ. Yaata saa dɛnɛɛɗa beeɗit noŋk sinɔ ɓɛɛlɛ kɛ ɗɔm a ŋaadiyɛ sigɛ ɓaŋkaawarŋɔŋk latukarkiŋ.

Wɛɛŋa Sigɔ Laŋɛɛ Kereseek

6Oko sinɛkan dooyɛrɗɔ Suumiya noŋk Yeese Kereseyaak, nɛ in beeɗɛɛ a sɛɛn agut omoŋ, 7in gaɓɛɛ tiltilɛ sɛɛne, ɛ kɛnyɛɛ beeɗit noŋk sɛɛne, in beeɗɛɛ a ɛtɛɛ ŋaadiyɛɛkɛ a ɓaŋkawuŋ oko sinɛɓa kɔnu rɔɔriyɗɛɛk. In wideerɛɛ pɔɔsiyɛ sigɔ ɓɔɔkaaŋɔŋk.

8In koorɛɛ ɛɛk kɛnɔ kɔnu kat ari iɗit omaay a babadariŋ ɗegerɔɔn nyonoŋk a raamiyɛɛkɛ kanysɛyaak. Ege sini rɔɔriyɔn sinɔkan kus barɛɗ etoŋk a ɗookoŋk, ma mokokan kus sooy lak Kereseek. 9Lakɛ Keresee sinaanɛɓa kadi buusɛk kalbi Waakoyotoŋk sinɔ enyaaŋɔŋk. 10Laŋiirkan enyaaka wɛɛŋakoŋk Keresee, sinaanɛ sɛɛn ɔɗɔ tapaakoŋk baŋɛk a Suumiyɛɛkoŋkuk.

11Yayawɛɛɓa kɔnu agut sinɔɓa ŋaadiɗiɗɔ sɛɛnek, yawɛ noŋk sini kɛnɔ aalɛɛ Keresee ɓɛɛl buusɛ sinɛ tikitank, ma moko yawɛ sinɔɓa ijaagɛɛ ariit etoŋkuk. 12Saaɓa kɔnu aadiiɗɛk nɛɓakɔnu kɔɔwɛ a Keresee agut omoŋ. Nɛɓa ŋaararkɔ ret walasa a sɛɛn agut omoŋ, nɔɓa ŋaararkiɗɔ ret walasak agut sinɔɓa ŋaadiɗiɗɔ ɓaŋkawukaat Waakoyo sinɛɓa boŋku Keresee ret walasak. 13Iinakɓa reteer agut tikiyɛ goŋk ɛ agut sinɔɓa kɔnu kiiɗɛ yawɛɛɗ buusɛɛ noŋk a ŋaadiir Kereseek. Yakanakɔɓɔ sisɔ ari kɔnu Waakoyot a iinak bɔdtaanak a Keresee agut omoŋ. Ɛɓa kɔne ŋɔɗur tikiyɛ goŋk baŋɛ. 14Aalɛɓa sɛŋk asɛ taapiyɛ higiyoŋk sinɛɓa tina daririyk ɛɓa tin ɓooɓoyk. Ɔɔyɛɛrɓa tine nɛɓa laalawu laalawutant raŋk. 15Oko sinik lɔsɛɓa Sɛŋk tapa a suumiyɛ a karkarir sɛɛge ɓaŋkawuka nɛŋk, nɛɓa yaaŋɛ lɔsɛ nɛɛk goy laalawutan nɛɛkik joopa ɗookoŋk baŋɛ.

16Nɛɓɔ sisɔ kat lakɛ iɗit sinɔ kɔne pɛrɛdɛ agut ɗama maŋk tuu, maŋk agut sinɔ kirɗɔ eemɛyɔɔn ba'aalak, maŋk ba'aal ɛyɛn sinɔ tɔɔnuk, maŋk waawuy Sambatɛyoŋk. 17Ege ola sigi tipi ola sigɛkoy mɛlɛrkik, mayakana laŋɛɛ eekeer gɛɛŋk Keresee. 18In koorɛɛ ɛɛk a kat lakɛ iɗit sinɔ kɔnu ari a dakɛɛr kanysɛya a meri ɛɛk koɓiiɗ nɛɛkɛ sinɔɔnɛ ɓɛɛlɛ kanysɛyaak a tonu kɛ laka pɛrkiyɛ a kɔnu ari kɛnɔ rikiteer ɛɛk ɛ ugumeer wosɛytaanakaak. 19Iɗit sinɔ ito sinik kiiɗɛ lalaŋ a Keresee sinɛ ɔɗɔ ɛɛkoŋkuk. Aawoy Waakoyot omaayikeen ŋaadtaanakoŋk oko ɗɛyan nɛɛk Keresee, oko sini tootokiiɗ nyonitaak ɛɛkoŋk baŋɛ meelatɛɛkɛ agut omoŋ nɔ ɓɔlɔɔrɛrɗik.

20Rɛrarikan a Keresee agut omoŋ, nɛkan kɔnu pakatiki barɛɗakɛ ɗoo sinik. Anɛ ɓalɗiikari sekiyɛɛka sigeega agut jikon? 21Sigɔɔga tonur kɛ, "Kat gaamunk, kat lɛɛlɛmunk, kat ɓeesink." 22Ege sigi sekiyɛ a rɔɔriyɔn ijaag etoŋkuk, nɛ ijaagɗi ɔɔtɛya sinɔɔna balaaŋɔŋk nɛkɔɔ badɛr sisa. 23Ola sigi dɛnɛɛ a ito latu ɗegerɔn ɛɛkoŋk agut sinɔ tukerkiɗ ugumeet ɔɔtɛ nɛŋk, a rikiteet ɛɛkoŋk, a laaŋoy ɛɛkoŋk, mayakana kɛɛ sɛɛge tɔkɔny oko sinɛ koɓurɗu koɓi a ɗɛyan taaroŋkuk.

Currently Selected:

Kolasiis 2: KSTM

Highlight

Copy