Kolasiis 1

1Ege sini wargatɛ sinɔ taapiɗirii eteŋk Paawuloos a manya eteŋka Timotiyoos, sinɛ wosɛytan Yeese Kereseek ɗɛyaan Waakoyotoŋk, 2manyaakaka eteŋka sigaaga geetitaanakik ɛ ŋaadɛɛ sɛɛg Kereseek sigaaga beeɗir Kolasiiseek, in kɔna dakɛ a wookan a bɔdɛ sooy lak Ɛpɛn eteŋka Waakoyok.

Ɗanɗamɔn Pɔɔsiyɛɛkoŋk.

3Pɔɔsii Waakoyo sinɛ Ɛpɛn Suumiya naŋk Yeese Kereseyaak ɓɛɛnyɔwɛ gɛɛŋk baŋɛ, saa ɗanɗamaaɗii agut iinakikiŋ, 4agut sinɔ tiyiikan ŋaadiyɛ sigɛ latukarik Yeese Kereseek, a mɛyin sinɛ porurɗɔ joop Waakoyotoŋk baŋɛkiŋ. 5Tiyɛɛrkan saakan mɛlɛrkiɗ tuki nɛɛkɛ ŋaadiyɛ sigɛ kookorarik son lak iinakik eekeer Pɛɛni sinɔ Ɓɛlkɛɛstankiŋ, agut sini ŋaadiyɛ goŋk a mɛyin noŋk tukɛɛɓa ŋaadiyɛɛkɛ a ŋaadiyɛɛkɛ sigaagɛ kookorarik raŋk sigaagɛɓa ragadkuunɛɛ nɔkɔnu kookorarkun darik. 6Mɛlɛɛrɓa sini son lak iinakik tuki nɛɛkɛ a tukiɗi saaɓa tiyɛrɗɔ kɛ ɗɔm Pɛɛni sinɛ Ɓɛlkɛɛstank kɛ ege wookan Waakoyotoŋk eekeerk nɛ gaɓɛ taamɛ ɛ ɓɔlɔɔrɛ ɗook raŋk, oko sinɛ gaɓɛɛɗ taamɛ ɛ ɓɔlɔɔrɛɗ iinakɛ kɔɔrk. 7Tonuɓa kɔna Epaapira Pɛɛni sinɔ Ɓɛlkɛɛstankiŋ. Sɛɛn sinɛ poriik ɛ laaŋoyen sinɛ ŋaadɛɛk ɔɔtɛ naŋkik. 8Ɛɓa tina tonu ɔɔtɛ sinɛ poporiiɗɔ ɛkanɛɛkɛ goŋk Wɛɛŋakɛ Waakoyotoŋkuk. 9Kiiɓa yawɛɛɗ ɗanɗamɔn a kalɛy Waakoyotoŋk agut iinak kɛnɔ ɗegerari adaktan ɗɛyan Waakoyotoŋk ɗegerɔɔn sinɔɔnɛ kɔna gaɓɛr Wɛɛŋa sigɔ Geetitaanakik, 10ɛ ɗanɗamaakii kɛnɔ beeɗiir oko sinɛ ɗɛyɛɛɗ Waakoyotuk nɔ ariir Suumi a yaageeɗ olaatɛ baŋɛ, kɛnɔ kɔne laŋɛɛ taamɛ ijaag any sinɔ mentanŋɔŋk a ɓɔlɔɔrɛɛr a ɗegerari Waakoyo. 11In kɔna gaɓɛ Waakoyot ɓaŋkaawurɔn ɓaŋkawukaat nɛɛkɛ sinɔɔnɛ obiiŋɔŋk enya eemɛyɔnk, in kɔnu ari a ragadiir ɛɛk yaakaat nɔ oolɛɛr any baŋɛ ɓaŋkaawurɔɔn oolaanik. 12In pɔɔsɛɛ Waakoyo yaakaat sinaanɛɓa kɔnu ari a gayɛɛr kɛnɔ iinak kaastaanak any sinɛkoy boŋur joop sigɛ geetitaanakik sigɛ atu burɛɛ pɛɗɛrkaatoŋk. 13Ariɓa tin a ŋaarkii ɓaŋkawukaat nyuuguroŋk, ɛɓa tin ari a guugunyii burɛya Tɔɔn nɛɛkik sinɛ poruk, 14Eɓa tin ɓalkɛɛ sɛɛne, kɛnɔ laŋii tɔŋɔɗ tikiyɛɛkoŋk goy Tɔɔn nɛɛkik.

Obiika Kereseek

15Gayi Kerese a Waakoyo sinɛ kɛɛ taantak, ɛ sɛɛn sinɛ Obi ɛ tuktan olaatɛ sigaagɛɓa riiɓɛɛk baŋɛ raŋk. 16Agut sinɔ riiɓɛɛɓa ola baŋɛ sigɛ atu darik a sigɛ atu ɗook raŋk, a sigɛ dɛnɛɛ sɛɛgik a sigɛ kɛɛ taantak a tapa a joop sigɛ ɓalɗiik a suumiyɛ sigɛ boobɛrk a suumiyɛ baŋɛ sɛɛne. Riiɓeɓa Waakoyot ola baŋɛ sɛɛne ɛ sɛɛna. 17Ɓɛɛlɛɓa sɛŋk olaatɛ baŋɛ ɔɗɔɔkɛ, tootokiɓa olaat baŋɛ sɛɛne. 18Nɛ ege Kerese ɔɗɔ gode Sambatɛyoŋk sinɛ ɛɛk nɛɛkik. Agut sinɔ kɛnɔ dakɛ a tuktan olaatɛ baŋɛk, nɛɓa ɓɔrɛ ŋaarin ret walasak ɔɗɔwen ɛ Sɛɛn tuktan. 19Agut sinɔ poruɓa Waakoyot enyakaat kalbi nɛɛkik kɛnɔ beeɗ Keresee, 20taakiɓa ola sigɛ atu darik a ɗookuk baŋɛ a ɛɛk nɛɛk goy Kereseek. Ɗɔkuɓa bɔdɛ yɛrom Tɔɔn nɛɛkik sinaanɛɓa gupatɗiik laalawutant raŋk.

21Beeɗiirɓa jeemɛ a yowɛrkari Waakoyote a iinak gumaakeer gɛɛŋk agut ijaag noŋk a koɓi noŋk sinɔ ŋɛɛwɛnŋɔŋk. 22Mayakanaɓɔ sisɔ taakikan kɔnu ɔɔtɛ rer Tɔɔn nɛɛkik buusɛɛk, kɛnɔ kɔnu wiɗiki taamɛɛka Gɛɛnaak, ɛ kɔnu ari a iinak geetitaanakik, a kɔne kɛɛ any sinɔ lagiɗɛɛ keenyk. 23Nɔ ɓɛɛlɛɛɗ oko sinikik saa beeɗirɗɔ a nomɛrɗɔ ŋaadiyɛ goŋk sigɔ ɛtɛr nyon sinɔɔnɛ ɓaŋkawuŋɔŋk, a kiir wideeɗ ɛɛk ŋaadiyɛɛkɛ sigaagɛ kookorarik Pɛɛnii sinɔɔnɛ Ɓɛlkɛɛstank. Nɛ ege sini Pɛɛni sinɔ Ɓɛlkɛɛstank sinɛɓa tiyɛɛrik ɛɓa waasɛɛ olaata sigaaga atu ɗook raŋk, eet ɓɔrɛ Paawuloos sinɛkɔ daka a laaŋoyenk Pɛɛniya sineena Ɓɛlkɛɛstank.

Ijaag Paawuloosuk Godeya Sambatɛyoŋk

24Yaata sisɔ agut rakatɛ sinɛ laŋka agut iinakik buusɛɛ naakɛkik, agut sinɔ enyɛɛrakɔ any sinɛ bitak sɛɛnek rakatɛɛ sinaanɛɓa laŋkik agut gode Sambatɛyoŋk sinɛ ɛɛk nɛɛkik sinaanɛ kaasɛɗa rakatɛ Kereseek. 25Gaɓɛkanta Waakoyot ɔɗɔwikeen ijaag gode Sambatɛyoŋk kɛnɔ kɔna waasa Pɛɛni nɛɛk a kɛɛ sinɔ ŋɔɗaak. 26Ege sini dugtan sinɔɓa dugiɗi joope baŋɛ emeyika sigɔɔga ɓɔɔkaaŋɔŋk, mayakana sisɔ yaaŋɛ ɛɛk joopa sigaaga geetitaanak Waakoyotak. 27Yaaɓa Waakoyota kɛnɔ yaaŋɛ joopa gɛɛna dugtan sinɔ obiiŋɔŋk eemɛyɔnk kɛ obi a ɛtɛ ɛk joope sigɔɔgɛ moko Ayuuduk kɔɔr. Ege dugtan sini lak eemɛyɔn sinɔ obiiŋɔŋk sinɔ kɛ ar Keresee iinakɛ takik, nɛkoy kaasɛɛr eemɛyɔn Waakoyotoŋk.

28Waasii Keresee joopa baŋɛ a rɔɔrɔkaakii sɛɛga ɛ rɔɔriyii sɛɛg ɗegerɔɔn baŋɛ kɛnɔ joop baŋɛ ɓɔlɔɔrɛr Keresee. 29Bɔɔlaaka a ara ɗɔŋkɔɔlɛ kɛnɔ ijaaga sini agut sinɔte ijaagɗiiɗ tak ɓaŋkawuka sinɛkanta gaɓɛ Waakoyotuk.

Currently Selected:

Kolasiis 1: KSTM

Highlight

Copy