Pilipisiyoos 4

Rɔɔriyɔnak Sigɛ Pediyaak

1Iinak manyaakak eeta sigɛ kɔnu porak, ɛ kɔna laka ŋɔɗɔk, iinak sigɛ yaaka naakik, ɛ iinak sigɛ dooroy naak ruukeetoŋ. Agut sini in beeɗɛɛ a ɓaŋkaawurɛɛ Suumii.

2Kalɛya Ewodiyaa a Sintikii kɛnɔ taakiɗi ɛkanɛɛkɛ gɛŋk nɔ mɛyi Suumii. 3Ma ɓɔrɛ iin piraa naak ijaagoŋk sinɛ ŋaadɛɛk sinɛ arkin saayk, kalɛyaan kɛnɔ kɔnyun jartiyatɔk sigikan arir ɗɔŋkɔɔlɛ a eet kɛnɔ waasɛr Pɛɛni sinɔ Ɓɛlkɛɛstank, a Kɛlemintoos, a piraakak gaaŋk ijaagoŋk ɔgɔ sigɛɓa tapɛɛ tiriya gɛŋk Wargatɛɛ bɔdɛɛɗoŋkuk#4:3 See kɛ "Waargatɛ bɔdɛɛɗoŋk" wargatɛ sinɛkoy taapɛɛɗɛɛ tiriya joop sigɛkoy laŋir bɔdɛ sinɛkoy nɔkoy nɔkoyk.. 4In kɔna yaa Suumii ɓɛɛnyɔwɛ gɛɛŋk baŋɛ. Topa kɔna kɛkar kɛ, "In kɔna yaa." 5In ɗegerɛɛ mentanka noŋk joope baŋɛ. Wɔɔŋku Suumii a kɔɔ mɛlkiŋ. 6Kat ɓakɛyɗiikɛɛ agut any sinɛ ɓɛɛlɛk. In kalɛyɛɛ Waakoyo ɗanɗamɔɔn sinɔɔnɛ enyaɗ pɔɔsiyɛɛkik agut any sinɛ kɔna ɗɛyɛk. 7Ɔkɔn ijaagiir oko sinikiŋ, bɔdɛ Waakoyotoŋk sinɛ ar koɓiiɗ etoŋk baŋɛ rakaayk koorɛ ɓayɛtun goŋk a kalbiyɛ goŋk Yeese Keresee. 8Pediya iinak manyaakak eeta, in enya kalbiyɛ goŋk eekeerɛ a eemɛyɔɔn, a ɓɛɛlɛt kɛ ɗɔmk, a ola sigɔ mentaana, a yaagar, a porɛɛŋɔŋk. Ma ɓɔrɛ in koɓɛɛ sigɛ kaalɗiik baŋɛk sigɔ mentaanaŋɔŋk a pɔɔsiɗiigidɛɛŋɔŋk. 9In arɛɛ any sinɛkan barɛɛr eeteek, a sinɛkan boŋiirik, a sinɛkan tiyɛɛrik, a sinɛkan dɛnɛɛrik baŋɛ. Waakoyo bɔdɛɛɗoŋk a iinak agut omoŋ.

Pɔɔsiyɛ Agut Tigiik

10Yaata a pɔɔsa Suumi jɛt, agut sinɔkɔ tukerɗɔ koɓi rakatɛya naakaakik kɛkark. Ɗegera kɛ koɓiikari agut rakatɛ naak ɓɛɛnyɔwɛ gɛɛŋk baŋɛŋ, yakanakan kiir laŋiiɗ ɔɔtɛ sinɔ mentan nɔ yaaŋɛrɗɔ ijaag raŋk any sinɛkan koɓiirk. 11Ma ɓɔrɛ nɔ toniiɗa sinik moko sana any sinɛta ɗɛyɛ beeɗita naakaakik, baraakan saak sinɔ toniiɗa kɛ, "Gayɛta any sinɛ lakaaŋɔŋk." 12Ɗegera sinɔ sanɗiɗɛɛŋɔŋ a sinɔ lakiɗɛ any a obiiŋɔŋkuŋ. Kɛygun eet kɛygun okoɗ, baraakan beeɗit naakɛ ɓooɗorɔn a sinɔ lakiɗa ŋaawukuŋ, ɛ sinɔ lakiɗa any a balaŋɔŋk a sinɔ lakiɗa any sinɔ obiiŋɔŋk. 13Oola ijaag ola baŋɛk goy Kereseek sinaanɛta gaɓɛ ɓaŋkawukaak. 14Yakana agut sinɔ kɔnu laŋiiɗɛɛ a iinak kaastaanak rakatɛ naakik, nɛkɔ ijaagiir any sinɔ mentanŋɔŋk, 15ma omaay saakan tukeeɗa waasɛɛta Pɛɛni sinɔ Ɓɛlkɛɛstank, saakan ŋaarkiɗa Mɛkedooniyaakeek. Iinak ŋaadtaanak sigɛ atu Pilipisiyoosek ɗegerari kɛ kɛɛ gode Sambatɛyoŋk sinɔkanti kɔnyɛ tigi woriyoŋkuk iinakɛ sɔgɔɔsɔyk. 16Wosɛsɛyarkɔɔkanta tɔkɔny a totopariŋ saakan arkiɗa Tɛsɛlonkeek, saakan ɗegerarɗɔ kɛ laŋkaakan rakatɛk. 17Moko tona sini ma ɗɛya kɛnɔ laŋa tigi noŋk, ma ɗɛya kɛnɔ kɔna obulur tigi wori noŋkuk. 18Boŋakan goy Epapiroditusik tigi sinɛkanta wosɛyɛɛrkɔɔk sinɛta ɗɛyɛk a sinɔ kaalɛ sinɛta ɗɛyɛkiŋ. Tigi sini noŋk ito uduŋeet sinɔ ŋaaɗɛ yaagɛrk sinɔ boŋu Waakoyot ɛ yaageeɗik. 19Enyɛrkɔɔ kɔna Waakoyot any sinɛ kɔna ɗɛyɛk baŋɛ worii sinaanɛkoy ki pediik eemɛyɔɔn nɛɛkɛk goy Yeese Kereseek a ŋaaŋayikiŋ. 20In dakɛ eemɛyɔɔn Baabɛya naŋk Waakoyota, kɛygun nɔkoy nɔkoyk. Ameen.

Digoy Sinɛ Pediyaak

21Inta digoyɛɛ ŋaadtaanak baŋɛ tiriyaakɛ Yeese Kereseek, manɔ ɓɔrɛ kɔnu digoyɛɛtar ŋaadtaana sigɛ atu seeykiŋ. 22Digoyɛɛtarnɔ kɔnu ŋaadtaana ɔgɔɔk kɛ ɗɔm sigɛ ijaagɗi woy suumi Roomuk. 23In wookan Suumi, Yeese Kereseek a iinak agut omoŋ.

Currently Selected:

Pilipisiyoos 4: KSTM

Highlight

Copy