Hosiqa 3
3
HOSIQA KEE IMAAN SINNI BARRAH QAADA
1YALLI kaadu Hosiqak iyyeemih, «Gexay woo mareyta lih dalwa abta barra fan gexay, tet kicintom teetih waris. Anu Israayil mara uxih akah kiciyyo innah, atu tet takcinem kol tan. Israayil mari yalla akke sinni gabat bicsen duyyeh sadgatah qinab-xayloy kafseeni yeceen immay, tohuh, ken kiciyyoh» kaak iyye.
2Hosiqa iyyeemih, «Tet geya'gidih, qado lakqok taban kee koona cabbat kee, gabru deqsitta darok bool kee kontom kiilo ecee. 3Sarrak ‹Caraamu kee dalwat ase waytaamaay mango wakti yoo qambaltaama; anu kaadu koo qambaaleyyo› teetik exce. 4Israayil mari kaadu tonnah malik haysite'kal, abbah num hee'kal, sadgat abe'kal, xeetik bicsen qamidway yaqbudeenihiyya kee Yalla 'yeenih tu elle esseran duyye aalle'kal, mango wakti qambaalak sugelon. 5Tohuk lakal Israayil mari YALLAY ken Dagelta kinni kee ken malikih yen Dawuduk rade amoytih fan edde yaduuroonu waan wakti amaatele. Too saaku YALLIH meysi xagarat keenik gaceleeh; YALLIH maqaane geelon» iyye.
