Hosiqa 4
4
YALLI ISRAAYIL MARI ABA UMAANET YAABE
1Israayil ummatey, YALLI siinik iyyaah sin akah sahitam oobbeya. YALLI siinik iyyaamah, «A baaxol yan mari imaan cabeh yan. Kacni keenik yeerreh yan. Yalla kinniyom yok mayaaxigan. 2Xagana akah culeenim maduudusan. Diraabat yaaban. Sahda qidan. Garqa abaanah dalwat asan. Biili biiluk yembeggeh. Sahda kulli ayro titta qidak assa. 3Tohih sabbatah baaxo kafele. Baaxô-bagul sugga 'tem inkih boolaatak boolaatele. Alak alaakulleyti inkih ambaxele. Kimbir kee kullum selliimele» iyye.
YALLI SEEKA ABTAAMAT YAABE
4YALLI kaadu iyyeemih, «Cubbi abita. Sinaamak inkih tu waa mara makkina. Yoh tu gactek anu seekak wayto liyo.#4:4 Sinaamak inkih tu waa mara makkina. Yoh tu gactek anu seekak wayto liyo: Maqna akak Qibraan afat nagay matamixxiga. «Ku mari seekak tu waa mara kinnuk tene'mmay, tu waa mara makkina» kaadu iyyaanamah tamaatem takkeh. Isin seekak, 5bar kee laqo adaf sin geeleeh; nabuwwa kaadu sin innah andafoofele. Inâ baaxo siinik bayseyyo. 6Yi mari yoo aaxige weenimih sabbatah bayele. Isin kaadu seekak, yooy sin Dagelta kinnihiyya siinih eyyeeqe xinto cinteenih yoo cinteenih. Tohih sabbatah anu kaadu sin cineeh, sin xaylo yi seeka matakka.
7«Isin seekak, elle andarruk tandarreenimil, abtan dambi siinik amagguk yamagge. Tohih sabbatah meqe migaq elle luk tenen ikkel qaybik sin qideyyo. 8Yi mari abah yan dambi kalootuh orba sadgat siinih gaddaliino xale. Tohih sabbatah uxih mango dambit asaanam keenik faxxan. 9Sinaamak kaxxih digaala siinit akkele. Sin inkih digaaleyyooh, abba hayten umaane siinil gacseyyo. 10Maaqo geettoonu'mmay, qulul sin macaba. Xalay fayxih, gabak bicsen duyyey yallah litoonuhiyyah qibaadah aracal dalwa abak sugteeni'mmay, xalay mageytan. Macaay inteenik, yoo cabba hayteenih yalla axcuk duyyeeya tuqbuden» iyye.
YALLI GABAK BICSEN DUYYEH QIBAADA ILAAQEH
11YALLI kaadu qagseh iyyeemih, «Qinabak bicsen qusba kamri kee suge kamri yi marak kas beeh. 12Caxxak-kuren-exxa, Yallak tu keenih bahtam yakkalen. Caxxi oson faxaanam keenih warselem yakkalen. Ken Dagelta cabba heenih, kacoobuh lon kacanu kee, xeet kee cooxuk bicsen duyyet aban qibaada, makot ken beyte. 13Qaleelah amol tan aroocal sadgat aban. Koomaamih amol silal meqeeh ayyuufa le caxah gubal qaydarus qeerisan. Too qaydarus woo cooxih gubal akah qeerisaanam, woo cooxih silal keenit yemqek sa. Tonna kinnuk siinik say-xaylo kacob tekke. Sin xayloh agbi dalwa aba. 14Tohuh, anu ahah ken madigaala. Macaay inteenik, isin isinnih qibaadah qarih addal xiiqareh-xiina lih xintaanah, tonnah kaadu, ken lih gabak bicsen xeet kee cooxuh sadgat abtan. Missilah, ‹Hawri sinni mari finqitah› 'yaanam tan. Toh numma.
15«Isin Israayil maraw, yoo ganteenih. Yuudâ mari sin akke way! Gilgal kee Beet-Awen#4:15 Beet-Awen iyyaanam Umaaneh-Qari iyyaanama. Too magaalak numma migaq Beetal deqsitak yen. Beetal iyyaanam Yallih-Qari iyyaanama. magaaloolil qibaada maabina. Yi migaaqay waarahiyyal maxiibitina. 16Israayil mari yabti cinah lac yekken. Hay, ta mara qayso yayloolen marqih innah mannal ken aylooleh dacrisaa? 17A mari yi aftok xeet kee cooxuk bicsen duyyet aban qibaadah milkih gacen. Ahaysa yanoonay ken inxica. 18-19Qinabak bicsen kamrik cayya iyyan waqdi, dalwa abaanaah farcaan yakken. Meqe migaaqay luk sugeenik qaybik radaanam dooriten immay, kaxxa caacayih gadda akkeloonuuh, xeet kee cooxuy yalla 'yeenih yaqbudeenihiyyah aban sadgatat wacarriyelon» iyye.
