Uswe 9
9
Ngay Taw Gibyun Nadaya ngay Taw Israel
1Fagayu fun tagsis Urdan at fakayabian nadungug ngay taw Israel at nafakamulun gina kanya fagayu nafawayan. (Ngay taw Ket at fun, taw Amur at fun, taw Kanaan at fun, taw Peres at fun, taw Kib at fun, ay ngay taw Ebus at fun.) Kanya fagayu gbanwan sa sangay buksul ay balagyang sas fakayabian baliwa#9:1 buksul sas fakayabian baliwa: sas Ebreu, Sefela. ay sas tigyangan Dagat Mediteranyu sitsigons Lebanun. 2Kanya fagayu namaful laman namawayan Uswe ay ngay taw Israel.
3Dewa katanya, ngay taw Gibyun nu nadungug Uswe at nafakamulun sas furuan Eriku ay Ai, 4grvbvy at balyawvtan laman nanfamuag sas Uswe. Kanya fagayu nasugu sik ngay taw sas Uswe. Ay at ngay asnu e buba sik ngay saku dan ay ngay fagsuadan fanlangu at masulbungan. 5Kanya fagayu nasulun at dan ay at marasrasan fag ngay lanbung ay lapak. Ay e fetus ngay tinapay matugas ay gamling. 6Sanya ginan, kanya fagayu andasug sas Uswe ay sa sangay taw Israel at ngay bale sit fagmafulan sis Gilgal, ay nalong sas Uswe ay sa sangay taw Israel te, “Andasug ami stie siginans tangayayu fag talun laman nanget ami sa emu te, awati sik nasadian sa emi laman wam gfauri em ngay taw.”
7Dewa katanya, ngay taw Israel gbalus te, “Tibaginan tagste wayam munakbang si emi. Nu katanya, wami mawat sik nasadian sa ayu.”
8Ngay taw Gibyun gfainfanyuan sas Uswe te, “Mafalganan ami nangafagsuguan ayu.”
Ay Uswe nainto anya fagayu te, “Sinu am ay daginan am?”
9Kanya fagayu gbalus te, “Siginan ami tangayayu fag talun. Nastie ami aroro nadungug ami ay Dius Yawi at nafakamulun fagayu sas talun Igiptu, 10ay sa sangay taw Amur at fun fagdua tagsis Urdan at fakamenitan, sas Sikun, furuan Kesbun at fun, ay sas Ug, talun Basan at fun tagbanwan sis Astarut. 11Nu katanya, em ngay fagtainan ay em ngay kaiban nasugu emi te, falganani ay fetus, ay nasugu emi stie laman nanlag ami emu ay nanlong te, mafalganan ami nangafagsuguan ayu. Katsi get ami sa ayu sik rirukan laman ban diam gfaurianan emi. 12Damai em tinapay, gina ami glao tuy masugba yay, dewa katanya, katsi antugas wan ay gamling. 13Tuy fag fagsuadan fanlangu ebi ginami glao, bagu yay, ay katsi masulbungan wan. Ay at kadugean nu glo ami em ngay lanbung ay em ngay lapak andan wan.”
14Ngay taw Israel nalingaman tiba kanya fag ngay taw at fetus, ay dewa katanya, wa nainsaful sas Yawi. 15Uswe nawat sik nasadian sa sangay taw Gibyun te, wa ban kasalag ay wa ban gfabul. Ay ngay taw Israel at ngay tagfangguna nafatuyan.
16Nu nlangfe tuluk menit, ngay taw Israel nasaful te, ngay taw Gibyun at talun munakbang way. 17Nu katanya, ngay taw Israel nalao kaduge tuluk menit, ay kanya fagayu andasug sa sangay taw Gibyun at talun. Tagbanwan sanya ngay taw Gibyun, taw Kefira, taw Beerut, ay taw Kiryat-Earim. 18Dewa katanya, ngay taw Israel wa nafawayan anya fagayu aroro e sik fatuyanan wan at nasadian sas Yawi, taw Israel Dius at daga salubangan. Ngay taw Israel nafayud at ngay tagfangguna.
19Dewa katanya, at ngay tagfangguna gbalus te, “Nafatuyanan tam sas Yawi tam Dius at ngayan, nu katanya, wa tam masine gfaurianan anya fagayu. 20Katatuy yakman tam fakamulun: lag tam gfabul kanya fagayu, laman ban wa mdasug sa antam Dius at fandotaman siginan tam nayud nafaning tam fatuyanan sa anya fag ngay taw. 21Fabayani wan anya fagayu gbanwan magamut si antam, ay namagsuguan ban tam anya laman tam tagfansarab ay tam tagfanagub.” Katanya at nafakamulun laman gfafasludan at fatuyanan sa anya fagayu.
22Ay Uswe nafauro ngay taw Gibyun ay nalong te, “Wain ay fagnafamuagun sa emi? Wain ay fagnalongun te, siginan am tangayayu fag talun ay aroro mangaro munakbang wayam si emi? 23Aroro nafakamulun am takatanya, Dius ban gfauri ayu: siginan ban katsi, sik ngay fagsuguan am laman tagfansarab ay tagfanagub si ku Dius at bale.”
24Kanya fag ngay taw gbalus Uswe te, “Nafakamulun ami takatanya aroro kalimu ami te, mafabul am emi. Aroro nasaful ami te, Yawi nasugu at fagsuguan Muisis, laman gfon sa ayu tuy fag talun ay gfabul fagayu tagbanwan ste. 25Katsi, ste ami si ay daga salubangan; fakamuluni sa emi nusnga setaw ay fakaylatun.”
26Ay Uswe nafalangfe ngay taw Gibyun, laman taw Israel di gfabul. 27Dewa katanya, kanya nafagsuguan ngay taw Gibyun laman sik ngay tagfansarab ay tagfanagub laman sa sangay taw Israel ay sas Yawi at fagfiliun ban laman fagnangirugan fanggalangun. Dasug katsi, ngay taw Gibyun gfakamulun takatanya.
Currently Selected:
Uswe 9: OCCT
Highlight
Copy
Compare
Share
Want to have your highlights saved across all your devices? Sign up or sign in
Copyright © 2021 by OMF International, Philippines
