Uswe 8
8
Nu Gagbilug Furuan Ai
1Yawi nalong sas Uswe te, “Lag kalimu ay lag kamomuy. Adgaloani am ngay tagfawayan ay nandog am namawayan Ai, aroro gfababawan kwa sa ayu Ai at fun, ay at ngay taw, ay gfon kwa sa ayu at furuan ay fagdaul at talun. 2Fakamuluni sas Ai ay anggan sat fun kata ay nafakamulun sas Eriku ay sat fun, dewa katanya, katsi buli ngay ramraman ay anggan ngay fagbaugun laman say sadili. Falganani sik ngay tagfawayan, ay namalabagi siginans day guyuy furuan daul.”
3Nu katanya, Uswe ay fagayu at ngay tagfawayan nalao laman namawayan furuan Ai. Uswe nafili tuluk libuk tagfawayan tagsaful fia gfawayan ay nafalao sad yabi. 4Katatuy Uswe at suguan sa anya fagayu: “Nanuksuan am sas day furuan daul, dewa katanya, lag am ngayayu. Mafalganani fawayani nusnga ginain fag buknga. 5Ami ku ngay fadgaloan namawayan ami sis salubangan furuan. Ay kanya fag ngay taw nu gduksun wan laman namawayan emi, lumagyu ami kata ebi em nafakamulun. 6Nu katanya, kanya ro fagayu gamatangan te, kalimu ami kata ebi. Siginan takatanya, kanya fagayu namafalo emi anggan anyayu siginan at furuan. 7Sanya ginan, am, duksuni siginan ay fagsuksuanan ay sakboi sas furuan. Yawi tam Dius gfon wan sa ayu kanya fag furuan. 8Gina ban am nagbilug kanya fag furuan, irugi wan kata Yawi at suguan sa ayu. Tuyani te, anud gfakamulun am takatanya.”
9Ay Uswe nafalao kanya fag ngay tagfawayan, ay kanya fagayu nalo sat fagsuksuanan, sis wabilug Ai ay Betel. Ay anggan at ngay ufud anfamato sis fagmafulan ginanya fag yabi.
10Ay balabag di, Uswe masurip nu gfaful at ngay tagfawayan. Ay Uswe ay Israel at ngay tagfagtainan nafangguna ngay taw Israel glao sas furuan Ai. 11Kanya fagayu andasug sis salubangan furuan, si baliwas fawalan fag alvngvdan, ay kanya fagayu nawat sanya at ngay bale ramit. Ay e sik datag daul sis wabilug anya ay furuan Ai. 12Uswe nafalao limak libuk tagfawayan laman nanuksuan sas wabilug Ai ay Betel, sis Ai at fakayabian baliwa. 13Nu katanya, ngay tagfawayan mafalganan wan. Ay tibak tagfawayan sibaliwas fawalan fag alvngvdan furuan, ay e si yangay sfakamenitan baliwa. Ginanya fag yabi Uswe ay at ngay tagfawayan nasas datag.
14Ai at fun nu nalag Uswe ay at ngay tagfawayan, kanya ay at ngay tagfawayan masurip nu gduksun siginan at furuan, ay nalao sas datag Urdan#8:14 datag Urdan: sas Ebreu, Araba. laman namawayan ngay taw Israel. Kanya fagayu wa saful te, e fawayan sis day guyuy furuan. 15Uswe ay at ngay tagfawayan nalagyu sas talun at yud e taw laman gfalagan te, gababawan. 16Nu katanya, fagayu mangama sis furuan Ai nanamafalo ay anyayu siginan at furuan. 17Fagayu mangama siginans Ai ay Betel nanamafalo ngay taw Israel, nu katanya, we nfamato laman galaga at furuan.
18Ay Yawi nalong sas Uswe te, “Fatiuani am tulag sas furuan Ai aroro gfon kwa fia ayu kafag furuan.” Nu katanya, Uswe nafatiuan at tulag sas furuan Ai. 19Ay at nasuksuan fag ngay tagfawayan masakit nu gduksun siginan at fagsuksuanan, ay nasakbo sasad furuan ay namawayan ay nairug.
20-21Furuan Ai at ngay tagfawayan nu naligbat, nalag sik anus daul kaabat sit tungud furuan. Ay kanya fagayu we fagnanlagyuan ya, aroro Uswe ay at ngay tagfawayan nu nalag te, at ngay iba nasakbo ay nairug furuan Ai, kanya fagayu masakit anfoli ay nanamawayan Ai at ngay taw. 22At nasakbo fag ngay tagfawayan naduksun siginans furuan laman namawayan yangay, ay nu katanya furuan Ai at ngay taw ansikfit sis wabilug. Ngay taw Israel nafabul fagayu taw Ai ay we nalagyu ya ay nafabul wan fagayu, 23sas day at fun. Kanya fagayu nagamat kafag fun ay nataban sas Uswe.
24Ngay taw Israel nu nafabul wan fagayu taw Ai at nafafalo sa sangay tanuman ay sis talun at yud e taw, kanya fagayu anfoli sas furuan Ai ay nafabul yangay fagayu at kinsawad sanya. 25Ginanya fag menit, nafabul wan fagayu tagbanwan sis furuan Ai, at kayuan, labi duak libuk taw, mangama ay mangena. 26Uswe gfataglayun nu gfatiuan at tulag sas furuan Ai yakmay nafabul fagayu tagbanwan sanya. 27Ngay taw Israel nabul ngay fagbaugun ay fagayu at ramraman sanya fag furuan, kata Yawi at nalong sas Uswe. 28Sanya ginan, Uswe nasugu te, “Irugi wan kafag furuan.” Ay dasug katsi we mafalindug ya kanya fag furuan, ay we manamanwan ya sanya. 29Uswe nafarabing kafag furuan at fun sa sik fun kayu ay nafamato at bilug ginanya fag menit. Ay menit nu nfalyu wan, Uswe nasugu te, “Buli ay ukasi sas day furuan at sakbawan.” Ay nasugu yangay te, “Tabuni gang ayu daul.” Ay dasug katsi kanya fag ngay gang sanya yay gugat.
Natap Nasadian sis Buksul Ebal
30Sanya ginan, Uswe nawat sik fagirugan sis buksul Ebal, laman sas Yawi, Israel at Dius. 31Kanya nafawat kata Muisis, Yawi at fagsuguan, at nasugu sa sangay taw Israel sit Faugali fag fafil te, “Fawati sik fagirugan fanggalangun at mawatan ngay gang at yud mafasinean siginans sanbung.” Ay nafoli sis tungud fagirugan, fagirugun fag ngay fanggalangun sas Yawi ay ngay fanggalangun laman sas fagmanabayanun. 32Si sangay taw Israel at daga salubangan, Uswe nariruk sanya fag ngay gang kata Muisis at Faugali. 33Fagayu taw Israel, gadgaloan at ngay tagfagtainan, at ngay tagfangguna, ay at ngay tagwabilug, anggan yangay ngay taw tagsiginans tibak talun, ankafud sas dua ay gsumbalian malindug sis Fagsuadan Nasadian. Sik gaban gtalyuyan Buksul Gerisim ay sik gaban gtalyuyan buksul Ebal. Ay sis wabilug, ngay tagfon fanggalangun siginan Lebi at kasugfunanan malindug gbuba Fagsuadan Nasadian. Kanya fagayu nafakamulun takatanya laman gfaning Muisis, Yawi at fagsuguan, at suguan ebi sabaliwa nu gfadante ngay taw Israel.
34Uswe natap ngay suguan, magamut ngay famonun ay faurianan at marirukan sis Dius at Faugali. 35Ay kanya nafasadsadian natap Muisis at suguan sis fagayu taw Israel at daga salubangan. Sanya yangay at ngay mangena, ngay sisian ay anggan ngay taw tagbanwan sanya tagsiginan tibak talun.
Currently Selected:
Uswe 8: OCCT
Highlight
Copy
Compare
Share
Want to have your highlights saved across all your devices? Sign up or sign in
Copyright © 2021 by OMF International, Philippines
