Uswe 10
10
Ngay Taw Israel Nababo ngay Taw Amur
1Aduni-Sedek, Erusalem at fun, nadungug te, Uswe nagbilug furuan Ai ay nafamin ay nafabul sanya fag ngay taw anggan at fun, kata at nafakamulun sas Eriku ay sat fun. Ay kanya nadungug yangay te, ngay taw Gibyun nafasedsegan taw Israel ay nabanwan magamut si anya fagayu. 2Fun Aduni-Sedek ay anggan ngay taw kalimu aroro kanya nasaful te, Gibyun sik mabalyanan fag furuan ay e fun yangay. Gibyun sik furuan daul ay at ngay tagfawayan maseganama. 3Nu katanya, fun Aduni-Sedek nafabuba sik rirukan sas Kebrun at fun Uam, ay Armut at fun Piram, ay Lakis at fun Afya, ay sas Eglun at fun Debir te, 4“Gubuki angku, namawayan tam Gibyun aroro kanya fag furuan nafasedsegan Uswe ay ngay taw Israel.”
5Nu katanya, taw Amur at fun fag lima ansadi: Erusalem, Kebrun, Armut, Lakis ay Eglun at ngay fun. Ay kanya fag ngay fun nafaful at mesa tagfawayan ay namawayan furuan Gibyun.
6Ngay taw Gibyun nafabuba sik rirukan sas Uswe sis Israel at fagmafulan sis Gilgal te, “Lag gfabayan emi, am ngay fagsuguan. Gewan yap, falangfei emi! Gubuki emi aroro ngay taw Amur at ngay fun tagbanwan si sangay buksul ansadi laman namawayan emi.”
7Nu katanya, Uswe nalao gadgaloan at ngay tagfawayan, ay galo yangay at ngay tagsaful fia gfawayan. 8Yawi nalong sas Uswe te, “Lag o kalimu kafag ngay taw. Gfababawan kwan sa emu anya fagayu. We mababo emu.”
9Fagngabak yabi Uswe glao siginans furuan Gilgal, ay gina at ngay fawayan yud mafalganan, kanya nanamawayan. 10Ay Yawi nafasagsagan ngay taw Amur at amatanganan gina gsalubang ngay taw Israel, ay kanya fag ngay taw nababawan sis furuan Gibyun. Ay ngay taw Israel nafafalo anya fagayu sat tagundaud fag dalan tagsas Bet-Kurun ay nabasing anya fagayu sitsigons Aseka ay Makeda. 11Ngay taw Israel gfataglayun nu gfafalo, ay gina kanya fagayu gtagbung siginans Bet-Kurun sas dalan tagsas Aseka, Yawi nafarak yelu kadaul ngay gang ayu sirut, ay ngayuk fawayan anbul. Ay ginanya, at ngay fawayan at kinbul ayu yap tua at nabasingan. 12Ginanya fag menit Yawi nafababo ngay taw Israel sa sangay taw Amur. Uswe gdarangin sas Yawi si sangay taw Israel at daga salubangan te, “Menit, aragangi sis tungud Gibyun, ay magdanun sis tungud datag Ayalun.”
13Nu katanya, menit ay magdanun naragangan yakmay ngay taw Israel nababo at ngay fawayan. Menit naragangan swabilug kiwang, ay wa nfalyu fagngabak menit. Ay Asar nariruk sit fagrirukan at kinfasludan.
14Siginan ebi ya batang anfasludan takatanya, siginans Yawi nu gbalus takatanya fag darangin. Anud, Yawi nafawayan laman sas taw Israel.
15Sanya ginan, Uswe ay Israel at ngay tagfawayan anfoli sat ngay bale fagmafulan sis Gilgal.
Nafabul Amur at Fun fag Lima
16Kafag limak fun nalao ay nasuksuan sis luib sis Makeda. 17Ay e ngay taw nananlong sas Uswe te, “Kafag limak fun gsuksuan sis luib.”
18Ay Uswe nalong te, “Dingdingi sakbawan luib sik ngay gang ayu daul ay uliti. 19Ay lag am sanya gugat. Namafalo am ay fawayani ay ngay fawayan at kinsawad. Lag am gfasakbo ay ngay fawayan sat ngay furuan aroro ay Dius Yawi gfababawan wan sa ayu kanya fag ngay taw.”
20Nu katanya, Uswe ay ngay taw Israel arvs nafamin wan kanya fag ngay fawayan. Dewa katanya, e nalagyu yay ay nasakbo sat ke alad fag ngay furuan. 21Ay fagayu tagfawayan anfoli sas Uswe sit fagmafulan sas Makeda. Siginan ginanya, we taw glong at mauri sa sangay taw Israel.
22Ay Uswe gsugu te, “Luangi kafag luib ay faduksuni kafag limak fun ay tabani sa angku.” 23Nu katanya, nafaduksun kafag limak fun siginans luib: Erusalem, Kebrun, Armut, Lakis ay Eglun at ngay fun. 24Nu nataban wan kafag ngay fun sas Uswe, Uswe nafaful fagayu taw Israel ay nalong sa sangay fun tagfawayan te, “Gewan, siadi tuy fag ngay fun at ngay liug.” Nu katanya, kanya fagayu ankakbang ay gsiad at ngay liug. 25Uswe nalong sa anya fagayu te, “Lag am kalimu ay lag am kamomuy. Maksvni ay maseganamai. Yawi ban namakamulun takatanya sas fagayu ay fawayan.” 26Ay Uswe nafabul kafag ngay fun ay nafarabing sa sangay kayu anggan sfafun. 27Menit nu nfalyu wan, Uswe gsugu te, “Buli at ngay bilug ay ukasi sas luib.”
Uswe Nagbilug Taw Amur at Talun Tiba
28Ginanya fag menit, Uswe nagbilug furuan Makeda ay nafabul fagayu taw sanya, anggan at fun, ay we nafasawad. Uswe nafakamulun sas Makeda at fun kata at nafakamulun sas Eriku at fun. 29Siginans furuan Makeda, Uswe ay at ngay tagfawayan nataglayun sas Libna ay nanamawayan. 30Yawi nafababawan yangay kanya fag furuan ay at fun sa sangay taw Israel. Ay ngay taw Israel nafabul fagayu tagbanwan sanya ay we nafasawad. Uswe nafakamulun sas Libna at fun kata at nafakamulun sas Eriku at fun.
31Siginans Libna, Uswe ay ngay taw Israel nataglayun sas Lakis. Ay kanya fagayu naligung ay nafawayan kafag furuan. 32Yawi nafababawan Lakis sa sangay taw Israel sis faduak menit nu gfawayan. Kanya fagayu nafabul fagayu tagbanwan sis Lakis kata at nafakamulun sis Libna. 33Gina gawayan, Uram, Geser at fun ay at ngay tagfawayan ggubuk talun Lakis, dewa katanya, Uswe nababo anya fagayu, ay we nsawad.
34Siginans Lakis, Uswe ay ngay taw Israel nataglayun sas Eglun. Kanya fagayu naligung yangay kafag furuan ay nafawayan. 35Ginanya yay fag menit, Uswe ay ngay taw Israel nagbilug Eglun ay nafabul fagayu tagbanwan sanya kata at nafakamulun sis Lakis.
36Siginans Eglun, Uswe ay ngay taw Israel naundaud ay nanamawayan furuan Kebrun. 37Ay kanya fagayu nagbilug kafag furuan, ay nafabul at fun ay anggan yangay tagbanwan sanya, ay anggan yangay ngay taw sat ligung fag ngay furuan. We nafasawad. Nafamin fagayu tagsis furuan kata at nafakamulun sas furuan Eglun.
38Sanya ginan, Uswe ay ngay taw Israel anbaraud ay nanamawayan furuan Debir. 39Ay nagbilug kanya fag furuan ay nafabul at fun ay anggan fagayu tagbanwan sanya, anggan yangay ngay taw sat ligung fag ngay furuan. We nafasawad. Kanya fagayu nafakamulun takatanya sas Debir ay sat fun kata at nafakamulun sas furuan Libna ay sat fun ay sas furuan Kebrun.
40Uswe nagbilug sanya fag talun, ngay buksul, ay datag Negeb tagalagnasun, ay ngay buksul sas fakayabian baliwa#10:40 buksul sas fakayabian baliwa: sas Ebreu, Sefela. ay ngay fun buksul, anggan tagsanya fag ngay furuan at ngay fun. Uswe nafabul fagayu tagbanwan sanya, ay we nafasawad. Kanya fagayu nafakamulun takatanya kata Yawi, Israel at Dius at suguan. 41Uswe nafamin ngay furuan siginans Kades-Barnea sitsigons Gasa, ay siginans Gusen at talun sitsigons Gibyun. 42Sayginan way Uswe nu namawayan, ay nagbilug wan fagayu sanya fag talun ay anggan at ngay fun, aroro Yawi, Israel at Dius, ggubuk at taw Israel nu gfawayan. 43Sanya ginan, Uswe ay fagayu taw Israel anfoli sat fagmafulan sis Gilgal.
Currently Selected:
Uswe 10: OCCT
Highlight
Copy
Compare
Share
Want to have your highlights saved across all your devices? Sign up or sign in
Copyright © 2021 by OMF International, Philippines
