Uswe 7
7
Akan at Asalanan
1Dewa katanya, ngay taw Israel nafamabo Yawi at suguan te, lag gbul fagayu nusnge wain at mafalganan laman sa anya. Akan nabul sik ramraman, nu katanya, Yawi andotama maksvn anya fagayu. Akan, Karmi at baguama. Ay Karmi, Sabdi at baguama. Ay Sabdi, Sera at baguama siginans Uda at kasugfunanan.
2Siginans Eriku, Uswe e nasugu sik ngay taw laman nanginsaful sas Ai. Ai sik furuan sis fakamenitan baliwa sis Betel, munakbang sis Bet-Aben. Nu katanya, ngay taw nalao laman nanginsaful kanya fag furuan. 3Ay kanya fagayu nu noli, nalong sas Uswe te, “Deyud ro tam fagayu at namawayan furuan Ai, aroro wa ngayu tagbanwan sanya. Balikam ro duak libu ay mannga tuluk libuk taw.”
4Nu katanya, tuluk libuk taw at nanamawayan furuan Ai, dewa katanya, ngay taw Ai nababo. 5Ay ngay taw Ai nafafalo ngay taw Israel siginans sakbawan furuan sitsigons Sebarim, ay at kinbul tuluk safulu e unumk taw gina ngay taw Israel gtagbung siginans buksul. Nu katanya, ngay taw Israel anmomuy ay anlimu.
6Aroro siginans fakabaluun Uswe ay anggan at ngay fagtainan sis Israel nagirat at ngay lanbung, ay nafae lukbu at mesa alfuyu, ay anlub sis salubangan Fagsuadan Nasadian anggan andulum. 7Uswe nalong te, “Yawi em Fun, wain am fagnafadifeun yay emi sis Liskung Urdan nu namababawan way ro wo emi sa sangay taw Amur? Amasine yap nu si ami gugat sdife liskung. 8Yawi, nataw ya ku fagmalongun, katsi ngay taw Israel anfoli wan aroro nababawan at ngay fawayan? 9Ngay taw Kanaan ay tibak taw tagbanwan ste dumungug takatanya. Ay kanya fagayu nanligung emi laman namabul. Setain ya am fakamulun laman sam ngayan at mabalyanan?”
10Yawi nalong sas Uswe te, “Malindugi wan! Wain am fagmalubun sanya? 11Ngay taw Israel anke asalanan. Kanya fagayu nafamabo em nasadian. Kanya fagayu nabul sik ramraman, sik fanggalangun laman sa angku. Kanya fagayu nafangkamul, ay nafamuag, ay nafagamut sat sadili ramraman. 12Katanya wan at fagnababawanun. Kanya fagayu anlimu ay nalagyu laman umkamin yangay ay sik fanggalangun sa angku. Kwa ban galo ya ayu nu dway am grasras fagayu nusnge wain at mafalganan laman sik fanggalangun sa angku.
13“Malindugi wan, ay nanlong o sa sangay taw te, ‘Fasinei ay ngay sadili laman ban balabag mafalganan tuam, aroro au Yawi, Israel at Dius, glong au te, e nafasuksuk am sik ngay ramraman at mafalganan laman sik fanggalangun sa angku. Wa ban am makatu gfawayan ay ngay fawayan kaduge nu si ayu kanya fag ngay ramraman. 14Nu katanya, balabag ban, fagayu kasugfunanan nansalubang angku. Gfili kway ban sik kasugfunanan, ay kanya ban fag kasugfunanan at nansalubang angku. Ay sanya ginan ban fag kasugfunanan gfili au at sadi at kalongan. Ay sanya ginan ban fag kalongan gfili kyay fia sik talanan. Ay sanya ginan fag talanan gfili au sik taw. 15Ay ku nafoyung ban fag taw at nafangkamul, irugi wan gasfuan at talanan ay anggan at ngay ramraman, aroro kanya nafamabo ku suguan ay nafakamulun at mapla sas Israel.’ ”
16Ay balabag di, Uswe nafauro ngay taw Israel at ngay kasugfunanan, ay at nafili, Uda. 17Uda at ngay kalongan ankakbang, ay nafili Sera fag kalongan. Sera at kalongan ankakbang, ay at nafili, Sabdi fag talanan. 18Sabdi fag talanan ankakbang, ay at nafili, Akan. (Akan Karmi at baguama. Ay Karmi Sabdi at baguama. Ay Sabdi, Sera at baguama, siginans Uda at kasugfunanan.)
19Uswe nalong sas Akan te, “Ku sisian, fauseganani Yawi, Israel at Dius. Longi angku am nafakamulun. Longi at matuyan.”
20Akan nabalus te, “Matuyan, anke asalanan au sas Yawi, Israel at Dius. Katatuy ku nafakamulun: 21Si tam naago fag ngay ramraman nalag au sik ramit masine siginans Babilunya, ay duak sandank salapi, ay sik lifung gintu at kabyatan gwabilug fabudbungguan. Nalabian au kanya fagayu ay nabul au. Ay nalubgub au si ku basad bale ramit, ay kafag ngay salapi sit tiba daga.”
22Ay Uswe nasugu sik ngay mangama sas Akan at bale ramit. Ay kanya fagayu nalag Akan at nalubgub fag ngay ramraman, ay anud, kanya fag salapi sit tiba daga. 23Ay fagayu tuy nabuba sas Uswe ay sa sangay taw Israel, ay nafasas Yawi at daga salubangan.
24Ay Uswe gadgaloan ngay taw Israel nataban Akan sas datag Akur,#7:24 Akur: at masuad, fagidapun. ay nataban at ngay sisian, ay at ngay baka, ay at ngay asnu, ay at ngay tupa. Ay kanya fagayu nabuba yangay kanya fag salapi, ay ramit, ay lifung gintu, ay at bale ramit ay fagayu at ramraman. 25Uswe nalong sas Akan te, “Nafae fakaplaun o emi. Katsi fag menit Yawi gfaurianan emu.”
Ngay taw Israel nafuyut gang ay nafana Akan yakmay anbul. Nafana yangay anggan at ngay sisian ay nairug wan at ngay ramraman.
26Sanya ginan, kanya fagayu nabul sik ngay dalifi ay natabun Akan. Dasug katsi sanya yay gugat kanya fag fungsuan gang. Ay dasug katsi, kanya fag datag at ngayan Akur yay gugat.
Ay nalyam wan Yawi at dotama.
Currently Selected:
Uswe 7: OCCT
Highlight
Copy
Compare
Share
Want to have your highlights saved across all your devices? Sign up or sign in
Copyright © 2021 by OMF International, Philippines
