Uswe 3
3
Ngay Taw Israel Nandife Urdan
1Uswe ay anggan fagayu taw Israel masurip nu kafulo. Kanya fagayu nalao siginans Sitim ay andasug sas Liskung Urdan, ay gina ganandifeun, natungkud yay sis tigyangan liskung. 2Nu nlangfe tuluk menit, at ngay tagfangguna nalao sa sangay bale 3ay nalong sa sangay taw te, “Nu nalag am ngay taw Lebi nu gbuba Fagsuadan Nasadian sa ay Dius Yawi, aloi, 4laman ro sumaful am te, dada ro ay dalan, aroro yam batang glao sanya. Dewa katanya, lag am kakbang sas Fagsuadan Nasadian; fasik kilumetrui#3:4 kilumetru: sas Ebreu, 2,000k buknga siu. ay kayayuan.”
5Sanya ginan, Uswe nalong sa sangay taw te, “Fasik matuyani ay ngay sadili#3:5 Fasik matuyani ay ngay sadili: at masuad, faningi ngay faugali sabaliwa nu gfalganan laman masine gseg Yawi. aroro balabag ban Yawi namasure sa ayu at ngay madulo.” 6Uswe nalong yangay sa sangay tagfon fanggalangun te, “Bubai Fagsuadan Nasadian ay gunai ngay taw.” Ay kanya fagayu nafaning Uswe at longan.
7Ay Yawi nalong sas Uswe te, “Katsi fag menit, gfauseganan au emu si sangay taw Israel at daga salubangan laman sumaful am te, gufud au emu kata nu gufud au Muisis. 8Longi sa sangay tagfon fanggalangun tagbuba Fagsuadan Nasadian te, nu ndasug sas Liskung Urdan, tungkudi yap.”
9Ay Uswe nalong sa sangay taw Israel te, “Gewan ay dungugani nu nataw ay Dius Yawi at fagyalongun. 10Katsi, sumaful am te, si wa ayu tagleleg fag Dius, aroro kaduge am gfawayan ay ngay fawayan, tam Dius gfayayu siginan ayu ngay taw Kanaan, taw Ket, taw Kib, taw Peres, taw Girgas, taw Amur ay ngay taw Ebus. 11Tuyani fia te, Fagsuadan Nasadian sas fagdaul daga at Fun, gguna tua gugat ayu kaduge am gdife Liskung Urdan. 12Nu katanya, katsi, filii labi duak taw, sadik taw siginan sik gaban taw Israel. 13Ay ngay tagfon fanggalangun tagbuba Fagsuadan Nasadian sas Yawi, fagdaul daga at Fun, nu siwa sad Liskung Urdan, mamam umragang nu gfamilugan, ay umful sa sik afud liskung.”
14-15Ginanya fanggutluan, ay liskung glugwak. Ngay taw nalao siginan at fagmafulan ay nadife liskung. Ngay tagfon fanggalangun tagbuba Fagsuadan Nasadian gguna anya fagayu. Gina ngay tagfon fanggalangun at ngay darafa nasiad liskung, 16mamam anragang wa vtv nu gfamilugan ay anful sa sik fungsu sis Adam fag furuan munakbang sis furuan Saretan. We gfamilugan ya tagsas Dagat at Mabulan,#3:16 Dagat at Mabulan: sas Ebreu, Araba fag Dagat, Dagat at Mayat. nu katanya, ngay taw nadife munakbang sis furuan Eriku. 17Ngay tagfon fanggalangun tagbuba Fagsuadan Nasadian malindug sit kinlanggang fag liskung kaduge ngay taw Israel gdife. Kanya fagayu wa glelegan yakmay fagayu taw andife.
Currently Selected:
Uswe 3: OCCT
Highlight
Copy
Compare
Share
Want to have your highlights saved across all your devices? Sign up or sign in
Copyright © 2021 by OMF International, Philippines
