Uswe 4
4
Ngay Taw Israel nu Gfalindug sik Famamatang
1Ngay taw Israel nu ndife wan Liskung Urdan, Yawi nalong sas Uswe te, 2“Filii labi duak taw, sadik taw siginan sik gaban taw, 3ay sugui anya fagayu laman namul mesa sik gang siginan swabilug liskung, si sangay tagfon fanggalangun at fagmalindugan, ay bubai sa ay fagbanwanan katsi fag yabi.”
4Nu katanya, Uswe nafauro at nafili fag labi duak taw siginans mesa kasugfunanan ay nalong te, 5“Loi wan sas Fagsuadan Nasadian sis wabilug liskung. Galay am at sadi fasanani sik gang daul laman sa sangay kasugfunanan taw Israel. 6Ay kafag ngay gang sik famamatang Yawi at ngay nafakamulun. Ay ay ngay sisian ban nu nainto te, ‘Nataw at masuad kanya fag ngay gang?’ 7balusi ban te, ‘Liskung Urdan at mamam anragang nu gfamilugan gina Fagsuadan Nasadian gdife. Tuy fag ngay gang sik famamatang kabavn sa sangay taw Israel.’ ”
8Kanya fag labi duak taw Israel nafaning Uswe at suguan. Kata Yawi at suguan sas Uswe, kanya fagayu nabul labi duak gang sis wabilug liskung, mesa sadik gang galay sik kasugfunanan taw Israel, ay nabuba sa sangay bale fagtungkudan ay nafoli sanya. 9Ay Uswe nafoli yay labi duak gang sis wabilug liskung, si mandi ngay tagfon fanggalangun tagbuba Fagsuadan Nasadian aro at fagmalindugan. Dasug katsi, sanya yay gugat kanya fag ngay gang. 10Ay ngay tagfon fanggalangun tagbuba Fagsuadan Nasadian malindug yay gugat sis wabilug liskung yakmay ngay taw antabu gfakamulun fagayu Yawi at suguan sas Uswe, kata yangay Muisis at suguan sas Uswe.
11Kanya fagayu nu ndife wan, nafadife yangay Fagsuadan Nasadian. Ay tagfon fanggalangun gdog yay gguna ngay taw. 12Nadife yangay ngay mangama at ke ngay famawayan siginan Rubin ay Gad at kasugfunanan ay anggan Manase fag wabilug kasugfunanan, kata Muisis at suguan sa anya fagayu. 13At kayuan, ufatk safuluk libuk mangama, ay kanya fagayu nadalan sas Yawi at daga salubangan ay nalao sas datag Eriku laman namawayan.
14Ginanya fag buknga, Yawi nafauseganan Uswe sa sangay taw Israel at daga salubangan. Ay kaduge Uswe gleleg, ngay taw gsuyu anya kata nu gsuyu Muisis.
15Ngay taw Israel nu ndife wan Liskung Urdan, Yawi nalong sas Uswe te, 16“Sugui ngay tagfon fanggalangun tagbuba Fagsuadan Nasadian, laman gdife wan liskung.” 17Ay Uswe nalong sa sangay tagfon fanggalangun te, “Difei wan.” 18Ay ngay tagfon fanggalangun nu ndife wan, mamam gfamilugan wan.
19Ngay taw Israel nadife Liskung Urdan gina sis fasafuluk menit sis taguna fag magdanun. Sanya ginan, ngay taw Israel gbanwan sis furuan Gilgal, sis Eriku at fakamenitan baliwa. 20Ay Uswe nafoli sanya kafag labi duak taw at nabul fag ngay gang siginans Liskung Urdan. 21Ay Uswe nalong sa sangay taw Israel te, “Sa ban takadasug fag buknga, ay ngay sisian nu nainto sa ayu te, ‘Nataw tuy fag ngay gang at masuad?’ 22balusi ban te, ‘Ngay taw Israel gina gdife Liskung Urdan nalao sit matat fag daga. 23Yawi ay Fun nafatat Liskung Urdan yakmay ami andife, kata at nafakamulun sis Dagat Maraska gina tam gdife. 24Kanya nafakamulun takatanya laman ngay taw sas fagdaul daga sumaful te, Yawi sik mabalyanan fag Dius, ay laman kabavn gsuyu tuam ay Dius Yawi.’ ”
Currently Selected:
Uswe 4: OCCT
Highlight
Copy
Compare
Share
Want to have your highlights saved across all your devices? Sign up or sign in
Copyright © 2021 by OMF International, Philippines
