Uswe 2
2
Uswe Nasugu at Nanginsaful Furuan Eriku
1Sanya ginan, Uswe gfalganan sik masuksukan fag balyawvtan. Kanya nasugu duak taw siginans furuan Sitim laman nanginsaful talun Kanaan, kaugat wan furuan Eriku. Ay kanya fag dua gina andasug sas furuan Eriku, nabanwan sas Rakab, sik takamatugtug fag mangena, at bale.
2Ay e nalong sas furuan Eriku at fun te, “Katsi fag yabi e ndasug stie sik ngay taw Israel laman nanginsaful tam talun.” 3Nu katanya, furuan Eriku at fun nasugu sik ngay taw laman nanlong sas Rakab te, “Faduksuni siginan am bale kafag duak taw, aroro kanya nastie laman nanginsaful tam talun.”
4-6Rakab nabalus te, “Matuyan duak taw andasug sa ku bale, dewa katanya, kwa saful te, daginan. Kanya fag dua nalo wan gina gakayabiun ay gina gadingdingun furuan at sakbawan. Kwa nasaful nu dada ro nu glao, dewa katanya, tibaginan ro nasud yayam nu nanangguyan am anya fag dua.” (At mafanud, Rakab nafasuksuan way kafag duak taw sat tungud bale ay natabun at ngay natimrang fag nagfagudan fangawat ramit fag tanum.) Ay kanya fag ngay fagsuguan nalo wan laman namafalo duama.
7Ay kanya fagayu gina naduksun, nadingding wa vtv at sakbawan furuan, ay nanamafalo sitsigons fagdifean Liskung Urdan.
8Ay kanya fag duak taw gina nantiug, Rakab nalao sas tungud bale sa kafag dua at fagtiugan, 9ay nalong te, “Nasaful au te, Yawi gfon wan sa ayu tuy fag talun. Fagayu taw tagbanwan ste maksvn nu kalimu ayu. 10Nadungug ami nu setain Yawi nu gfaragang Dagat Maraska laman ay dalan, ginam glao siginans talun Igiptu, ay nu setain nu gfabul Sikun ay Ug, ngay taw Amur at fun fagdua, sis dife Liskung Urdan. 11Nu nadungug ami takatanya, anlimu ami maksvn, ay galay at sadi anmomuy, aroro ay Dius Yawi, banwa tua ay daga at Dius. 12Nu katanya, katsi fatuyanani sas Yawi at ngayan te, ggubuk ban am ku ngay kalongan kata nu ggubuk au ayu. Foni angku sik famatuyan te, 13wa ban am gfabul ku ngay fagtainan ay ku ngay faduksay ay fagayu ku kalongan.”
14Duama nalong sas Rakab te, “Gfon ami em leleg laman sa emu! Nu ddi ban o nalong em tungulan, malukme ban mi sa emu gina ban Yawi gfon emi tuy fag talun.”
15Rakab at bale sisad basad furuan daul at alad, nu katanya, kanya nafatustus duama sas fagbanawanan sat nafabaringbing fag lubid. 16Rakab nalong sas duama te, “Nu glo am, sa yakman sa sangay buksul laman ro at namafalo ayu wa glag ayu. Suksuani sanya tuluk menit yakmay kanya fag ngay taw anfoli stae. Sanya ginan, masine wam guli.”
17Ay duama nalong sas Rakab te, “Gfafasludan ban mi em fatuyanan sa emu, 18dewa katanya, fakamuluni kata tam nasadian: gina ban mi gfawayan ste fag talun, siuki tuy fag lubid maraska sam fagbanawanan si em fagtustusan. Fasakboi sam bale am fagtainan, am ngay faduksay ay fagayu am kalongan. 19Dewa katanya, at sadi am kalongan nu naduksun way, ay anbul, bunwa em kurang ya. Ay nu e nbul way sim basad bale, em kurang wan. 20Dewa katanya, nu nalong way o em tungulan, wa ban mi gfafasludan em nasadian sa emu.” 21Rakab gbalus te, “Kin, kaylat au.” Sanya ginan, Rakab nafalao wa vtv duama ay nafabaringbing sik lubid maraska sat fagbanawanan.
22Ay duama nalo wan, ay nasa sangay buksul, ay nasuksuan yay sanya tuluk menit, kaduge at namafalo anya fag ngay taw sa yay sangaba dalan. Kanya fagayu wa nalag duama ay noli wan. 23Ay duama nalao siginans buksul ay nadife liskung ay anfoli sas Uswe. Kanya fag dua nafoyung sas Uswe fagayu at kinfasludan. 24Nalong te, “Anud, Yawi nafon wan sa antam fagdaul kafag talun. Ay fagayu taw sanya maksvn nu kalimu antam.”
Currently Selected:
Uswe 2: OCCT
Highlight
Copy
Compare
Share
Want to have your highlights saved across all your devices? Sign up or sign in
Copyright © 2021 by OMF International, Philippines
