Uswe 24
24
Ngay Taw Israel Nafatuyanan te, Namaning ban at Nasadian sas Dius
1Sanya ginan Uswe nafaful sas Sekem Israel at ngay kasugfunanan, ay anggan ngay fagtainan, ngay tagfangguna, ngay tagwabilug, ay fagayu tagfakamulun sis Israel, ay kanya fagayu ankakbang sas Dius at daga salubangan.
2Uswe nalong sa sangay taw te, “Katatuy Yawi, Israel at Dius, at longan: Ebi, ay ngay mangaguyang gbanwan sis dife Liskung Eufrates ay kanya fagayu naseg tibak fagsegan. At sadi at nabanwan sanya, Tera, Abrayam ay Nakur at mama. 3Dewa katanya, nafalin au Abrayam siginans dife liskung ay nafabanwan sas talun Kanaan ay nafon au anya ngayuk kasugfunanan. Nafon au sa anya at baguama Isak, 4ay Isak at ngay baguama Isaw ay Akub. Nafagbilug au sas Isaw ngay buksul tagsis Seir fag talun laman at fagagbilugun. Dewa katanya, Akub ay at ngay sisian nalao sas talun Igiptu. 5Sanya ginan, nasugu au Muisis ay Arun laman namalangfe ayu siginans talun Igiptu ay nafadasug au ngay faurianan sa sangay taw Igiptu, laman gfalfas ayu. 6Dewa katanya, gina am andasug sas Dagat Maraska, ngay taw Igiptu nanamafalo ayu gsakay sit ngay faguyudan fangawayan. 7Ay ay ngay mangaguyang naet sa angku gubuk, ay nafae dulum au si ay mangaguyang ay ngay taw Igiptu at wabilug. Ay nafalubgub au ngay taw Igiptu sas dagat. Nalag wam ku nafakamulun sa sangay taw Igiptu. Ay nabanwan am sis talun at yud e taw ngaduge kbuknga.
8“Sanya ginan, nataban au ayu sa sangay taw Amur at talun tagsis Urdan at fakamenitan baliwa. Ay ay ngay fawayan nafawayan ayu, ay nafababo au ayu. Nafabul au anya fagayu ay nagbilug am at ngay talun. 9Sanya ginan, Balak, Sipur at baguama ay Muab at fun nanamawayan ngay taw Israel. Balak nasugu Balaam, Beur at baguama laman glong mauri sa ayu. 10Dewa katanya, kwa naylat Balaam nu gfakamulun takatanya sa ayu. Abat ngate, Balaam gfadante ayu ay nafalangfe au ayu siginans Balak at daluap.
11“Sanya ginan, nadife am Liskung Urdan ay andasug sas talun Eriku. Ngay taw Eriku ay ngay taw Amur, taw Peres, taw Kanaan, taw Ket, taw Girgas, taw Kib, ay taw Ebus, nanamawayan ayu ay nafababo au ayu. 12Nafadasug au malege sa sangay taw Amur at fun fagdua laman gaiyan kanya fagayu gina yayam bagu kadasug. Nu katanya, nababo am anya bunwa siginan ay fiso ay ay godun. 13Nafon au ayu ay talun wam nainkidapan. Nafabanwan au ayu sa sangay furuan ayu daul ay nayud ya nafalindug. Katsi kon am ngay wat ubas ay ngay ulibu at rawvg, ay nayud natanum.
14“Nu katanya, katsi, esugi Yawi ay fakamuluni at matuyan. Ubuni wan ay ngay mangaguyang at fagsegan ebi gina sis dife Liskung Eufrates sis talun Igiptu, ay fakamuluni yakman sas Yawi. 15Dewa katanya, wayam kaylat gfakamulun sas Yawi, katsi fag menit filii nusnga sinu ay fagnamausegananun. O namakamulun am sa ay ngay mangaguyang at ngay fagsegan sis dife Liskung Eufrates, o ay mannga sa sangay taw Amur at fagsegan sanya fag talun ay fagbanwanan katsi? Dewa katanya, au ay ku kalongan namakamulun ami sas Yawi.”
16Ngay taw nabalus te, “Wami e amatanganan tagtalyuyan Yawi, laman nanseg tibak fagsegan. 17Yawi tam Dius at nafalfas antam ay tam ngay mangaguyang gina tam gafagsuguanan sis talun Igiptu. Nalag yangay tam at ngay nafakamulun at madulo. Ay kanya nadiri antam gina tam gdalan sa sangay gaban taw at ngay talun. 18Kanya naiyan ngay taw Amur ay tiba yak taw tagbanwan ste fag talun. Nu katanya, gseg yangay mi Yawi, aroro kanya wan em Dius.”
19Uswe nalong sa sangay taw te, “Wam mafauseganan Yawi aroro kanya at yud e malong fag Dius ay kanya wa kaylat nu e fagsegan wayam tibak fagsegan. Kanya ban wa kalyam ay natalyuyan anya, ay wa yangay ban kalyam ay nafakamulun at mauri. 20Nu nyayu way ban am siginans Yawi ay nu naseg wayam tibak fagsegan, kanya ban gfaurianan ayu. Kanya ban gfamin ayu, ebi kanya dewa matuyan sa ayu.”
21Dewa katanya, ngay taw nabalus Uswe te, “Gfakamulun ban mi tagfauseganan Yawi.” 22Uswe nalong te, “Am wan at nafatuyanan say sadili te, gfauseganan ban am Yawi.”
Ay kanya fagayu nabalus te, “Kin, ami wan at nafatuyanan.”
23Ay Uswe nalong te, “Nu katanya, ubuni wan ay ngay fagsegan ay esugi Yawi, Israel at Dius, sas fagdaul ay amatanganan.”
24Ngay taw gbalus te, “Gfakamulun ami laman sas Yawi, em Dius ay gfaning ban mi at ngay suguan.”
25Ginanya fag menit, Uswe nawat sik nasadian sa sangay taw gina sis Sekem, ay nafon sanya fagayu at nasadian ay at ngay faugali. 26Uswe nariruk at nasadian sas Dius at Faugali fag fafil. Sanya ginan, kanya nanamul sik gang daul ay nafalindug sis fun kayu daul munakbang sit mafasamanan fag buknga laman sas Yawi.
27Ay Uswe nalong sas fagayu taw te, “Tuy fag gang tagfatuyan sa antam te, Yawi nafakamatoan antam. Tuy yangay ban tagfatuyan nu gfawayan wayam Dius.” 28Sanya ginan, Uswe nafauli wan ngay taw sat mesa talun.
Uswe ay Elyasar Anbul
29Andasug sik buknga Yawi at fagsuguan Uswe, Nun at baguama, nu kabul. Ay ginanya Uswe at banwa sadik sandan sadik safulu. 30Ay nanamoli anya sat fagagbilugun fag daga sas Timnat-Sera, tagsis Efraim at fagagbilugun fag ngay buksul, sis buksul Gaas sas fawalan baliwa. 31Ay kaduge Uswe gleleg, ngay taw Israel gfaning tua Yawi. Ay dewa Uswe anbul wan, kanya fagayu gfataglayun tua nu gfaning Yawi kaduge Israel at ngay fagtainan gleleg, at nalag Yawi at nafakamulun madulo sas Israel. 32Ngay taw Israel nabuba Use at ngay bini siginans talun Igiptu, ay nanamoli sis Sekem sis Akub at nabayad fag talun sadik sandank lifung salapi siginans Kamur at ngay baguama, Sekem at mama. Kafag afud talun at nafon sas Use at kasugfunanan laman at fagbanwanan.
33Elyasar, Arun at baguama, anbul yangay ay nanamoli anya sis furuan Gibya, tagsis Efraim at fagagbilugun fag ngay buksul, at nafon sat baguama Finekas laman at fagbanwanan.
Currently Selected:
Uswe 24: OCCT
Highlight
Copy
Compare
Share
Want to have your highlights saved across all your devices? Sign up or sign in
Copyright © 2021 by OMF International, Philippines
