Uswe 23
23
Uswe at Suguan sa sangay Taw Israel
1Nu nlangfe ngaduge kbuknga, Yawi nafae fagmanabayanun ngay taw Israel siginan at ngay fawayan sit ligung nu yud namawayan ya anya fagayu. Ginanya Uswe mafufuama wan. 2Nu katanya, kanya nafauro fagayu taw Israel, gasfuan at ngay fagtainan, at ngay tagwabilug ay anggan at ngay fun ayu sirut. Kanya nalong sa anya fagayu te, “Katsi mafufuama kwan. 3Nalag wam ay Dius at nafakamulun ste fag ngay talun laman sa ayu. Yawi wan at nagubuk ayu gina am gfawayan kanya fag ngay taw. 4Naafud kwan kanya fag talun sa ay ngay mesa kasugfunanan laman ay fagagbilugun, siginans Liskung Urdan at fakamenitan ay sitsigons Dagat Mediteranyu at fakayabian, ay anggan yangay ngay talun tam nayud yay nagbilug. 5Yawi ban nangaiyan ay ngay fawayan, ay am waban at namanwan sat ngay furuan, kata ay Dius at fatuyanan sa ayu.
6“Faksvni ay amatanganan, ay faningi fia ngay suguan ay faugali sis Muisis at nariruk fag fafil. Lag am gsaruy. 7Lag am gfadiuganan at munakbang si ayu fag ngay taw, nusdi taglong at ngay fagsegan at ngayan. Ay lag yangay nanseg ay namauseganan kafag ngay fagsegan. 8Nu bunway, matuyani tua sa ay Dius Yawi, kata ay fakamulun dasug katsi.
9“Yawi naiyan at maksvn ay at mabalyanan fag ngay talun gina am gfawayan, ay dasug katsi ya batang e gbabo ayu. 10Nusnga sinu si ayu mababo tua sadik libuk taw aroro ay Dius Yawi tagfawayan laman sa ayu, kata at nafatuyanan. 11Nu katanya, esugi tua gugat Yawi sas fagdaul ay amatanganan.
12“Dewa katanya, nu natalyuyan way ban am anya, ay nanangasadi sa kafag ngay talun at taw, ay nu nafadadwa way ban am ay ngay sisian sat ngay sisian, matuyan, 13ay Dius Yawi wa ban nangaiyan ya kanya fag ngay talun. Abat ngate, kanya ban fagayu kata sik sangdaw sa ayu ay kata sik famalang sa ay guyuy ay sik ngay dugi sa ay mata, yakmay ban am ankamin ste fag talun Yawi at nafon ayu.
14“Munakbang wan nu kabul au. Ay nasaful wam te, ay Dius Yawi nafafasludan tua fagayu at masine fag fakamulun kata at nafatuyanan sa ayu. Ay fagayu at nafatuyanan nafafasludan tua. 15Dewa katanya, katsi ay Dius Yawi nafafasludan wan fagayu at masine at nafatuyanan sa ayu, ay namafasludan yangay ban at faurianan sa ayu, laman sik famararang sa ayu yakmay ban am namin ste fag talun at masine at nafon sa ayu. 16Anud, umfasludan ban sa ayu takatanya, nu dway am nafaning ay Dius Yawi at nasadian at suguan ayu. Ay nu gseg way ban am sa tibak fagsegan, matuyan kanya ban namadasug sa ayu at dotama, ay masakit ban am umkamin ste ginan fag talun at masine at nafon sa ayu.”
Currently Selected:
Uswe 23: OCCT
Highlight
Copy
Compare
Share
Want to have your highlights saved across all your devices? Sign up or sign in
Copyright © 2021 by OMF International, Philippines
