Tagfangguna 1
1
Uda ay Simyun at Kasugfunanan Nataban Aduni-Besek
1Uswe nu nbul wan, ngay taw Israel nainto sas Yawi te, “Sinu ban fag kasugfunanan taguna at namawayan ngay taw Kanaan?”
2Ay Yawi nabalus te, “Uda fag kasugfunanan, aroro nafatigwanan kwan sa anya fagayu kanya fag daga.”
3Ay Uda nalong sat faduksay Simyun te, “Gubuki emi nu namawayan ami ngay taw Kanaan laman nangagbilug ami at fagbanwanan, ay ggubuk yangay ban mi ayu.” Nu katanya, Simyun at kasugfunanan nagubuk anya namawayan.
4-6Uda ay at ngay kasugfunanan nu nanamawayan wan, Yawi nafababo anya fagayu sa sangay taw Kanaan ay taw Peres. Ay kanya fagayu nafabul safuluk libuk taw sis furuan Besek. Ay kaduge gfawayan, nafawayan yangay fun Aduni-Besek ay anggan at ngay tagfawayan. Ay nu gababawan wan, Aduni-Besek nalagyu, dewa katanya, ngay taw Israel nanamafalo ay nagamat anya ay nalifung at ngay sumyu tama daluap ay darafa. 7Aduni-Besek nalong te, “Ebi, nalifung au fituk safuluk fun at sumyu tama daluap ay at sumyu tama darafa, ay kanya fagayu kamuyutan ngay nagfatongan si ku daga fagfangonan. Ay katsi, Dius gfasud kata ku nafakamulun at mauri sa anya fagayu.” Ay Uda at ngay kasugfunanan nataban Aduni-Besek sas Erusalem ay sanya wan nu gfabul.
8Ay Uda at ngay kasugfunanan nafawayan ay nagbilug Erusalem, ay nafabul wan fagayu tagbanwan sanya, ay nairug kafag furuan. 9Ay sanya ginan, kanya fagayu nanamawayan ngay taw Kanaan tagbanwan si sangay buksul, ay sis Negeb ay anggan tagsis fakayabian baliwa fag ngay buksul. 10Ay nafawayan yangay ngay taw Kanaan tagbanwan sis Kebrun (ebi at ngayan, Kiryat-Arba) ay nababo yangay Sesay, Akiman, ay Talmay.#1:10 Sesay, Akiman, ay Talmay: ngay taw daul. Damai Tagfangguna 15:14.
Utniel Nagbilug Furuan Debir
Usw 15:13-19
11Siginans Kebrun, kanya fagayu nafawayan yangay ngay tagbanwan sis furuan Debir (ebi at ngayan, Kiryat-Sefer.) 12Ay Kaleb nalong te, “Nusnga sinu tua ban at mafaago Kiryat-Sefer, gfon kban ku baguina Aksa laman at bubay.” 13Ay Utniel, Kenas at baguama, Kaleb at arian, at nafaago kanya fag furuan. Nu katanya, Kaleb nafon at baguina Aksa sas Utniel laman at bubay. 14Ay nu ndadwa wan, Aksa nalong sat mangama te, “Nanlong au sa ku mama te, fabiai yap at nafagbilug sa angku fag daga.”
Ay sanya ginan, kanya nalao sas Kaleb, ay nu ndasug wan, kanya natustus siginan at sakayan asnu, ay Kaleb nainto anya te, “Nataw am fakaylatun?”
15Ay Aksa nabalus te, “Get kma sa emu sik famonun fag daga ke ngay bulbug aroro am nafon angku fag daga sis Negeb we bulbug.” Nu katanya, Kaleb nafon sa anya ngay bulbug sas buksul ay sas datag.
Uda ay Benamin at Kasugfunanan at ngay Nagbilug
16Uda at kasugfunanan nu nalao siginans furuan Eriku,#1:16 furuan Eriku: sas Ebreu, furuan at ke ngayuk fun kayu takata layag. ngay taw Ken tagsiginans Muisis at nugangama at gaban, nanangalo anya fagayu sas Uda at talun yud e taw. Kanya fagayu gbanwan magamut tagsanya fag ngay taw, munakbang sis furuan Arad sis Negeb.
17Sanya ginan, Uda at kasugfunanan nanggubuk Simyun at kasugfunanan laman namawayan furuan Sefat, ngay taw Kanaan at fagbanwanan. Ay kanya fagayu narasras wa fia, ay nafangayan kafag furuan te, Kurma.#1:17 Kurma: at masuad, Fakarasrasun. 18Kanya fagayu nagbilug yangay furuan Gasa, Askelun, ay Ekrun ay anggan at fagagbilugun fag daga.
19Yawi nagubuk Uda at kasugfunanan. Kanya fagayu nagbilug ngay buksul, dewa katanya, wa mababo ngay tagbanwan si sangay datag aroro at ngay kabayu at ngay faguyudan fangawayan mawatan siginans sanbung. 20Kata Muisis at nafatuyanan, nafagbilug sas Kaleb Kebrun fag talun. Ay Kaleb naiyan tuluk talanan siginans Anak at kasugfunanan tagbanwan sanya fag talun. 21Dewa katanya, Benamin at kasugfunanan wa naiyan ngay taw Ebus tagbanwan sis Erusalem. Nu katanya, dasug katsi, kanya fag ngay taw gbanwan yay gugat sanya magamut Benamin at ngay kasugfunanan.
Use at Kasugfunanan fag Dua Nagbilug Betel
22-23Yawi nagubuk Use at ngay kasugfunanan kaduge gfawayan furuan Betel. Ay kanya fagayu nasugu sik ngay taw laman nanginsaful sas furuan Betel (ebi at ngayan, Lus.) 24Ay at nasugu fag ngay taginsaful nalag sik mangama nu gduksun siginans furuan daul. Ay nalong sa anya te, “Gubuki emi laman masakbo ami sas furuan daul ay wa ro mi kasalag emu.” 25Ay kanya fag mangama nafoyung sa sangay taginsaful furuan at sakbawan. Ay kanya fagayu nafabul fagayu tagbanwan sanya. Dewa katanya, wa nafabul kafag mangama ay anggan at talnayan. 26Kanya fag mangama ay at talnayan nalao sa sangay taw Ket at talun ay nafae furuan sanya ay nafangayan te, Lus. Dasug katsi, kanya yay gugat at ngayan.
Ngay taw Israel at Nayud Naiyan fag ngay Taw Siginan at ngay Fagbanwanan
27Manase at kasugfunanan wa mafaiyan ngay taw tagbanwan si sangay furuan Bet-San, Taanak, Dur, Ibleam, Megidu anggan sit ligung fag ngay furuan, aroro kafag ngay taw Kanaan naylat wan nu gbanwan sanya fag talun. 28Ay gina ngay taw Israel anke fagmakatuun, nafagsuguan ngay taw Kanaan laman tagfakamulun, ay wa naiyan kanya fagayu.
29Ay Efraim at kasugfunanan wa yangay nafaiyan ngay taw tagbanwan sis Geser. Nu katanya, ngay taw Kanaan gfataglayun gbanwan magamut sanya.
30Ay anggan Sebulun at kasugfunanan wa yangay nafaiyan ngay taw Kanaan tagbanwan si sangay furuan Kitrun ay Naalul. Nu katanya, ngay taw Kanaan gbanwan magamut sanya. Dewa katanya, nafagsuguan ngay taw Kanaan laman tagfakamulun.
31Ay Aser at kasugfunanan wa yangay nafaiyan ngay tagbanwan sis Aku, Sidun, Aklab, Aksib, Kelba, Afek, ay Rekub. 32Nu katanya, ngay taw Kanaan gbanwan magamut Aser at ngay kasugfunanan.
33Ay Naftali at kasugfunanan wa yangay nafaiyan ngay tagbanwan sis Bet-Semes ay Bet-Anat. Nu katanya, ngay taw Kanaan gbanwan magamut Naftali at kasugfunanan, ay ngay taw Kanaan gafagsuguanan laman sik ngay tagfakamulun.
34Ngay taw Amur wa naylat Dan at kasugfunanan nu namanwan sas datag, nu katanya, kanya fagayu nu gbanwan si way gugat sbuksul. 35Ngay taw Amur wa kaylat galin siginans buksul Eres, Ayalun, ay Saalbim. Ay Use at kasugfunanan nu nke fagmabalyananun, ngay taw Amur yangay gafagsuguanan laman sik ngay tagfakamulun. 36Ngay taw Amur at fatuan daga siginans Agipan fag Dalan tagsas Sela ay gtaglayun sat buid.
Currently Selected:
Tagfangguna 1: OCCT
Highlight
Copy
Compare
Share
Want to have your highlights saved across all your devices? Sign up or sign in
Copyright © 2021 by OMF International, Philippines
