Uswe 22
22
Tibak Taw Israel Anfoli sat Fagbanwanan sas Fakamenitan Baliwa
1Uswe nafaful ngay taw Rubin ay Gad at kasugfunanan, ay Manase fag wabilug kasugfunanan, 2ay nalong sa anya fagayu te, “Nafakamulun am Muisis, Yawi at fagsuguan, at ngay suguan ay nafaning yangay am fagayu ku ngay suguan. 3Dasug katsi, ggubuk tuam ay ngay faduksay fag ngay taw Israel ay gfaning tuam Yawi at suguan sa ayu. 4Ay katsi, ay ngay faduksay fag ngay taw Israel manabayan wan kata Yawi at fatuyanan sa anya fagayu. Nu katanya, afolii wan sa ay mesa talun sas Urdan, sas Muisis, Yawi at fagsuguan, at nafon ayu fag talun. 5Dewa katanya, lag am kalyam Muisis at nafon sa ayu fag ngay suguan ay fag ngay faugali. Esugi ay Dius Yawi, ay ugalii tua kata at balyawvtan, faningi at ngay suguan, ay matuyani tua gugat sa anya ay fauseganani anya sas fagdaul ay amatanganan.” 6Uswe nafadante anya fagayu ay nafauli wan. 7(Muisis nafagbilug sas Manase fag wabilug kasugfunanan talun tagsas Basan, ay Uswe nafagbilug sa sik wabilug kasugfunanan talun sas alvngvdan baliwa Urdan kataip wan tibak ngay kasugfunanan at talun.)
Gina kanya fagayu galaoun, Uswe nafadante, 8ay nalong te, “Ulii wan ay bubai ay ngay ramraman: ngay fagbaugun, sanbung salapi, gintu, tansu, sanbung ay ngay lanbung. Foni tua say ngay kalongan nusnga setaw ay nabul siginan ay ngay fawayan.”
9Ay sanya ginan, Rubin ay Gad ay Manase fag wabilug kasugfunanan noli wan. Ay tiba at ngay faduksay si yay gugats Silu sis talun Kanaan, ay sanya ginan anfoli wan sas Gilyad at fagagbilugun fag talun, kata Yawi at suguan sas Muisis.
10Kanya fagayu nu ndasug wan sas Gelilut, munakbang sis Liskung Urdan, Rubin ay Gad at kasugfunanan ay Manase fag wabilug kasugfunanan nawat sik fagirugan daul. Tuy fag talun si yays Kanaan. 11-12Ay tibak taw Israel nadungug te, Rubin ay Gad at kasugfunanan ay sik wabilug Manase at kasugfunanan nawat sik fagirugan sis fatuan Kanaan sis Gelilut, munakbang sis Liskung Urdan. Nu katanya, kanya fagayu namaful laman namawayan. 13Ngay taw Israel nasugu Finekas fag tagirug fanggalangun, Elyasar at baguama, sas Rubin ay Gad ay Manase fag wabilug kasugfunanan sas talun Gilyad. 14Ay Finekas e ufud safuluk tagfangguna, sadi siginan galay sik kasugfunanan Israel. Ay kanya fag safulu tagfangguna sat mesa kalongan. 15Kanya fagayu nu ndasug sas Gilyad, nalong sas Rubin ay sas Gad ay sas Manase fag wabilug kasugfunanan te, 16“Yawi at ngay taw gyasafulun te, wain ay fagnatalyuyanun taw Israel at Dius. 17O nunda wam namatang tam nafakamulun at mauri gina tam sis Peur? Ginanya, Yawi nafadasug sa antam sik fakasaitun, ay dasug katsi gagwantan yay tam gugat. 18Ay katsi e algan am nantalyuyan Yawi ay nanfamabo anya! Balabag ban kanya kadotama ngay taw Israel. 19Nu katanya, nu dway masine gseg si ay talun, stiei sa em talun, sis Yawi at talun nu inda fagnansegan anya fag bale ramit, ay banwani yap ban sanya. Dewa katanya, lag am kamabo Yawi siginan nu kawat am sik fagirugan tagsaman fagirugan fanggalangun laman sas Yawi tam Dius. 20O nunda wam namatang Akan, Sera at baguama? Kanya nafamabo sabaliwa at fanggalangun sas Yawi, ay fagayu taw Israel anfaurianan. Bundi lang sia at kinbul siginan at nafakamulun mauri.”
21Rubin ay Gad ay Manase fag wabilug kasugfunanan gbalus sat ngay tagfangguna te, 22“Yawi sik mabalyanan fag Dius! Yawi sik mabalyanan fag Dius! Ay kanya saful way em fagnafakamulunun takatanya, ay anggan am nangus sumaful yangay am. Nu nafawayan way romi ay nafamabo Yawi, fabuli wan emi katsi fag menit. 23Nu nafamabo way romi Yawi siginan nu kawat ami sadi yak fagirugan laman em fagnangirugan em ngay fanggalangun ay em gutluan fag ngay fanggalangun, ay em ngay fanggalangun laman sas fagmanabayanun, Yawi ban nangus gfaurianan emi.
24“Nafakamulun ami takatanya aroro kalimu ami te, mandasug sik buknga ay ngay kasugfunanan malong sa em ngay kasugfunanan te, ‘Wam kataip ya sas Yawi, Israel at Dius, at taw. 25Yawi nafasi tam wabilug Liskung Urdan, laman masaman ami siginan ayu, Rubin ay Gad at kasugfunanan, ay bunwa am Yawi ya at ngay taw.’ Ay ay ngay kasugfunanan ban masalag em ngay kasugfunanan nu gseg Yawi. 26Em fagnawatun kafag fagirugan bunwa laman em fagnangirugan em ngay fanggalangun, ay tiba yak fanggalangun, 27nu bunway laman sik famasaful sa emi ay sa ayu ay sa sangay takadasug ban fag ngay kasugfunanan te, nanseg yangay ban mi Yawi sat bale ramit siginan em ngay fagirugun fag ngay fanggalangun ay tiba ya em ngay fanggalangun ay em ngay fanggalangun laman sas fagmanabayanun. Nu katanya, ay ngay kasugfunanan ban wa malong sa em ngay kasugfunanan te, ‘Wam kataip ya sas Yawi.’
28“Ay ngay kasugfunanan ban nu nalong way takatanya, em ngay kasugfunanan ban gbalus te, ‘Em ngay mangaguyang nawat tuy fag fagirugan, kata fagirugan laman sas Yawi, bunwa laman fagnangirugan em ngay fanggalangun ay tiba ya em fanggalangun, nu bunway sik famasaful sa emi ay sa ayu te, sadi way tam fagsegan fag Dius.’
29“Wami e algan at nanfamabo ay at yud gfaning Yawi siginan nu gfawat ami fagnangirugan em ngay fanggalangun ay gutluan fag fanggalangun ay tiba yak fanggalangun, tagsaman tagsis salubangan bale ramit fagnansegan Yawi tam Dius fag fagirugan.”
30Finekas fag tagfon fanggalangun ay ngay tagfangguna Israel at ngay kalongan guseganan nu nadungug Rubin ay Gad ay sik wabilug Manase at kasugfunanan at nalong. 31Ay Finekas fag tagfon fanggalangun, Elyasar at baguama, nalong te, “Katsi nasaful ami te, Yawi galo tua antam, ay diam nafamabo anya. Katsi nafalangfe am ngay taw Israel siginan Yawi at fandotaman.”
32Sanya ginan Finekas fag tagfon fanggalangun ay ngay tagfangguna taw Israel at ngay kalongan noli sas Kanaan ay nalong sa sangay taw Israel sabaliwa at nakamatoan sas Rubin ay Gad ay Manase at kasugfunanan sis talun Gilyad. 33Ay kanya fagayu nu nadungug takatanya, guseganan gseg Yawi. Ay kanya fagayu wa nakamatoan ya sabaliwa nu namawayan ay nu nangago Rubin ay Gad at ngay kasugfunanan at talun ay at fagbanwanan.
34Rubin ay Gad at kasugfunanan nafangayan kanya fag fagirugan te, “Tagfatuyan,” aroro nalong te, “Tuy tagfatuyan sa antam fagayu te, Yawi tam Dius.”
Currently Selected:
Uswe 22: OCCT
Highlight
Copy
Compare
Share
Want to have your highlights saved across all your devices? Sign up or sign in
Copyright © 2021 by OMF International, Philippines
