Uswe 1
1
Nu Gfalganan laman Nangagbilug Kanaan
1Muisis, Yawi at fagsuguan nu nbul wan, Yawi nalong sas Uswe, Nun at baguama te, 2“Ku fagsuguan Muisis anbul wan. Nu katanya, katsi, o ay anggan ngay taw Israel falganani, difei Liskung Urdan sa ku fon ban ayu fag talun. 3Gfon kban sa ayu fagayu ay nadasug fag talun, kata ku nafatuyanan sas Muisis. 4Ay fagbanwanan ban gfasigad siginans talun at yud e taw tagsabaliwas siun fag alvngvdan sitsigon sangay buksul Lebanun tagsabaliwas wala, ay siginans Eufrates, kafag liskung daul, sabaliwas fakamenitan sitsigons Dagat Mediteranyu tagsas fakayabian baliwa, ay anggan sa sangay taw Ket at talun.
5“Wa ban e mababo emu kaduge o gleleg. Gufud kban gugat emu kata nu gufud au Muisis. Kwa ban gubun ay gfabayan emu. 6Maksvni tua ay maseganamai, aroro o wan at nanfunan ngay taw, laman ban kanya fagayu magbilug ku nafatuyanan sat ngay mangaguyang fag talun. 7Maksvni tua ay maseganamai. Faningi fia fagayu ku suguan ku nafon sa ku fagsuguan Muisis. Lag o kalyam, laman nusnga setaw am fagnamakamulunun gbabo tuo. 8Lag o kalyam gtap Dius at Faugali. Amatangani tua gugat kayu menit ay yabi, laman sumaful tuo gfaning fagayu at marirukan sanya. Nu katanya tua ban am fakamulun, umkaksvn tua ban o ay gbabo. 9Amatangi gugat ku suguan emu: maksvni tua ay maseganamai. Lag o kalimu ay kamomuy aroro au, Yawi am Dius, tagufud emu nusnga nday ban o.”
10Nu katanya, Uswe nasugu sas Israel at ngay tagfangguna te, 11“Loi sa sangay taw at ngay bale ay nanlong am sa anya fagayu te, ‘Falganani ngay fakonun aroro si bans fatuluk menit, nandife tam Liskung Urdan laman nangagbilug tam Dius at nafon antam fag talun.’ ”
12Uswe nalong sas Rubin ay Gad at ngay kasugfunanan ay anggan sas Manase fag wabilug kasugfunanan te, 13“Amatangi gugat Muisis, Yawi at fagsuguan at nalong ayu. Kanya nalong te, ay Dius Yawi gfon wan sa ayu ste fag talun laman ay fagfiangalayan. 14Ay ngay mangena ay ay ngay sisian anggan ay ngay fagbaugun gbanwan yay ste sis fakamenitan baliwa fag tigyangan Liskung Urdan. Dewa katanya, ay ngay tagfawayan gfangguna ay ngay kaiban nandife Urdan. Ay am, gubuki anya fagayu 15yakmay Yawi nafon anya fagayu at fagfiangalayan kata at nafon sa ayu. Sanya ginan, am, masine nu kafoli ban am stie sfakamenitan baliwa fag tigyangan Liskung Urdan, laman nangagbilug ste fag talun, Yawi at fagsuguan Muisis at nafon sa ayu.”
16Ay kanya fagayu gbalus Uswe te, “Namakamulun ban mi fagayu am suguan ay sanya ban ami nusnga nday nu gsugu o emi. 17Gfaning ban mi emu kata nu gfaning ami Muisis. Ay am Dius Yawi nangus galo gugat emu kata nu galo Muisis. 18E gfabul ban nusnga sinu takamabo emu ay at yud gfaning am ngay suguan. Nu katanya, maksvni tua ay maseganamai!”
Currently Selected:
Uswe 1: OCCT
Highlight
Copy
Compare
Share
Want to have your highlights saved across all your devices? Sign up or sign in
Copyright © 2021 by OMF International, Philippines
