Uswe 11
11
Ngay Taw Israel Nagbilug Fagayu Furuan sas Alvngvdan
1Abin, talun Kasur at fun nu nadungug te, ngay taw Israel nababo, kanya nafadasug sik rirukan sas Ubab, Madun at fun, ay sas Simrun ay Aksaf at ngay fun, 2ay sa sangay fun tagsi sangay buksul sis fawalan fag alvngvdan, sa sangay fun tagsis datag Urdan#11:2 datag Urdan: sas Ebreu, Araba. sabaliwas fasiunan fag alvngvdan Lino Galilea,#11:2 Galilea: sas Ebreu, Kineret. ay sa sangay fun si sangay buksul tagsis fakayabian,#11:2 buksul tagsis fakayabian: sas Ebreu, Sefela. Anggan t.16. ay sa sangay fun tagsis tigyangan Dur sabaliwa sfakayabian, 3sas Kanaan at ngay fun sas fakamenitan baliwa tagsis Liskung Urdan at fakayabian, sa sangay taw Amur at fun, taw Ket at fun, taw Peres at fun, ay sa sangay taw Ebus at fun tagbanwan sat buid, ay sa sangay taw Kib at fun tagbanwan sis day Buksul Ermun tagsis datag Mispa. 4Kanya fag ngay fun andasug, gadgaloan at ngay tagfawayan ngayu, kayu lagnas sis tigyangan dagat. Ay ngayu yangay at kabayu ay at faguyudan fangawayan. 5Kanya fagayu anful ay nawat at ngay bale ramit munakbang sis bulbug Merum laman namawayan ngay taw Israel.
6Yawi nalong sas Uswe te, “Lag o kalimu anya fagayu, aroro balabag ban kata katsi fag buknga, gfon kwan sa sangay taw Israel kanya fag ngay taw laman gfabul. Faalbii ban at ngay kabayu ay irugi at ngay faguyudan.”
7Nu katanya, Uswe ay at ngay tagfawayan masakit namawayan kanya fag ngay taw sas day bulbug Merum. 8Ay Yawi nafababo ngay taw Israel sat ngay fawayan. Ay kanya fagayu nafafalo at ngay fawayan nu dyakmay andasug sa tagbia fag furuan Sidun ay Misrefut-Maim sitsigons datag Mispa at fakamenitan baliwa. Kanya fagayu nafabul at ngay fawayan yakmay namin. 9Ay Uswe nafakamulun kata Yawi at suguan laman sa anya fagayu: kanya fagayu nafaalbi at ngay kabayu ay nairug at ngay faguyudan.
10Sanya ginan, Uswe ay at ngay tagfawayan anfoli ay nanangagbilug furuan Kasur ay nafabul at fun. (Ginanya fag buknga Asur wan takadungug fag talun sas fagayu talun.) 11Uswe ay at ngay tagfawayan nafabul yangay fagayu taw Kasur ay we gleleg ya. Ay nairug wan kanya fag furuan daul.
12Kata Yawi at fagsuguan Muisis at longan, Uswe narasras fagayu furuan ayu daul. Ay nafabul fagayu tagbanwan sanya, anggan yangay at ngay fun. 13Dewa katanya, ngay taw Israel wa nairug ngay furuan tagsi sangay buksul, furuan Kasur way lang at nairug. 14Ngay taw Israel nabul kafag ngay furuan ayu daul at ngay ramraman ay at ngay fagbaugun. Dewa katanya, kanya fagayu nafabul fagayu tagbanwan sanya, ay we gleleg ya. 15Katanya Yawi at suguan sas Muisis, ay katanya yangay Muisis at suguan sas Uswe. Uswe nafakamulun fagayu Yawi at suguan sas Muisis. 16Nu katanya, Uswe nagbilug fagdaul sanya fag daga: ngay buksul, ay fagdaul talun Negeb, ay fagdaul talun Gusen, ay ngay buksul tagsas fakayabian baliwa, ay datag Urdan, ay ngay buksul ay anggan Israel fag ngay buksul. 17At fagagbilugun fag talun siginans buksul Alak gundaud sas Seir sitsigons Baal-Gad ay sas datag Lebanun sas fun Buksul Ermun. Ay kanya fagayu nafabul kanya fag ngay talun at fun, 18gina gfawayan ngaduge kbuknga. 19We mafagadgalangan ngay taw Israel laman nanget fagmanabayanun nu bunway taw Kib tagbanwan sis furuan Gibyun. Ay nafabul wan fagayu talun at taw at yud ansadi sa sangay taw Israel. 20Aroro Yawi nafaogat kanya fag ngay talun at taw at ngay amatanganan laman namawayan ngay taw Israel. Nu katanya, kata Yawi at suguan sas Muisis, ngay taw Israel nafabul wan yud e afanyu kanya fag ngay talun at taw.
21Ginanya fag buknga, Uswe nanamawayan ngay taw Anak tagbanwan sit buid baliwa fag afud furuan Kebrun, furuan Debir ay furuan Anab, ay sas fagayu buksul tagsis Uda ay Israel. Uswe nafabul wan fagayu ay narasras at ngay furuan. 22Ngay taw Anak tagbanwan sis taw Israel at fagbanwanan ban fag daga namin wan, dewa katanya, e sawad yay sis furuan Gasa, ay Gat ay Asdud.
23Nu katanya, Uswe nagbilug fagdaul talun kata Yawi at suguan sas Muisis. Yawi nafon kanya fag talun sa sangay taw Israel laman at fagagbilugun, ay kanya fagayu nafae afud sas galay kasugfunanan.
Ay anragang wan nu gawayan sas fagdaul talun.
Currently Selected:
Uswe 11: OCCT
Highlight
Copy
Compare
Share
Want to have your highlights saved across all your devices? Sign up or sign in
Copyright © 2021 by OMF International, Philippines
