Ub 9
9
Ub Naringang
1Ub nabalus te,
2“Matuyan am nalong, dewa katanya, sinu at mafatuyan te, kanya we asalanan sas Dius?
3We fagmafakamulunun nusnga sinu takaylat gfabadbaboan Dius, aroro sa sik libuk fagintoun siginans Dius, we mafabalus nusdi at sadi.
4Dius e fagsafulun ay e fagmabalyananun. Sinu yaro at mafawayan ay siwa anya fagmababoun?
5Kanya nauig wa vtv ngay buksul, ay at kaksvnan nu kadotama kanya narufa wan kafag ngay buksul.
6Kanya mafauig daga, anggan at fagtungkudan.
7Kanya nu nasugu way, menit wa kasure ay galeme wa gdamlag.
8Kanya tua at narafad banwa ay at mafaragang lugwak.
9Dius wan at nawat ngay tagfulan fag ngay galeme, at ngayan Usu, Uryun, ay Pleyades, anggan ngay galeme tagsabaliwas fasiunan fag alvngvdan.
10Dius gfasure nusnga setaw at madulo tam fagyudun saful, ay at ngay madulo yud e mafatap ya at kayuan.
11Dius nu nadalan sa angku, kwe nalag ay kwe namatang ay dewa nadalan sa ku akbang, kwa nasaful.
12Kanya nu e fakaylatun gbul we masalag anya. Nu katanya, sinu yaro at mafamayud sat ngay nafakamulun.
13Dius nu ndotama wa gfaragang ya. Dewa Rakab#9:13 Rakab: ste at masuad te, Dagat ay Igiptu. fag fagsegan takatas ule daul at ngay fagsuguan garungan nu kalimu Dius.
14Nu katanya, tain ro nu gbalus au Dius, ay daginan ro sik longan laman ku famabadbaboan anya?
15Deyud kro e asalanan, kwa mabalabag ku sadili, ku balyawvtan namainfanyuan kway sas Dius ku taginsaful.
16Dewa au get sa anya te, gkamatoan ami, ay dewa naylat, kanya ro wa gdungugan angku.
17Aroro kanya gfaidapan angku kata fulug nu gfae fagidapun. Ay kanya nafamut yay ku fagidapun, dewa au yay e malong.
18Arvs kwa maengasan ya aroro sat nafadasug fag fagidapun sa angku.
19Nu sa baliwas fagmagarasun, we mababo anya. Ay nu nasas fagfawabiluganan, sinu at mafabadbaboan anya?
20Kdoma e asalanan, dewa katanya, kafaurianan kway siginan ku ngay nalong.
21We fanambagun sa angku dewa au yud e asalanan. Kauri kwan ku leleg.
22At masine ay at mauri fag taw gsudan way. Aroro ngap gsud way gafaurianan.
23Sik faurianan nu ndasug ay masakit nafabul at matuyan fag taw, Dius gfalingun kafag taw nu yud e fagsegun ya.
24Kanya nafatigwanan fagdaul daga sat mauri fag ngay taw, ay kanya nataup ngay tagfawabilugan at ngay mata laman wa matuyan ya nu ginsaful. Nu dway Dius at nafakamulun tuy, sinu tua ro?
25Ku ngay menit masakit kata sik taglagyu, ay kalangfe way vtv, ay we nfasludan at masine.
26Ay nu glangfe masakit mandi, kata at masakit fag sakayan lino, ay kata sik bio tagabanganan nanyukfu at fagnangagatun.
27Nafaragang koma nu gfandeng au ay gidapan, ay guseganan koma,
28dewa katanya, kalimu kyay gugat ku ngay nadalan fag ngay fagidapun, aroro ngap nasaful au te, kanya gtap angku te, sik tagasalanan.
29Kanya nu glong di te, e asalanan kyay, wain yaro ku fagfabadbaboanun yay gugat laman sa ku sadili?
30Dewa ro au nasugbu fagdaul ku bilug sasad lino, ay nafegus ku ngay daluap,
31kanya ngap namatong yay gugat angku sat malifak fag alian, dewa ku sadili lanbung kapla kway.
32Dius bundi sik taw kata angku, laman mabalus au anya, kwa yangay mabalus ay mafasas faginsafulan.
33E nanwabilug nangus emi laman namasadi emi fagdua.
34Kanya nangus gfaragang Dius nu gfalang angku, laman kwa kalimu ya.
35Ay nu katanya tua ro, kwa kalimu ya namakamatoan anya, dewa katanya katsi, kya mafakamulun takatanya.
Currently Selected:
Ub 9: OCCT
Highlight
Copy
Compare
Share
Want to have your highlights saved across all your devices? Sign up or sign in
Copyright © 2021 by OMF International, Philippines
