Ub 8
8
Bildad Naringang
1Bildad tagsiginans furuan Sua nabalus te,
2“Seduge ya ban nu garingang o takatanya? We masuad am ngay aringang.
3At mabalyanan fag Dius wa yud gfae masuad fagmatuyanun ay fagmasineun.
4Am ngay sisian anke asalanan sas Dius, nu katanya, at kindasug fag faurianan kasakan way sa anya fagayu.
5Dewa katanya, nu kakbang tuo sas Dius ay gfainfanyuan get sa anya,
6ay nu gugali tuo at matuyan ay at masine, Dius ggubuk ay gfafoli emu kata ebi ginan am kayaunanan.
7At fagnamonun sa emu fag ramraman gtungud tua ebi am ramraman.
8Ay intoi sat ngay mafagtainan ay nanginsaful o sabaliwa at ngay mangaguyang at fagsafulun.
9Aroro kata yay nu yud glugo nu kasalug tam ay kurang yay tam fagsafulun, ay tam ngay menit ste swa daga kata way sik aninu at masakit kalyam.
10Ay dungugani kanya fagayu nu glong sa emu at ngay fagsafulun.
11Sik tanum tagsisad mamam kayango way nu dway e mamam ya.
12Kanya fag tanum kalangke wa vtv dewa bagu gtugbung deyud buknga famulan.
13Katanya yay sik taw at natalyuyan Dius, wa ban e fagsegun ya.
14Kanya at ngay fagsegun umrasras ban kata sik baginawa at bale.
15Ay kanya nu nasarare sanya fag bale kasuak way, ay nu ndafut kagatvng way vtv.
16Ngay taw nu glag, kanya masine tua at kayaunanan, kata sik tanum at marugme ay menit at fagdamlagun tua gugat, ay at ngay sanga glangfad sas fagdaul tanuman.
17At ngay lalid gulitan gang, ay kaylat sa tagagangun.
18Dewa katanya, nu e nagunut wan, nalyam wan.
19Katanya yangay at leleg at fakatabuan, ay e sik tanum natubus yay anya si aro taw at fagtugbungan.
20At mafanud, Dius di gaiyan sik taw at matuyan. Ay wa ggubuk at mauri fag taw.
21Kanya gdog yay gfasa emu fagusegananun, ay gfanagsag ban o guro.
22Kanya ban namapla fagayu takauri emu ay gfasaruayan kanya fag ngay talananan.”
Currently Selected:
Ub 8: OCCT
Highlight
Copy
Compare
Share
Want to have your highlights saved across all your devices? Sign up or sign in
Copyright © 2021 by OMF International, Philippines
