Ub 7
7
1Taw at leleg ste swa daga maidap, kata sik tagfakamulun tagfaebayad.
2Kata sik fagsuguan takaylat gtungkud, ay kata yangay sik tagfakamulun tagfanya at bulan,
3kata kanya ku kayaunanan; ngayu wak magdanun nu gidapan au, ay fagngabak yabi kabalu kwan.
4Kaduge au gtaygilidan, gamatangan au te, seduge ya nu kamenit? Maranan way at buknga nu gleleganan, ay gbidbilingan au sitsigons balabag.
5Fagdaul ku bilug gauludun ay ku balat kalusi, ay ku ngay baktvk gakabuksangun wan.
Ub Gdarangin sas Dius
6Ku leleg, kata menit masakit nu kalangfe, yud e fagsegun. Ay amasakit yap tua sik fangawat lanbung.
7Dius, amatangi ku leleg aroro kata way sik engasan, ay kwe fagmanabayanun ya.
8Katsi e lagan yay o angku, ay abandi ban wo e lagan ya. Grvbvy ban o angku, ay wa ban o e lagan ya.
9Nu setain ngay linyabu nu kalyam, katanya yangay ngay kinbul wa kafoli ya.
10Kanya wa guli ya sat bale, ay ngay tagtoglag anya wa ban gamatang ya anya.
11Nu katanya, kwa mafafaragang nu garingang au, aroro ku dubdub kaptus wan, ay nu masine gelongan kwan ku fakauriun si ku amatanganan.
12Dius, wain ro am fagulitun yay angku? O nunda sik tagfangagat kway tagsisad dagat?
13Nu kaylat kwan gtaygilidan laman gfafia ku fagidapun,
14gfalimu o angku siginan ngay taginfan ay am fagyafafasludanun.
15Nu katanya, kaylat kwan nu e gturis ku liug; kaylat kwan kabul, nu gamut gleleg kyay gugat gidapan.
16Kauri kwan ku leleg ay kwa kaylat ya gleleg. Ay fabayani wa angku aroro ku leleg we tungkul ya.
17Wain yay am fakaksvnun tua nya nu gfae masuad o ay kafanyu sik taw?
18Ginsaful o gugat anya kayu balabag ay gfaskud o anya sas fagayu buknga.
19Nu masine di, fabayani yap angku dewa way sik buknga.
20Tagulit ngay taw, nu nke asalanan kway sa emu, nataw ku asalanan? Wain am fagnafiliun angku laman am fagfaidapanun? O gfaidapan au emu?
21Wain am fagyudun gfalyam ku asalanan? Wa glugo ya nu kabul au, ay dewa ban o grvbvy angku, wa ban o e lagan ya.”
Currently Selected:
Ub 7: OCCT
Highlight
Copy
Compare
Share
Want to have your highlights saved across all your devices? Sign up or sign in
Copyright © 2021 by OMF International, Philippines
