Ub 6
6
Ub Naringang
1Ay Ub nabalus te,
2“Nu e ginsaful di te, se aksvn ku fagagwantanun, ay nu e gfabudbungguan di ku nadalan fag fagidapun,
3ku fagidapun amabyat yap tua slagnas sis tigyangan dagat. Kanya wan ku fagnalongun at mauri.
4Aroro at mabalyanan fag Dius kata wa nu nafana angku at maganga fag godun ay fagdaul ku bilug naganga. Ay natayukan au.
5O kwa ro manga masine gfandeng? Dewa tagsis talun fag kabayu ay fag baka guni wan, way e makmak ya.
6O kon o sik fakonun at yud kanamnam nu dway e suglat barara? Ay o kanamnam iklug at malaksi fag afud?
7Au kwa yangay kaylat kon takatanya. Au kasuya kway takatanya.
8Sinu manga at mafon angku ku fagetun? Dius nangus gfon sa angku ku fakaylatun.
9Dius nangus grufa wan angku, ay at daluap nangus wa gaduanun gfabul angku.
10Nu nfasludan di takatanya, kasun kro ay guseganan, dewa maksvn nu gidapan au, aroro nafoyung ktua at yud e malong fag Dius at longan.
11Kwe fagmabitsugun ya gfanya. Wain yay at fagfadugeun gugat nu gleleg au?
12Ku fagmabitsugun wa kaogat ya sik gang, ay ku bilug wa nkawat sik tansu.
13Kwe fagmabitsugun ya laman gfalangfe ku sadili. Fagayu at nafon angku fanggubukun we si ya angku.
14Sik taw takabalu, at ngay fagadgalangan masine nu ggubuk anya, kanya dewa natalyuyan at mabalyanan fag Dius.
15Ku ngay faduksay wa matuyan sa angku, kata way sik liskung tagfanlugwak ay takalanggang vtv.
16Kafag liskung gsawe nu nkapnu way at marios fag mamam.
17Nu mangune wan matat way lang ay nu maroy wan, kalanggang way.
18Ngay taglao nu nadalan sanya fag liskung, we fanginum, nu katanya, nu ndasug sas talun at yud e taw kanya fagayu kabul.
19Ngay tagfalao siginans furuan Tema ay Syeba gseg te, nanginum ro sanya fag liskung.
20Dewa katanya, kanya fagayu anmomuy aroro gamatangan te, sanya e mamam way, ay aroro mangaro we mamam.
21Nakata am kafag liskung, at yud nagubuk ya angku. Abat ngate, nu nalag am ku kayaunanan anlimu wayam.
22Ay wain? O nunda get au ay famonun, ay o nunda gfainfanyuan au ayu te, gubuki angku siginan ay ngay ramraman?
23Ay naet au gubuk sa ayu te, ‘Falangfei angku sa ku ngay fawayan at yud e afanyu, ay siginan at mafansugu fag taw at daluap’?
24Longi angku nataw ku nasalan, ay gdungugan kro. Fayamagi angku ku ngay nakurang.
25Dewa ro mauri gdungug ay fagyalongun nu kanya tua ngap at matuyan. Dewa katanya, ay fantabugan sa angku wa mafanud ay wam mafatuyan.
26O kaylat am gfakasakan ku ngay nalong, ay gamatangan am manga te, we tungkul sik taw tagidapan at longan?
27Ay wain, o matuyan wam? Nafasik fagsuguan am sik sisian at yud e fagtainan ya, ay nafae bayad am ay fagadgalangan.
28Damai sa angku. O nu gdama am kamuagan au sa ayu?
29Faragangi wan nu gfauri am angku aroro kwa ngap e asalanan.
30O nu glong am kamuagan au? Saful ktua nu setain at masine ay at mauri.
Currently Selected:
Ub 6: OCCT
Highlight
Copy
Compare
Share
Want to have your highlights saved across all your devices? Sign up or sign in
Copyright © 2021 by OMF International, Philippines
