Ub 5
5
1Ub, dewa o get fanggubukun we ggubuk emu, dewa tagbarita#5:1 tagbarita: sas Ebreu, ngay yud e malong. wa nanggubuk emu.
2Fagfangadotamaun ay fagfangafanawaun tagfabul at mamomuy ay yud e fagsafulun fag ngay taw.
3Nalag au sik taw at yud mamatanganan nu mabayan, ay Dius nu gfauri kanya fag taw ay at talanan.
4Ay at ngay sisian we fagnanlagyuan ya ay wa yangay e ggubuk ya anya fagayu gina sis faginsafulan.
5Ay tiba way ban ktaw takon at gutluan. Ay anggan at ngay tanum at rawvg tagsis wa dugi, takalunus way fag ngay taw at nangon. Ay ngay taw ban tagfangalabian ramraman gago wan kafag taw at ngay ramraman.
6Fagidapun ay fagmauriun wa siginan sad daga.
7Taw gidapan wan siginan ngay nu kasalug, kata sik singsing afuy at nalayug sat tungud.
8Nu au di emu, nangakbang kwan sas Dius, laman namoyung sa anya ku kayaunanan.
9Kanya at nafakamulun nusnga setaw at madulo at yud e mafayamag, ay at yud katap ya nu gfalangfe.
10Kanya nafaarak sas fagdaul daga ay sa tam ngay gamasun.
11Kanya gfaksvn ngay taw takamababaun ay kafanyu at mafanyuan fag ngay taw.
12Kanya nafae yud e masuad takamuag fag ngay taw at algan, laman wa mfasludan at ngay algan.
13Kanya saful way te, at ke fagsafulun kamasaweun way, ay nasalag way ngay tagfandaya at algan.
14Kanya fagayu wa glag dewa mayamag, ay dewa sis buknga menit galafangan way lang nu glao kata gina mayabi.
15Dius gfalangfe ngay taw at yud e kwa siginans fagidapun, ay siginan at mabalyanan fag ngay taw tagfalingun anya fagayu.
16Nu katanya, ngay taw at yud e kwa e fagsegun tua, ay gaiyan wan at mauri fag ngay taw.
17Mauseganan sik taw, Dius nu nafalyam tua at ngay nasalan. Nu katanya, lag o glong te, at mabalyanan fag Dius nu gfasine am ugali mauri way.
18Aroro sia yay tagfafia sat nafae fakarukan, ay kanya yangay tagfasun sat nafaidapan fag ngay taw.
19Kanya gfalangfe tua gugat emu galay o anke faurianan ay anke fakalimuun.
20Kanya gfalangfe emu galay e fanlunus ay galay e gawayan.
21Kanya ggubuk emu, gina tibak taw gfalingun emu, ay di o kalimu dewa andasug faurianan.
22Manabayan tuo dewa e fanlunus ay e faurianan, ay wo kalimu ya tagsis talun fag ngay mangilafang.
23Aroro kafag ngay mangilafang wa manangagat ya emu, ay di ban o gidapan ya gtanum dewa si tagagangun fag gamasun.
24Ay am fag talanan manabayan tua nu gbanwan am, ay di e kalyam am ngay fagbaugun.
25Ay am ngay kasugfunanan ban ngayu tua, kayu ngay makmak sas fagdaul daga.
26Ay gleleg tua ban o gugat yakmay sit nafalganan fag buknga.
27Kata em nadalan ay em nasaful tuy fagayu mafanud, nu katanya, dungugani tua ay fakamuluni laman ban manabayan tuo gugat.”
Currently Selected:
Ub 5: OCCT
Highlight
Copy
Compare
Share
Want to have your highlights saved across all your devices? Sign up or sign in
Copyright © 2021 by OMF International, Philippines
