Ub 4
4
Elifas Naringang
1Ay Elifas tagsiginans Teman nabalus te,
2“O magwanta ro wo gdungugan ku fagyalongun? Kwa mafaragang ya.
3Ebi nagubuk o ngayuk taw laman gafanud sas Dius ay nafabitsug o at mamomuy ay takalufuy.
4Ay ginanya am ngay longan wan tagfaksvn kanya fagayu, ay tagbakvd fagayu takataid.
5Ay katsi andasug wan sa emu kafag ngay fagidapun, ay o wan tagidapan ay takabalu.
6O nunda nu gsuyu tuo Dius ay gugali at matuyan, o wa gfae fagafanudun ay gfae fagsegun emu?
7Ay katsi, amatangani fia. O nunda e taw at yud e asalanan at kinfaurianan?
8Sa ku nalag ay ku nasaful, ngay taw tagfakamulun at mauri, kanya ban fagayu umfaurianan.
9Dius ban nu nafadasug at dotama sa kafag ngay taw, kanya ban fagayu umbul.
10Tuy fag ngay taw kata ngay liun nu gngarngar, dewa katanya, umringo way ban at ngay bagang.
11Ay kata yangay ngay liun kabul sis lunus ay at ngay riangan gfanaruayan way lang.
12E ndasug sa angku sik longan at mafaydayuanan ay kwa nyamag, ay e nainas angku,
13siginan sik taginfan, gina ngay taw gtiug.
14Nu katanya, anlimu au ay gtadtaruyan, ay at kaksvnan ku ngay bini nauigan wan.
15E nadalan si ku daga salubangan, ay anlimu au maksvn ay narinun.
16Ay kanya anlindug si ku daga salubangan, dewa katanya, kwa natoglag, ay nadungug kngap sik aringang ginasan te,
17‘O nunda sik taw matuyan sis Dius at daga salubangan? Ay o nunda sik taw we malong sat nawat anya at daga salubangan?
18Dius ro nu gaduanun way sat fagsuguan fia fag ngay tagbarita, ay nu nasaful way kafag ngay tagbarita at fagyudun mamatanganan,
19kaugat wa ro kanya nu gaduanun sat nawat fag ngay taw tagsiginan ways daga, ay takaturis way kata sik fatung.
20Kanya dewa yay gleleg sis balabag sad yabi anbul wan ay kabavn wa kalag ya.
21Ay kata sik bale ramit at kinrasras wan. Kanya fagayu anbul gina yay yud e fagsafulun.’
Currently Selected:
Ub 4: OCCT
Highlight
Copy
Compare
Share
Want to have your highlights saved across all your devices? Sign up or sign in
Copyright © 2021 by OMF International, Philippines
