Ub 3
3
Ub Naringang
1Nu glugo wan, Ub nalong at mauri sabaliwa at fangasalug fag menit. 2Kanya nalong te,
3“Kauri au ku fangasalug fag menit.
4Ginanya nangus fag menit madulum way gugat. Nangus tagsis banwa fag Dius wa namatang ya kafag menit.
5Ginanya nangus madulum way gugat ay mannga linyabu gfarum way gugat menit, ay fagmadulumun nangus nafarum wan menit.
6Ay ku fangasalug nangus fag yabi wa ntap sa tibak yabi, ay wa yangay nangus anriruk ya sas fagrirukan ngay magdanun ay ngay banwa.
7Kwa nangus ansalug ya ginanya fag yabi, satu ro ginanya we nauseganan ya.
8Tagabara nangus fag ngay taw at mafulo Libyatan,#3:8 Libyatan: Sik takamauri ay sik tagbia fag mangilafang sis dagat. Anggan 41:1,12; Alubad 74:14, 104:26; Isayas 27:1. nafauri wan kafag yabi.
9Ay ginanya nangus gina gakamenitun wa nsure ya tagurabas ay wa nangus anyamag ya ginanya fag balabag.
10Kauri au ku fangasalug fag menit aroro wa nafaragang nu kasalug au, ay satu ro kwa naidapan kata katsi.
11Wain ku fagyudun anbul gina au gduksun siginan ku mina at basad ungdan?
12Wain ku mina faginfanyuun ay fagnafasusuun yay angku?
13Satu nu nbul kdi ginanya, katsi ro manabayan kway fia gfiangalay,
14gasfuan ngay fun ay ngay tagfangguna at kinbul wan at nafawat ngay bale ayu daul gina gfunan, ay katsi at kinkiklas wan.
15Satu ro manabayan kwan kata ngay funan at nafapnu sat ngay bale gintu ay sanbung salapi.
16Masine nu kata kdi ngap ngay sisian at kinbul wan gina kasalug, ay e nafoli wan gina yay yud nalag yamag.
17Ngay taw mauri at kinbul wan wa mafakamulun ya at mauri sis fagfolian, ay takalufuy fag ngay taw at kinbul wan, gfiangalay wan.
18At natabanan fag ngay taw at kinbul wan gfiangalay yangay sanya, ay kanya fagayu wa gdungug ya ngay taw tagfaidapan anya fagayu gfafakamulun.
19Ay sanya yangay ngay taw takadungug ay at yud kadungug. Ay ngay fagsuguan wa gafagsuguanan ya at ngay tagfayafun.
20Wain Dius at fagfonun yay gugat fagmayamagun ay leleg sa sangay taw at ke fagagwantanun ay tagidapan?
21Kanya fagayu nu kaylat nangabul gtungud yay nu gyabulun ramraman, ay dewa katanya, kanya fagayu ya kabul.
22Kanya fagayu guseganan nu nbul di ay nu e nanamoli di anya fagayu.
23Wain Dius at fagfonun yay fagmayamagun sas taw at yud saful at fakadasugan?
24Kwa kaylat ya gfangon aroro maksvn nu gidapan au gamatangan, at kaksvnan gwayway au gfandeng.
25Ay fagayu ku fakalimuun anfasludan wan sa angku.
26Kwe fagmanabayanun ya, ay kwa kagwanta ya. Kwa batang ya gfiangalay abat ngate gafanawa kway gugat.”
Currently Selected:
Ub 3: OCCT
Highlight
Copy
Compare
Share
Want to have your highlights saved across all your devices? Sign up or sign in
Copyright © 2021 by OMF International, Philippines
