Ub 38
38
Yawi Naringang
1Sanya ginan, Yawi nabalus Ub siginan sik maksvn fag tagmara tagbaribungan; kanya glong te,
2“Wain am fagawabiluganun sa ku fagsafulun? Am ngay longan tagfatuyan te, wo e fagsafulun.
3Falganani, nanginto kro sa emu, ay balusi ro angku.
4Inda o ebi gina au kawat fagdaul daga at fagtungkudan? Nu e fagsafulun o, longi angku.
5O nasaful o sinu at nafalganan daga at fagtungkudan ay at kadaulan ay at fatuan?
6Sinu tagbakvd daga at fagtungkudan, ay sinu at nafatungkud sanya kafag fagfatungkudan daga,
7gina ngay tagurabas gasfuan gseg galubadan, ay ngay tagbarita gasfuan guro guseganan?
8Sinu at nafae famalabag dagat, ay at nafalugwak siginan sad fagngabasadan?
9Au wan at nawat at madamvl fag linyabu, laman fagmadulumun tagtabun dagat.
10Nafae fatuan au dagat kata sik sakbawan at madingdingan ay nafae famatawad au.
11Nalong au sas dagat te, ‘Ste way o tsigon, lag o glangfe; ste way tsigon am tagbia fag ngay lugwak.’
12O batang wo gsugu te, ‘Asurei menit,’
13laman gyamag sas fagdaul daga, ay namaragang at ngay mauri at fakamulun gina madulum?
14Aroro menit nu nsure, fagdaul daga kalag kata sik famasaful fag fanriruk ay sik lanbung at mafalutan.
15Yamag gfaragang at mauri fag ngay taw, laman kanya fagayu di gfakamulun at mauri sat ngay iba.
16O batang wo nangadasug sas bukbuan dagat, ay sas fagngabasadan?
17O e nafoyung wa emu sakbawan tagsabaliwa ngay kinbul at talun?
18O nasaful o fagdaul daga at kadaulan? Longi angku nu nasaful o.
19O saful o daginan yamag ay dulum?
20O mafafoli ro wo kanya fagayu siginan at fakadasugan?
21O kin ngaro, nasaful wo tuy fagayu, aroro ansalug wo gina kawat tuy fagayu, ay ngaduge wa ngaro nu gleleg o.
22O batang wo sa sangay fagfungsuan arak at marios ay yelu fag arak takadaul ngay gang ayu sirut?
23Kafag arak at marios ku nafalganan galay e fagidapun ay e awayan.
24O saful o dalan tagsas limbad at fakadasugan ay tagmara tagsiginan baliwa sfakamenitan?
25Sinu at nawat arak ay fulug at dalan?
26Sinu at nafae arak sat yud e gbanwan fag talun?
27Sinu at nafae arak sat yud e gbanwan fag talun, laman makmak gtugbung?
28Sinu arak ay damug at mama?
29Ay daginan at kinsik yelu fag damug,
30gina mamam matugas kata sik gang, ay dagat at mamam tagsit tungud baliwa matugas yangay?
31O makatu ro wo grabing ay gluas galeme tagfulan Pleyades ay Uriun?
32O mafasure ro wo ngay galeme sit kasakan fag buknga? O ay mafafoyung ro wo dalan sa sangay tagfulan fag ngay galeme at ngayan te, Tagbia ay Talay fag Usu?
33O saful wayo sas banwa at ngay ugali ay o mafakamulun o takatanya sas fagdaul daga?
34O masugu o sas linyabu te, fae araki?
35O masugu o sas limbad te, ‘Limbadi’ ay o gfaning emu?
36Sinu at nafon sas taw fagsafulun ay fagmatogdungugun?
37Sinu tagsaful gtap ngay linyabu? Sinu at mafaugwag mamam siginans banwa,
38laman at magong fag ngay lukbu umsik ngay lifak at mabilug?
39O marvbvy o ngay liun at fakonun laman kanya fagayu kapsug
40kaduge kanya fagayu gsuksuan sa sangay luib ay sa sangay fun kayu ayu sirut?
41Sinu tagfafangon ngay ugak, kanya fagayu nu kalunus wan ay at ngay riangan nu naet fakonun sa angku?
Currently Selected:
Ub 38: OCCT
Highlight
Copy
Compare
Share
Want to have your highlights saved across all your devices? Sign up or sign in
Copyright © 2021 by OMF International, Philippines
