Ub 37
37
1Nu gfulug wan ku dubdub gsubsubuan.
2Dungugani, Dius at aringang kalung kata sik lingsi.
3Kanya gfae limbad sas fagdaul banwa, ay kadasug sas fungfung daga.
4Ay sanya ginan e kadungug sik fawas, Dius at aringang kata sik lingsi, ay kanya wa gfaragang nu gfalingsi.
5Dius at aringang maksvn nu madulo, kata sik awang, ay kanya nafakamulun nusnge wain at madulo tam fagyudun saful.
6Kanya nafanting at marios fag arak sas daga, ay naugwag yangay sas daga at maksvn fag arak,
7laman taw gfiangalay tua siginan at nafakamulun, ay laman nangamatangan sabaliwa Dius at ngay nafakamulun.
8Ngay mangilafang gsuksuan sat mesa fagsuksuanan, ay gbanwan sanya gina gfulug.
9Fulug kadasug, ay anggan at marios fag tagmara kadasug yangay.
10Siginan Dius at engasan mamam ansik yelu, anggan tagbia fag lino antugas.
11Kanya nafapnu mamam sa sangay linyabu ay sanya ginan anke ngay limbad.
12Kanya nasugu ngay linyabu laman gbaribungan sas fagdaul daga.
13Kanya nagbilug tuy fagayu laman gfasine taw at ugali, ay gfarak sas daga, laman gfalag at fakesugun.
14Ub, dungugani ay amatangani sabaliwa Dius at ngay nafakamulun fag ngay madulo.
15O nasaful wo nu setain Dius nu gsugu linyabu, ay nu setain nu gfalimbad siginans linyabu?
16O nasaful wo nu setain ngay linyabu nu giwangan? Dius at ngay awatan takatanya at madulo, ay at fagsafulun kasakan.
17Gafangenit o aroro sat masugba fag tagmara siginans fasiunan fag alvngvdan.
18O magubuk ro wo Dius nu gfae linyabu, katugas sik taganyang fag salaming tansu?
19Longi emi nu setain at masine em fagnanlongun sas Dius. Wami saful em longan ro, aroro yami bangan e fagsafulun.
20Nu kaylat au gfakamatoan Dius, o e manamasaful sa anya? Sik taw at nafakamatoan Dius, umfaurianan.
21Nusnga sinu we madama sas menit at yamag. Tagmara nu nauyup ngay linyabu, menit masulo.
22Siginans fawalan fag alvngvdan, Dius at fagmasuloun takata sik gintu kadasug, ay at fagmaduloun gligung anya.
23Wa tam manangakbang sat mabalyanan fag Dius, aroro maksvn nu mabalyanan ay nu matuyan.
24Nu katanya, ngay taw gsuyu anya, ay kanya wa kasalag ngay taw taglong te, e fagsafulun.”
Currently Selected:
Ub 37: OCCT
Highlight
Copy
Compare
Share
Want to have your highlights saved across all your devices? Sign up or sign in
Copyright © 2021 by OMF International, Philippines
