Ub 36
36
1Elyu gfataglayun yay glong te,
2“Agwantani yap sirut fanyai angku, aroro e fagyalongun kyay sabaliwas Dius.
3Ngayu ku fagsafulun, ay gfatuyanan au sa emu te, Dius tam Takawat, matuyan.
4Gfatuyanan au sa emu te, kwa kamuag, aroro au tagfakamatoan emu, kasakan tua ku fagsafulun.
5Dius mabalyanan, ay kanya di e nafauri, kanya mabalyanan ay gfafasludan tua at algan.
6Kanya wa gfaduge at mauri fag ngay taw nu gleleg, ay kanya gfon fagmasineun sa sangay taw tagafalingunan.
7Kanya di gfabayan ngay taw at matuyan, ay kabavn kanya gfauseganan anya fagayu gasfuan at ngay fun.
8Dewa katanya, at matuyan fag ngay taw nu gidapan, kata nu e nasiuk sik salambitan,
9Dius gfasaful sanya fag ngay taw te, nataw at asalanan siginan at fakamatungudunun.
10Ay kanya nafasaful sa anya fagayu at famararang, ay gsugu te, ‘Ubuni wan ay fagmauriun.’
11Ay kanya fagayu nu galo tua ban ay gfaning anya, di ban e fagayudanun ay manabayan tua ban gbanwan.
12Ay kanya fagayu nu dway gfaning, umbul ban yud e fagsafulun.
13Ngay taw at yud gfaning Dius, gsuksuk gugat fakadotamaun sat amatanganan, ay Dius dewa gfaurianan anya fagayu, kanya fagayu wa get gubuk sas Dius.
14Kanya fagayu kabul gina yay mabaguama, ay at nafakamulun maksvn nu mapla.#36:14 maksvn nu mapla: sas Ebreu: nafataladan fagbayadun fag ngay mangama sit bale fagnansegan.
15Sik taw gina gidapan, Dius gfalangfe anya, ay siginan at fagidapun, Dius gfasaful anya te, dungugani tua anya.
16Dius nafayayu emu siginan at malimu, ay nafae fagmanabayanun emu, ay nafon sa emu tangayu ay at mataba fag ngay fakonun.
17Ay katsi gafaurianan o kata at mauri fag ngay taw nu gafaurianan, ay wo masaruy ya at kinfasludan wan sa emu.
18Dirii tua, laman di o gafaylatan sas fagmaramramanun, ay sa tagbia fag famaylatan.
19O am fagmaramramanun ay am fagmakatuun mafagubuk emu laman gfaragang am fagidapun?
20Lag o kanbang nu kayabi, gina ngay taw gafaurianan sit mesa bale.#36:20 Wa mayamag tuy fag tapan at masuad.
21Dirii tua, ay lag o gfakamulun at mauri. Dius nafaidapan emu laman gfaragang tuo gfakamulun at mauri.
22Amatangani, Dius mabalyanan, ay we takamoyung tagfasud anya.
23We mafoyung sa anya nu setain at fakamulun at masine, ay we malong te, kanya nasalan.
24Lag o kalyam gfauseganan sabaliwas Dius at ngay nafakamulun kata tibak taw nu gfauseganan galubad.
25Kanya fagayu nalag Dius at ngay nafakamulun, dewa katanya, nu glag, siginan way sad ngayayu.
26Anud, Dius mabalyanan, ay wa tam saful at kamasinean. Ay wa tam mafatap te, seyuk banwa nu gleleg.
27Dius nabul mamam siginans daga ay nafasas tungud, ay kanya nawat arak.
28Arak kaugwag siginans linyabu ay ganting sa sangay taw.
29We nasaful te, setain linyabu nu karapyag, ay setain nu glingsi sas banwa, Dius at fagbanwanan.
30Damai nu setain kanya nu gfae limbad sat ligung, ay nu setain nu gfae yamag anggan sas fagngabasadan dagat.
31Siginans Dius at fagmabalyananun kanya gfunan ngay furuan ay gfon ngay fakonun sa sangay taw.
32Kanya gted limbad ay gsugu te, sanya nu katuk.
33Limbad gfasaful te, e gakadasugun fulug. Anggan ngay fagbaugun saful yangay te, e kadasug.
Currently Selected:
Ub 36: OCCT
Highlight
Copy
Compare
Share
Want to have your highlights saved across all your devices? Sign up or sign in
Copyright © 2021 by OMF International, Philippines
