Ub 34
34
1Elyu gfataglayun glong te,
2“Am fag ngay taw taglong te, ‘E fagsafulun ami,’ dungugani fia angku.
3Leplep gfaskud fakonun, ay talinga gdungugan aringang at matuyan ay at yud matuyan.
4Katanya yangay tam, nangasaful tam nu setain at matuyan ay at masine.
5Ay Ub glong te, ‘Kdoma e asalanan, dewa katanya, Dius wa nafon angku fagmatuyanun.
6Dewa au matuyan Dius glong way te, kamuag kway, ay dewa au yud e nafakamulun asalanan, kanya nafae fakasaitun angku at yud gfangafia.’
7We taw kaksvn Ub nu gagwanta dewa e gfalingun.
8Kanya at fakaylatun at fagaloan at mauri way fag taw,
9ay glong te, ‘We fanambagun sa sik taw nu gugatan way gfauseganan Dius!’
10Nu katanya, am, dungugani tua angku, am taglong te, gtogdungug am. At mabalyanan fag Dius wa gfakamulun at mauri.
11Kanya gfon sa sangay taw kata at ngay mesa nafakamulun, ay at fagfonan sa way lang tagugali at matuyan.
12Natuyan au te, at mabalyanan fag Dius wa gfakamulun at mauri, kanya wa gfayud e masuad at matuyan.
13O nunda e nafalu anya laman gfunan fagdaul daga? Ay o e nasugu sa anya te, ‘Funani fagdaul daga?’
14Dius ro nu gbul wan tam leleg,
15fagayu ro taw gasfuan umbul, ay kafoli sas daga.
16Ub, nu nyamag tuo, dungugani ku longan.
17O Dius ro manga gfunan nu dway kaylat fagmatuyanun? Wain am fagfayudun at matuyan ay at mabalyanan fag Dius?
18O nunda bunwa sia at naiyan ngay fun at yud matuyan?
19Kanya di e fagfili fagayu funan, ay wa yangay e fagfadiugananun at maramraman man ay at yud e kwa aroro sia way at nawat way anya fagayu.
20Dewa at mabalyanan fag fun kabul way masakit gina mayabi, deyud e nafakamulun sa anya at mauri.
21Dius gulit ngay taw at fakamulun.
22At mauri fag taw wa mananuksuan dewa sit madulum fag suluk.
23Dius wa guro ya taw laman nansalubang ay namatuyan sabaliwa anya.
24Kanya wa ginsaful ya ngay funan laman namalin siginan anya at fakamulun ay namatigwanan sa tibak taw.
25Aroro kanya saful way ngay fun at fakamulun, ay nafalin yangay siginan anya at ngay fagmabalyananun, ay nafabul gina mayabi.
26Ay kanya nafaurianan kafag ngay fun sis fagngayuan taw aroro sat ngay fagmauriun.
27Kanya nafakamulun takatanya aroro kanya fagayu natalyuyan anya, ay wa nafandungug at balyawvtan.
28Kanya fagayu nafalingun at ngay taw at yud e kwa, ay Dius nadungug kafag ngay nafalingunan nu get gubuk.
29Dewa katanya, Dius dewa maragangan ay gsuksuan ginanya fag buknga, we taw malong te, kanya nasalan. At matuyan, Dius gulit tua gugat fagayu taw,
30laman gfaragang wan at yud gafanud sa anya nu gfunan, ay laman at ngay taw di kasangdaw.
31O e batang glong sas Dius te, ‘Nagwantan au gidapan, ay siginan ban katsi kwa gasalanan ya.
32Foyungi angku o e asalanan au, ay nu nke asalanan kway, kwa ban gdog ya gfakamulun takatanya’?
33Setain ro Dius nu mabalus am fagetun nu dway o gubun am asalanan?
O wan tagamatangan ay bunwa au ya, nu katanya, longi sa angku nu setain am algan.
34Ngay taw at ke fagsafulun ay tagtogdungug gdungugan tua angku.
35Ay kanya fagayu glong te, garingang o deyud o e fagsafulun.
36At masine nu e namaskud emu, aroro nu garingang o kata way o sik taw at mauri.
37Nafamut o am asalanan aroro sam fagmauriun sas Dius, nafauri o ay nafalingun Dius si em daga salubangan.”
Currently Selected:
Ub 34: OCCT
Highlight
Copy
Compare
Share
Want to have your highlights saved across all your devices? Sign up or sign in
Copyright © 2021 by OMF International, Philippines
