Ub 33
33
Elyu Gfakamatoan Ub
1Ub, dungugani fia, nangaringang au sa emu.
2Mafalganan kwan nangaringang, ay ku ngay fagnangaringangun si wa ku langbud leplep.
3Ku longan siginan mandi ku amatanganan, ay nanlong au fia matuyan ku ngay fagsafulun.
4Dius at Falad at nawat angku ay at nafon sa angku ku leleg.
5Ay balusi tua ro angku, nu maringang yay o. Falganani ay salubangi angku.
6Katsi si watas Dius at daga salubangan. Fagdua ta siginan way ta sdaga.
7Nu katanya, lag o kalimu angku ay lag gamatangan te, gfalingun kro emu.
8Nadungug kwan am ngay nalong te,
9‘Kdi e asalanan, ay kdi e kalong, ay kdi e nafakamulun at mauri.’
10Ay nalong yay o te, ‘Dius narvbvy sik malong laman gfaidapan angku, ay gtap angku te, at fawayan.
11Kanya nasiuk sik salambitan si ku ngay darafa ay gulit fagayu ku fakamulun.’
12Ub, am ngay nalong wa matuyan. O nunda Dius kata way sik taw?
13Wain am fagnalongun te, kanya wa gbalus taw at fagetun?
14Dius nu garingang, bundi sayginan ay dua ginan, dewa katanya, ngay taw wa kaylat gdungugan ay wa gamatangan.
15Kanya garingang siginans taginfan kaduge tam gtiug ngabasad sisad yabi.
16Kanya ginas ngay taw sat day talinga ay gfalimu anya fagayu siginan at ngay famararang.
17Kanya gfakamulun takatanya laman kanya fagayu gfaragang wan nu gasalanan ay nu kamatungudun,
18ay laman umlangfe tua siginans fakabulun.
19Dius nu gfasine taw at ugali, tibaginan gina nke fakasaitun, kata tagsis bini fag fakasaitun yud kafia ya,
20ay wa kaylat ya kon dewa at mataba fag fakonun.
21Nu katanya, kanya umniwang, ay gatagyangun way lang.
22Kanya gakabulun wan, ay ganangadasugun sa sangay kinbul at talun.
23Ay nu e sik libu di ktagbarita, ay at sadi nu mananwabilug di sas taw ay sas Dius, kanya ro nanlong sanya fag taw te, Kata tua tuy at matuyan.
24Ay Dius ro nu nfanyu anya glong ro sanya fag tagbarita te, ‘Falangfei kafag taw siginans fakabulun, aroro nasaful kwan famalyam at asalanan.’
25Nu katanya tua, umfoli ban at fagmabitsugun, ay at bilug umkata yay gina mabaguama.
26Kanya nu nadarangin sas Dius, Dius gbalus anya ay kaylat anya, ay kanya fag taw lumag Dius ay guseganan, ay Dius gfafoli sa anya at matuyan fag famanwanun.
27Ay nu katanya, kanya malong tua sa sangay taw te, ‘Nasalan au ay nafakamulun au at yud matuyan, dewa katanya, kdi anfaurianan kata at faurianan ma sa angku.
28Kanya nafalangfe tua angku siginans fakabulun, ay gfataglayun au sas fagelelegun.’
29Kin, kata kanya Dius at fagfakamulunun gugat sa sangay taw.
30Kanya gfalangfe ngay taw siginans fakabulun, laman ngay taw gleleg tua.
31Ub, dungugani fia angku ay maragangani, ay au yakman lang tagaringang.
32Ay nu e fagyalongun o, longi tua aroro gyasafulun au te, o di o e asalanan.
33Ay nu ddi ngani, maragangani way lang, ay gfoyung au emu ku fagsafulun.”
Currently Selected:
Ub 33: OCCT
Highlight
Copy
Compare
Share
Want to have your highlights saved across all your devices? Sign up or sign in
Copyright © 2021 by OMF International, Philippines
