Ub 32
32
Elyu Naringang
1Ub at fagadgalangan fag tulu nafaragang wan nu garingang, aroro ngap Ub gfabulun way te, “Kwe asalanan.”
2Sanya sik taw at ngayan Elyu. Kanya Barakel at baguama, ay Bus at fufu siginan Ram at kasugfunanan. Kanya kadotama Ub aroro abat ngate, nafayud at sadili, at nafayud Dius way. 3Ay kanya kadotama yangay Ub at fagadgalangan fag tulu, aroro kanya fagayu wa nafatuyan te, Ub e asalanan. Ay nafoyung way te, Dius at nasalan. 4Aroro kanya fagayu amafagtainan yap tua Elyu, Elyu nafanya yay nu yud garingang ya, laman nangaringang yangay sas Ub. 5Dewa katanya, kafag tulu way e fagmaringangun ya, Elyu andotama. 6Ay nalong te,
“Au mabaguama kyay ay am mafagtainan oma am, ay ebi ginan kapla kyay garingang, ay kwa ngap namaskud nanlong sa ayu sabaliwa ku fagsafulun.
7Nu glong kro am tua at namoyung, aroro mafagtainan wam ay ngayu wan ay fagsafulun.
8Dewa katanya, at matuyan, Dius at falad tagsis taw, kanya tua tagfon fagmatogdungugun.
9Fagmafagtainanun wa mafafon fagsafulun ay fagmatuyanun.
10Nu katanya, dungugani angku ay glong au ku fagsafulun.
11Gfanya au gugat te, seduge ro nu gdog am garingang, nu setain at matuyan ay fagyalongun ay gdungugan au ay ngay longan at matuyan.
12Ay nadungugan au fia ay ngay nalong, dewa katanya, nusdi sadi si ayu we nafatuyan te, Ub e asalanan, ay wam nafabalus at ngay fanlonganan.
13Ay lag am gamatangan te, am way lang at ke fagsafulun. Dius tua tagbalus anya ay bunwa taw.
14Ub wa nafakamatoan angku, nu katanya, kwa ro gbalus anya siginan ay ngay nalong.
15At katsi nababawan wam, ay wam e famalus ya sa anya.
16Ay katsi aroro wam e famalus ya, o gfanya kyay?
17Katsi au man at nanlong sa ayu sabaliwa ku fagsafulun.
18Aroro ngayu ku fagyalongun ku fagyudun kagwanta ya.
19Kata au sik bagu fag fagsuadan fanlangu at mapnu at bilug tagakagiratun wan.
20Garingang kwan laman ku amatanganan kamanabayan wan.
21Kwe fagnamadiuganun ay kwe fagnamasunun.
22Kwe fagfaylatanun nusnga sinu, aroro nu nafakamulun kway ro takatanya, ku Takawat ro gfabul angku.
Currently Selected:
Ub 32: OCCT
Highlight
Copy
Compare
Share
Want to have your highlights saved across all your devices? Sign up or sign in
Copyright © 2021 by OMF International, Philippines
