Ub 31
31
Ub Gfasaful te, Di e Asalanan
1Ay nafatuyanan au sa ku sadili te, dewa au nadama sa sik baguina, kwa ro galabian anya.
2Aroro nataw ban Dius at famasud sa sangay taw tagfakamulun takatanya?
3O nunda ban ngay taw at yud matuyan wa gafaurianan, o ay tagfakamulun at mauri wa ban kabul?
4O nunda Dius wa glag ku ngay dalan, ay gtap ku ngay siklang?
5Nu nafamuag kway ay nafandaya,
6Dius ro nu nanantuyan sabaliwa angku, sumaful te, kdi e asalanan.
7Ay nu nasaruyan kway at masine fag dalan, ay nu nafaning kway ku fakaylatun, ay nu nafauri kway ku sadili,
8tibai wa nangus ktaw takon ku natanum, ay umgulad wa nangus ku ngay fananumun.
9Nu nataban kway tibak mangena ay nu nalabian kway ku ibama at bubay,
10tibak mangama buli wa ku mangena ay fataladani wan.
11Aroro fagfanugtugun asalanan ay fakaplaun, ay fagayu tagfakamulun takatanya umfaurianan.
12Takatanya kata sik afuy tagfamin fagayu ku ramraman.
13Ku ngay fagsuguan nu nke fagetun sa angku, nadungug ktua ay nagubuk anya fagayu.
14Kway ro nafakamulun takatanya, setain ro ku fakamulun, Dius nu gfaurianan wan angku? Setain ro ku famalus gina kanya gfatuyan sabaliwa angku?
15Dius at nawat angku, kanya yangay at nawat ku ngay fagsuguan.
16Kway ro nagubuk tagidapan fag ngay taw, ay nu nafaidapan kway ngay fagbubayun,
17ay kway ro kamon sa sangay taw at yud e fagtainan ya, Dius ro nafaurianan wan angku.
18Dewa katanya, ebi gina au mabaguama, nagubuk au at yud e fagtainan ya, ay kaduge au gleleg, kdi nafabayan ngay fagbubayun.
19Ay nu nalag au takarios aroro we lanbung,
20nafon au sik lanbung at madamvl, at fangawat ku ngay tupa at sigyu, ay kanya maksvn nu gfauseganan sa angku.
21Ku take nu nafauri di at yud e fagtainan ya aroro saful au te, fagfawabiluganan gfadiuganan tua angku,
22ku lafi nangus umrabas wan, ay anggan ku ngay take umgatvng wan.
23Kwa mafakamulun takatanya, aroro kalimu au at mabalyanan fag Dius at faurianan.
24Kwa gseg ku ramraman, ay kwa gamatangan te, kanya wan tagfon angku fagmanabayanun.
25Kwa gfanagsag te, ngayu ku ramraman siginan ku nainlufuyan.
26Kwa gseg menit at fagmasuloun ay magdanun at yamag.
27Ay kdi nafaylatan gseg tuy fagayu.
28Ku nafakamulun takatanya nu asalanan way, matuyan umfaurianan au aroro nafamabo au Dius.
29Kwa naylat ku ngay fawayan nu gafaurianan, ay kwa nauseganan gina e fagidapun.
30Ay kdi batang gdarangin te, fabuli wan anya fagayu.
31Ku ngay fagsuguan saful te, nafafangon au nusnga sinu fag taw.
32Nusnga sinu fag betaw wa batang e gtiug sisad dalan, aroro ku sakbawan bale maluangan tua gugat sas nusnga sinu fag taw.
33Kdi nasuksuk ku asalanan kata tibak taw at fakamulun.
34Ay kdi lang namaragangan ay nanansuksuan aroro kalimu au ngay taw at ngay longan.
35Nu e gfadiuganan di angku, griruk kro ku ngayan sit ba rirukan laman gfatuyanan sas Dius te, kdi e asalanan. Nu e foyungan di te, mauri au, glong kyay ro sa anya te, ‘Riruki yap.’
36Ay gfasanan kro kafag rirukan, ay mannga gfasi au ku tungud alfuyu kata sik sangbo, laman namalag au sas fagayu taw te, mafalganan au gsalubang nusnga setaw fag kamatoanan.
37Ay gfoyung au sas Dius fagayu ku nafakamulun ay nansalubang au anya kata sik funan at yud kapla.
38Nu nafauri kway ro ku fagagbilugun fag daga, ay nu ankata sik taw galiasun gwayway,
39ay nu naago kway at gutluan, ay nu nafauri kway ngay taw tagfakamulun sanya,
40tugbungi wa nangus si ku lutuk at madugi fag makmak abat ngate trigu ay barli.#31:40 barli: sik tanum kata fare mapinunguan. ”
Ste way tsigon Ub at longan.
Currently Selected:
Ub 31: OCCT
Highlight
Copy
Compare
Share
Want to have your highlights saved across all your devices? Sign up or sign in
Copyright © 2021 by OMF International, Philippines
