Ub 28
28
Ub Garingang sabaliwas Fagsafulun ay nu Kayamag
1E ngay fakalian at ke ngay sanbung salapi, ay e ngay famadalusan gintu.
2Nu gbul sanbung siginans lutuk, ay tansu siginan at nalanang fag gang.
3Ay kanya fag ngay taw gasalungan laman gyamag sat fakalian. Kanya gfanrvbvy sat ngabasad, gang at ke tansu sa tiba daga fag sulbung.
4Ay naali at dalan sat fagnanrvbvyan fangawat salapi sas daga lutuk sabaliwa at yud e taw, ay sat yud e gdalan, kanya kadaga gulitan sa sik taguigan fag lubyang,
5Siginans daga ngay fakonun, ay afuy glanang sas daga lutuk.
6Sanya e ngay suglat mafanud fag ngay gang melo gladlaksiun, ay gintu masuglat sisad lukbu.
7Ay dewa ngay manuk tungud ay bio wa yangay glag kanya fag dalan.
8Anggan madot fag mela ya batang gsiad sanya, ay anggan idu talun ya batang glao sanya.
9Ngay taw naali wan anggan at matugas fag gang tagsis daga buksul.
10Kanya fagayu kali wan at dalan sas wa gang ay nalag fagayu nusnge wain fag gang at mafanud.
11Ay kanya fagayu nabaud liskung ay nabuba sasad mayamag at nalag fag ngay ramraman.
12Daginan fagsafulun ay fagmatogdungugun?
13We taw nasaful te, daginan, ay we ste sdaga.
14Ay wa yangay e sis fagngabasadan dagat.
15Ay we mabangsi fagsafulun ay fagmamatanganun, dewa ginto ay salapi,
16ay amafanud yap at mafasinean fag gintu tagsiginans talun Ufir, ay gtungud yap tua tagridrirukun ay melo gladlaksiun fag ngay gang.
17Takatanya gtungud tua gintu ay at mafanud fag ngay fagagbilugun, ay nu mafanud gtungud tua nusnge wain fag famasine at fangawat gintu.
18Kanya nu kabayad gtungud tua tagsisad dagat fag gang at mafanud ay taganyang, ay amafanud yap tua tagsis ale fag gang at mafanud.
19We mafasud fagsafulun dewa ngay gang tagradraskaun tagsiginans talun Etiupya, ay dewa gintu wa yangay mafabayad.
20Nu katanya, daginan tua fagsafulun?
21Fagayu tagste swa daga fag ngay awatan we nalag fagsafulun, ay wa yangay ansure sas manuk tungud.
22Dewa sat kinfaurianan at talun ay sat kinbul at talun, kanya fagayu gfanlongan way lang at nadungug sanya baliwa.
23Dius saful dalan tagsanya, ay sia way lang tagsaful sanya fag buknga.
24Aroro kanya glag way tangayayu fag fungfung daga ay fagayu tagsis daga banwa.
25Ebi kanya gina nafagaras tagmara ay nainsaful arak at kayuan,
26kanya nafalganan wan nu inda ban nu ganting, ay nu inda ban lingsi ay limbad at fakatukan.
27Ginanya fag buknga, kanya nadama fagsafulun ay nainsaful at kamafanudan, ay kanya nafaskud ay naylat.
28Ay kanya nalong sa sangay taw te, ‘Takalimu tua Fun ay takayayu tua fagmauriun, katanya tua ke fagsafulun ay tagtogdungug.’ ”
Currently Selected:
Ub 28: OCCT
Highlight
Copy
Compare
Share
Want to have your highlights saved across all your devices? Sign up or sign in
Copyright © 2021 by OMF International, Philippines
