Ub 27
27
1Ub gfataglayun garingang te,
2“Gfatuyanan au sas tagleleg fag Dius at nafaidapan angku, nustua wa matuyan nu gfawabilugan sabaliwa angku.
3Kaduge kban gleleg yay, ay kaduge ban Dius gfon angku engasan,
4kwa ban glong at mauri ay kwa ban kamuag.
5Kwa gfadiuganan ayu te, matuyan am ay gtuyan au te, dewa katsi ku leleg, kwe asalanan.
6Gfabadbaboan au te, kabavn matuyan ktua ay mabayan tua gugat ku amatanganan.
7Dius nangus gfaurianan ku ngay fawayan kata nu gfaurianan at yud matuyan fag ngay taw.
8Aroro nataw ya ban sik taw at yud gtoglag Dius at fagsegun, gina ban Dius nabul at leleg?
9Ay o nunda ro Dius gdungug kanya nu get gubuk, nu ndasug sa anya fagidapun.
10O ay guseganan tua ro sat mabalyanan fag Dius? O ay kayu ro buknga guro anya?
11Gfoyung au ayu sabaliwas Dius at fagmabalyananun ay glong au sa ayu at ngay balyawvtan.
12Dewa katanya, saful oma am tuy fagayu, ay wain fakatanyaun yay ay ngay aringang sa angku, at yud way e fanambagun?
13Katatuy ban Dius at fagfadasugun sa sangay taw at mauri ay tagfangadotama.
14Nusnga seyu man ban at ngay sisian, tuy ban fagayu umbul sas fagawayanan, ay tiba umbul sas fanlunus.
15Ay at sawad ban umbul sas fakasaitun, ay fagayu ban nu nbul wan, we kabalu ya nusdi at ngay fagbubayun.
16At mauri fag taw dewa nafungsu ngayuk salapi ay dewa ngayu at lanbung,
17bunwa ban sia at nangagbilug, nu bunway ngay taw tua at matuyan at nansulun at ngay lanbung, ay at yud e asalanan at nangagbilug at ngay salapi.
18Ay at nafalindug fag bale karasras way kata fansifig salanting, ay kata way sik tagulit gamasun at bale famoy.
19Kanya gtiug way fia gfanagsag at ramraman, ay nu kafulo wan, at ramraman nalyam wan.
20Ay kadasug sa anya fakalimuun, kata lugwak nu nadalan anya gina mayabi.
21Tagmara tagsiginans fakamenitan nabuba anya, ay nafalin anya siginan at fagbanwanan.
22Gina gurungan glagyu, tagmara guyup gugat anya,
23kata nu gtiu gfalingun anya, ay ginasan gaiyan anya siginan at fagbanwanan.
Currently Selected:
Ub 27: OCCT
Highlight
Copy
Compare
Share
Want to have your highlights saved across all your devices? Sign up or sign in
Copyright © 2021 by OMF International, Philippines
