Ub 29
29
Ub at Nabul fag ngay Famonun
1Ub gfataglayun garingang te,
2“Nu kafafoli kdi at kinlangfe fag ngay menit, kata ebi gina Dius gdiri angku,
3ay gina yay gyamag ku dalan, kaduge au glao sisad madulum,
4ay gina masine ku kayaunanan, Dius ku fagadgalangan fia, ay gfayu ku ngay kalongan.
5Dius at mabalyanan gufud tua angku ebi, ay magamut tuami talamean.
6Ku ngay baka nafon tua angku at susu bilug, ay siginan ku ngay tanum ulibu anke ngay langis au.
7Nu nalao au sas sakbawan furuan daul gina ngay funan gkamatoan,
8ngay baguama kadaydalan nu nalag angku, ay at ngay mafagtainan malindug laman gfababaun sa angku.
9Anggan ngay funan gragangan way lang.
10Ay at ke fanambagun fag ngay taw wa yangay garingang ya.
11Fagayu taw nu nalag angku gfanagsag gdungugan nu garingang au,
12aroro nagubuk au at yud e kwa fag ngay taw ay at yud e fagtainan, ay at yud e fagnangakbangan ya.
13Ay ngay taw tagakabulun nafadante angku, ay ku nagubuk fag ngay fagbubayun galubadan guseganan.
14Kabavn gfakamulun au at matuyan ay at masine, takata tagsi ku bilug fag lanbung at masine.
15Ngay taw at yud glag, au wan tuga at mata, ay at yud malao fag ngay taw, au wan tuga at darafa.
16Ay at yud e kwa fag ngay taw, au wan tuga at mama, ay dewa ngay taw ku fagyudun toglag, nainsaful ktua at ngay mamalong.
17Nafayud au e fagmabalyananun at mauri fag ngay taw, ay nafalangfe au at nafaidapan.
18Nu glong au, ngaduge tua ban nu gleleg au, ay kabul kban mafufuama magamut ku ngay kalongan,
19Aroro ebi kata ktua sik fun kayu at ke ngay lalid tagdasug sas mamam, ay galay yabi at ngay don tagadamugan tua.
20Kabavn mabitsug ktua, ay ngay taw gseg gugat angku.
21Ay kaduge au gfoyung, ngay taw gragangan tua ay gdungugan tua fia masine.
22Dewa au ntabu garingang, kanya fagayu gragangan way gugat, aroro kanya fagayu naylat wan ku ngay longan.
23Kanya fagayu kaylat ku ngay longan, kata nu kaylat arak nu kadasug.
24Nu naase au kafag ngay taw at amatanganan kabitsug, aroro ku kamatan at kamasinean gfae fagusegananun anya fagayu.
25Kata au sik fun tagfoyung anya nu setain at fakamulun at masine. Gfunan au kata sik fun daul at magamut sit ngay tagfawayan, ay gfasun au fagayu takabalu.
Currently Selected:
Ub 29: OCCT
Highlight
Copy
Compare
Share
Want to have your highlights saved across all your devices? Sign up or sign in
Copyright © 2021 by OMF International, Philippines
