Ub 22
22
Elifas Naringang
1Sanya ginan, Elifas tagsiginans Teman, nabalus te,
2“O e taw manga ke fagsafulun at magubuk Dius? Ay o nunda sik taw at mamatanganan e fanambagun sa anya?
3O Dius guseganan nu matuyan tuo? O ay kanya guseganan nu ddi o e mamalong?
4Dius gsalag ay gfauri emu, bunwa am fagfaningun anya,
5nu bunway aroro maksvn wan am fagmauriun ay nu yud o gfaragang ya gfakamulun at mauri.
6Nabul o am ngay faduksay at ngay lanbung laman at famaguna at famayad at bedan sa emu, ay nabul yangay o ngay taw at ngay lanbung, ay kanya fagayu lulas way lang.
7Wo nafon mamam sa takadanum, ay wo yangay nafon fakonun sa takalunus.
8Nagbilug o am fagmabitsugun ay am fagmabalyananun laman gfangago o lutuk.
9Ngay fagbubayun dewa naet sa emu, wo nafon. Ay nafauri o anggan at yud e fagtainan ya.
10Siginan takatanya am fakamulun, ngay sangdaw maligung emu, ay sik fanlimu ban kadasug masakit sa emu.
11Ay siginan yangay am nafakamulun takatanya, am fagyudun glag ya, ay am faginlubgubun wan sis lugwak.
12Dius nu gbanwan si tua tiba tungud fag banwa abat yap tua tiba tungud fag ngay galeme.
13Nu katanya, nalong o te, ‘Dius wa saful ku fakamulun. Setain ro nu sumaful ay linyabu gligung way anya?
14Linyabu gfarum Dius, nu katanya, kanya ro wa glag antam, kaduge kanya glao sis tungud banwa.’
15O gfataglayun yay o gulit ngay taw dewa glugo wan nu gugali at mauri?
16Kanya fagayu anbul wan sit yud kasakan fag buknga, kanya fagayu kata sik bale ke fagfatungkudan turuk, lugwak at nafalimus.
17Kanya fagayu glong sat Mabalyanan fag Dius te, ‘Fabayani way lang emi. Nataw ro am fagmafakamulunun sa emi?’
18Dewa katanya, Dius wan at nafapnu nusnge wain at masine sat mesa bale. Nu katanya, kwa kaylat at mauri fag ngay taw at fangatulun.
19At matuyan fag ngay taw guseganan nu nalag te, at mauri fag ngay taw anfaurianan, kanya fagayu gfalingun kase,
20ay glong te, ‘Tam ngay fawayan anfaurianan wan ay at ngay ramraman nirug wan.’
21Faningi Dius ay asadii sa anya, laman kanya gfon emu fagmabayanun.
22Faningi at ngay suguan, ay fasii gugat am amatanganan at ngay longan.
23Nu kafoli tuo sas Dius, ay nu gfayayu tuo fagmauriun siginan ayu fag talanan, kanya gdog yay gfon sa emu fagmanabayanun kata ebi ginan.
24Lag o kesug am ngay ramraman; tuyani te, at kamafanudan kata way ngay lagnas ay gang sis liskung.
25Dius tua nangus am fakesugun fag ramraman, kata nu kesug o gintu ay salapi.
26Ay nu katanya tua, Dius gfae fagmanabayanun emu, ay di o kapla nangakbang anya.
27Darangini sa anya ay kanya dumungug emu, ay fafasludani tua am ngay fatuyanan sa anya.
28Nu katanya, nusnga setaw am fagnamakamulunun kafasludan tua ay kabavn am dalan mayamag tua.
29Ay sik taw nu kamomuy, darangini sas Dius te, fabitsugi anya, ay Dius ro ggubuk kafag taw.
30Ay anggan ke asalanan fag ngay taw nu nalag am ugali at matuyan, kanya ro umlangfe tua.”
Currently Selected:
Ub 22: OCCT
Highlight
Copy
Compare
Share
Want to have your highlights saved across all your devices? Sign up or sign in
Copyright © 2021 by OMF International, Philippines
