Ub 21
21
Ub Naringang
1Ay Ub nabalus te,
2“Dungugani fia angku, laman mafasun yangay am angku.
3Kaduge au garingang, dungugani angku. Ay nu ntabu kwa ro garingang, falinguni wa angku nu kaylat wam.
4Bunwa taw tagfaidapan angku nu bunway Dius tua. Katanya at malong at fagmunagudun way ku fangagwanta.
5Lingamani angku, o wa ro am e fakaduloun? Ay taupi ay bibig.
6Nu namatangan au sat ngay kindasug sa angku, gtadtaruyan au kalimu.
7Wain at mauri fag ngay taw at faglelegun tua gugat ay kadanama ay nustua kabalyanan ya?
8Kanya ngap fagayu nalag tua at ngay sisian ay at ngay fufu nu kagurang.
9Ay kanya fagayu gbanwan tua manabayan ay we fakalimuun ya. Dius wa gfaurianan anya fagayu.
10At ngay baka ngayu tua nu griangan, ay fagayu kagurang tua.
11Ngayu tua at ngay sisian, at kayuan kayu sik gaban tupa, ay kanya fagayu tagfalelegan at ngay afud bilug.
12Ay kabavn kanya fagayu gfangalubadan gasfuan nu gfawang fagfadkalinganun ay fagfawangun ke ngay bakyang, ay gfanagsag gdungugan nu e gtulali.
13Kabavn, kanya fagayu manabayan ay kabul yangay manabayan.
14Dewa katanya, kanya fagayu glong sas Dius te, ‘Fabayani wa emi. Wami kaylat am ngay balyawvtan.
15Sinu o fag Dius at Mabalyanan em fagnamaningun, ay nataw ro am fanambagun nu nadarangin ami sa emu?’
16Aroro at mafanud, kanya fagayu nu karamraman bunwa siginan at fagmakatuun, nu katanya, kwa kaylat at ngay fangatulun.
17At mauri ngap fag ngay taw wa ngayu takabul. Dius di vtv kadotama laman gfadasug fagidapun sa anya.
18Kanya di gaiyan anya fagayu, kata sik tagbaribudan fag tagmara nu gfalayug upa.
19Glong am te, ‘Aroro siginan sik taw at asalanan, Dius gfaurianan kafag taw at ngay sisian.’ Dius nangus gfaurianan wan tagasalanan laman kafag taw sumaful te, e asalanan.
20Ay kanya nangus fagayu dumalan faurianan. Fabayani wan Dius nu gfadasug at fandotaman sa anya fagayu.
21Ay kanya ban fagayu nu nbul wan, wa gamatangan ya sat mesa talnayan.
22O e mafoyung fagsafulun sas Dius? Sia wan tagwabilug ngay awatan tagsis banwa.
23E ngay taw takabul gina maseganama ay gina manabayan ay gina e ngay ramraman,
24ay gina yay mabitsug at bilug.
25Ay e ngay taw yangay takabul sat maksvn fag fagidapun yud ya anke fagmanabayanun.
26Dewa katanya, kanya ban fagayu gsudan way nangafoli sas daga, ay ulud ban kon way at ngay bilug.
27Nasaful kwan nu setain ay ngay namatangan, ay nasaful kyangay nusnga setaw ay algan sa angku.
28Ginto am te, ‘Dada wan at maramraman fag taw at bale, ay dada wan at mauri fag ngay taw at fagbanwanan?’
29O nunda wam nainto sat ngay tagdalan, ay o nunda wam nadungugan ngay taw tagdalan sanya nu gfansulitan?
30O nunda glong te, ‘At mauri ban fag taw umlangfe gina Dius gfaurianan fag menit.’
31We gsalag ya at mauri fag ngay taw ay we namasud ya anya.
32Ay gina nanamoli anya, e gulit at fagfolian,
33daga nabul wan at bilug, ay ngayuk taw at nanamoli.
34Nu katanya, setain ro nu mafasun am angku siginan ay longan at yud e masuad? Fagayu ay nalong we mafanud!”
Currently Selected:
Ub 21: OCCT
Highlight
Copy
Compare
Share
Want to have your highlights saved across all your devices? Sign up or sign in
Copyright © 2021 by OMF International, Philippines
