Ub 20
20
Sufar Naringang
1Ay Sufar tagsiginans Naama nabalus te,
2“Garingang au aroro kwa kagwanta ya.
3Nasalag o angku ay nafamatanganan o angku laman gbalus emu.
4Nasaful wo siginan yay ebi sfagsigadan, siginan nu kawat taw ste swa daga,
5at mauri fag taw wa ngaduge nu manabayan, ay sik taw at yud gafanud sas Dius wa ngaduge nu e fagusegananun.
6Kanya nu gdama at sadili dewa kabat sbanwa ay slinyabu,
7kanya ban umtabu way kata sik nakaurian. Ay tagtoglag anya fag ngay taw rumvbvy ban anya.
8Kanya umkalyam kata sik taginfan at yud ya gdog kamatang.
9Ngay taw at nalag anya ebi, wa ban gdog ya glag anya. Kanya umkalyam wan siginan at fagbanwanan.
10At ngay sisian wan at namafoli at ngay nafangkamul siginan tagidapan fag ngay taw.
11Kanya mabitsug ay mabaguama yay nu kabul.
12At mauri fag fakamulun, kata sik fakonun at matamis,
13at nafangamsak fia masine.
14Ay dewa katanya, nu ndasug sat ungdan, kanya ankenal way, ay ansuya kata nu naon sik ule at ganga.
15Ay kanya ban kata nu nansufa at nafangkamul fag ngay ramraman, Dius namafangkok ban anya dewa siwa at basad ungdan.
16Kanya kata nu nangvp ngay ule at ganga, ay kanya wan at nafabul anya.
17Kanya ban we nabul ya langis ay susu bilug ay deut tagfamilugan kata sik liskung.
18Ay wa ban e gfafoli ya sa anya at nainlufuyan, ay wa ban guseganan ya sat ramraman.
19Kanya nafabayan wan ngay tagidapan, nustua, naago wan at ngay bale.
20Kanya gfangalabian gugat, ay at ramraman wa mafalangfe anya.
21Wa ban e sawad si anya at ngay fakonun aroro umkamin ban at ngay ramraman.
22Gina yay ban e ramraman, umdasug ban sa anya at maksvn fag fagidapun.
23Kafag taw gina manabayan, Dius maksvn nu kadotama anya, ay gfadasug at faurianan.
24Kanya dewa anlagyu sis fiso, gatayukan yay ro fia banyas.
25Kanya fag banyas naurus at mayat ay natalfus sat guyuy. Ay kanya nu nalag gtadtaruyan kalimu.
26Ay kanya at ramraman umkalyam wan. Ay e mirug anya gasfuan fagayu at kinfamato sit fagbanwanan, at nafaigang kafag afuy, bundi taw.
27Banwa gfasure at ngay asalanan, ay daga gfasaful sabaliwa anya.
28Ay gina ban Dius nafadasug at dotama, lugwak ban namalimus at bale.
29Katanya ban at mauri fag taw at fakadasugan. Dius wan at nafalganan fagayu takatanya sa anya.”
Currently Selected:
Ub 20: OCCT
Highlight
Copy
Compare
Share
Want to have your highlights saved across all your devices? Sign up or sign in
Copyright © 2021 by OMF International, Philippines
