Ub 19
19
Ub Naringang
1Ay Ub gdog yay nabalus te,
2“Seduge tua ban nu gfaidapan am, ay gfauri angku siginan ay ngay longan?
3Gfalingun am gugat angku, wam kapla ya say ngay nafauri angku.
4Nu mafanud di te, e asalanan au, au wa ke fagidapun kanya.
5Gamatangan am te, amatuyan yap am angku, ay gamatangan yangay am te, ku ngay fagidapun tagfatuyan te, e asalanan au.
6Asafuli te, Dius wan at ke fakamulun sa angku takatatuy. Kanya wan at nafoli ngay sangdaw si ku ligung.
7Dewa au guro get gubuk we gbalus ya angku. Naet koma fagmasineun ay we nafon angku.
8Dius nabalabag ku dalan, ay nafadasug sik dulum laman kwa nanlao sanya.
9Kanya nafamin wan ku ramraman anggan ku fagmasineun.
10Kanya nafaidapan angku ay arvs anbul kwan. Ay kwe fagsegun ya, kata sik kayu at kin-gunut wan.
11Kanya maksvn nu kadotama angku, sak nalong te, at fawayan kway.
12Kanya kata nu namadasug sa angku sik ngay tagfawayan laman namawayan angku, ay kanya fagayu gligung ku bale.
13Kanya nafayayu siginan angku ku ngay kalongan, anggan ku fagtoglagun fag ngay taw anyayu yangay siginan angku.
14Ku ngay kaiban we munakbang ya si angku. Anggan ku ngay fagadgalangan wa gamatang ya angku.
15Ku ngay betaw ay anggan ku fagsuguan fag ngay mangena wa toglag ya angku, ay nu glag angku kata kway lang tagsiginan tibak talun fag taw.
16Nu nauro au ku fagsuguan, wa gdungugan ya angku, dewa au gyafakamatoanun anya.
17Ku mangena kabasung way ku engasan, ay ku ngay faduksay mangama kasuya angku.
18Ay anggan ngay sisian ayu sirut gfalingun wa angku ay kanya fagayu nu nalag angku kadkasean.
19Fagayu ku ngay fagadgalangan at munakbang si angku nkuri wan angku, ay anggan ku talnayan nyayu yangay angku.
20Maksvn wan nu maniwang au ay arvs gakabulun kwan.
21Ku ngay fagadgalangan, afanyui yap angku, aroro Dius gfaidapan angku.
22Wain ay fagfalingunun angku kata Dius nu gfalingun angku? O nunda nu gamatangan am, ya nsak ku nainkidapanan?
23Ku ngay nalong nangus anriruk sas fagrirukan fag fafil.
24Ay mannga anriruk sas gang laman ban kabavn sanya tua gugat.
25Dewa katanya, nasaful kwa te, ku tagfalangfe gleleg tua, ay abandi ban kanya umdasug stie sdaga.
26Dewa ban ku bilug andan wan, gseg kwa ban te, lumag au Dius.
27Lumag kwa ban fia anya, ay kaylat kwa daul gyalagun anya.
28Nu gfataglayun wam gfalingun angku te, gidapan kwan aroro sa ku asalanan,
29anud Dius ban at faurianan umdasug sa ayu. Kanya gfaurianan wa fia ayu aroro maksvn nu kauri ayu. Ay ginanya ban, sumaful am te, Dius gfaurianan ayu.”
Currently Selected:
Ub 19: OCCT
Highlight
Copy
Compare
Share
Want to have your highlights saved across all your devices? Sign up or sign in
Copyright © 2021 by OMF International, Philippines
