Ub 18
18
Bildad Naringang
1Nu ntabu katanya, Bildad tagsiginans Sua nabalus anya te,
2“Ub, seduge tua ban nu garingang o takatanya? Am aringang at matuyani tua, ay gfakamatoan romi emu.
3O nu gdama o emi kata waymi ngayu sik ngay mangilafang, ay o gamatangan o te, sik ngay yud e fagsafulun waymi?
4Siginan am dotama nafauri o am sadili, o nunda Dius nanfabayan fagdaul daga laman sa emu? O ay namalin ngay gang siginan at mesa fagmatungkudan?
5At mauri fag ngay taw umbul. Kanya fagayu kata way sik salung tagakarabungun.
6Tagsi anya fagmadulumun wan, aroro at salung anyungu wan.
7Ebi kanya e fagmaksvnun oma, dewa katanya, katsi nalyam wan, ay at nafauri anya at sadili yay algan.
8Kanya yay at nalao sas sangdaw ay nafaiktan at sadili.
9Ay at ngay darafa wa maalfas ya.
10Ay e nafae sik sangdaw sit dalan ay nafaut lutuk.
11Ay si wat ligung fagayu at malimu, ay nusnga nday nu glao, kata nu e gfafalo anya.
12Ay aroro kalunus wan, kanya garimanan wa ayu sirut kamomuy, ay fagmauriun mafalganan wan laman namabul anya.
13Ay takamabul fag bangbang gfamin at balat, ay at take ay at darafa kadan wan.
14E nafalelegan wan anya siginan at fagsarirungan fag bale, ay nataban anya sat malimu fag fun.
15At mauri fag ngay taw at fagbanwanan ankiklas wan, ay umkirug sa tagigang fag afuy.
16Ay umkata sik fun kayu at ngay lalid at kinyango wan, ay at ngay sanga kinyango wan.
17Fagayu tagste swa daga kalyam wan anya, ay wa ban gamatang ya anya.
18E gaiyan wa anya siginan at mayamag fag talun ay e nantaban wa anya sas fagfolian sat madulum fag talun.
19Kanya wa nke sisian ya ay wa nke fufu, ay fagayu at kalongan anbul wan.
20Dewa ndaginan fag taw umdulo ay umlimu sat kindasug sa anya.
21Ay glong te, ‘Kata kanya at kumdasug sat mauri fag taw ay at yud gtoglag Dius.’ ”
Currently Selected:
Ub 18: OCCT
Highlight
Copy
Compare
Share
Want to have your highlights saved across all your devices? Sign up or sign in
Copyright © 2021 by OMF International, Philippines
