Ub 16
16
Ub Naringang
1Ay Ub nabalus te,
2“Siginan yay ebi nadungug kwan takatanya. Abat ngate am namasun angku, nafaksvn wayam ku fagidapun.
3O yam gfaragang nung am garingang at mauri? Nataw tagfasagsagan si ay amatanganan ay fagyudun gfaragang nu gfabadbaboan am angku?
4Anggan am, nu nadalan di am kata ku nadalan fag fagidapun, malong kyangay ro sa ayu kata ay nalong sa angku.
5Dewa katanya, kwa gfakamulun takatanya, nu bunway ku fagnanlongun sa ayu tagfabitsug tua ay tagfasun ayu.
6Dewa kngap ro garingang, gidapan kway gugat, ay dewa kngap ro naragangan, ku fagidapun wa kalyam.
7Dius, nafamomuy o angku ay nafamin fagayu ku fagagbilugun.
8Nagamat o angku, ay kalag tua ku fagidapun. Nafaniwang o angku ay siginan takatanya katsi e gamatangan te, e asalanan au.
9Dius, siginan am dotama nafawayan o angku, ay kata o sik tagfangagat fag mela at narufa ku faknul, ay gfaringgit o am ngay bagang, ay glibayung o angku.
10Fagayu taw gfalingun angku, ay gfalang ku fingi laman gfapla angku, ay kanya fagayu masadi gfawayan angku.
11Dius nafon wa angku sat mauri fag taw ay naukas angku sat malimu fag ngay taw.
12Ebi mabayan ktua. Ay kanya nafauri angku, ay nated ku liug ay narugut, ay nawat angku at fagfanaun.
13Ngay takamusuy naligung angku. Kanya we afanyu ya gfana angku, ay nafana ku ngay amuslun, ay ku mayat anbuksang ay anbusbus sas daga.
14Ay kanya wa gfaragang nu gfalang angku. Kanya kata sik tagfawayan tagfataglayun gfawayan angku.
15Nasulun au saku ay namalunggung au sisad daga laman gfalag au te, kabalu au, ay si au sad dafug kata nu nababawan au.
16At kaksvnan ku nawayway, ku mata anraska, ay siginan ku fakabaluun, ku balat mata anlayung.
17Dewa katanya, kdoma e asalanan, ay matuyan oma ku darangin.
18Ankata au sik nafabul fag taw. Glong au sas daga te, ‘Lag yap gfalyam ku taguk yakmay kban e fagmasineun.’
19Katsi ku tagfatuyan tagsi tuas banwa; kanya tagfatuyan te, kdi e asalanan.
20Ay ku tagfatuyan ku fagadgalangan wan. Ay gwayway au get sas Dius fanggubukun.
21Ku tagfatuyan gfainfanyuan sas Dius laman sa angku, kata sik taw taget laman sat fagadgalangan.
22Aroro waban ngayu yak banwa nu gleleg au ay sanya ginan glo kwan ay kwa ban kafoli ya.
Currently Selected:
Ub 16: OCCT
Highlight
Copy
Compare
Share
Want to have your highlights saved across all your devices? Sign up or sign in
Copyright © 2021 by OMF International, Philippines
