Ub 15
15
Elifas Naringang
1Elifas tagsiginans furuan Teman nabalus te,
2“Taw at ke fagsafulun di glong at yud e masuad.
3Kanya di garingang at yud e masuad laman gfabadbaboan, ay di garingang at yud e fanambagun.
4Dewa katanya, siginan am ngay nalong, tibak taw wa gsuyu ya Dius, ay wa kaylat ya gseg anya.
5Siginan am asalanan glong o at mauri, ay am longan kata sik taw tagfanuksuk at longan.
6Bunwa au ya tagfoyung emu te, gafaurianan o, aroro am bibig wan tagfatuyan sabaliwa emu.
7O nu glong o, o wan taguna fag taw o ay nunda ansalug wo gina yay yud e ngay buksul?
8Ay o nunda nadungug wo Dius at ngay algan? Ay o nunda o way lang at ke fagsafulun?
9O ay saful wo em fagyudun nasaful? Ay nataw am nayamagan em yud yay anyamag?
10Anke fagsafulun ami siginan sa ngay mafagtainan, at mafagtainan yap tua am mama.
11O nunda yo kasun Dius at famasunun sa emu, ay at ngay longan at malukme sa emu?
12Wain am fagnafaningun am namatangan? Nataw at nafamomuy emu siginan at matuyan
13laman kadotama o Dius ay garingang o at mauri sa anya?
14O nunda sik taw makatu gugali at yud e malong, o ay matuyan sis Dius at daga salubangan?
15Dius wa fia gafanud at ngay tagbarita; tagsis banwa fag ngay awatan nu dway fia masine sit daga salubangan,
16kaugat wa ro ngay taw tagasalanan ay tagugali gugat at mauri.
17Ub, dungugani angku. Namoyung au ay nanlong sa emu ku nagdalanan fag ngay fagidapun.
18Ku fagnalongun kata ngay taw at ke fagsafulun tagsiginan tua at ngay mangaguyang.
19Kanya way lang fagayu tagagbilug ste fag talun, ay ye ndasug ngay taw tagsiginan tibak talun.
20Ay at mauri fag taw gidapan kaduge gleleg.
21Kabavn e fakalimuun way ay dewa gina manabayan fag buknga, kanya kalimu way gugat te, e namawayan manga anya.
22Kanya kayudbak glao sasad dulum, aroro gamatangan te, e mafabul anya.
23Kanya nusnga nday way lang nu grvbvy at fakonun, ay kanya nasaful te, gakabulun wan.
24Kanya kaugat yay nu kalimu, kata sik fun nu mafalganan namawayan at ngay fawayan.
25Anud anfasludan sa anya takatanya, aroro kanya nafawayan ay nafamabo at mabalyanan fag Dius.
26Kanya kata nu gted at mogat fag famalabag, ay mafalganan namawayan Dius.
27Katsi, kanya dewa mataglu ay maramraman,
28kanya ban namanwan way sa sangay furuan at kinrasras, ay sa sangay bale at yud e gbanwan ya, ay sa takaiklas wan.
29Kanya wa kae ramraman ya. At ramraman gakaminun wan, ay at ngay ramraman wa kafamut ya.
30Kanya wa masaruy ya fakabulun,#15:30 fakabulun: sas Ebreu, fagmadulumun. kanya ban umkata sik fun kayu at sanga takairug. Ay Dius sayginan way guyup fagayu at ramraman.
31Kanya nangus lag gdaya at sadili siginan nu gafanud sas nusnge wain at yud e tungkul, aroro kanya ban we bulan sanya ginan fagayu.
32Masakit kadasug sa anya faurianan ay at ngay ramraman umkalyam wan.
33Kanya umkata sik tanum wat ubas takatong wan at rawvg dewa melo yay, ay kata sik fun kayu ulibu takalangke at barugwak.
34Ngay taw at yud kalimu Dius kabul wan ay wa kae ngay sugfun. Umkirug ban at nawat fag ngay bale tagsiginan way sfamaylatan.
35Ay kabavn kanya fagayu at amatanganan sa way at namauri, ay gfalganan way laman nanfandaya.”
Currently Selected:
Ub 15: OCCT
Highlight
Copy
Compare
Share
Want to have your highlights saved across all your devices? Sign up or sign in
Copyright © 2021 by OMF International, Philippines
